¹ Petrusi, muapositoli waYesusi Krisitusi, kuva ntundavirongo vakukushuva-shuva, ovo vatoghorora, kutundilira muPontia, Galatia, Kapadosiya, Asiya naBetiniya . ² Evino kukwama kughukonentu waKarunga Shetu, kutwara mughupongoki wavirughana vyaMpepo,mukonda yalivhuliko ntani mulitekero lyahonde yaYesusi Kristusi. Ghufenkenda ghukare nanwe ntani mpora yikuwederere. ³ Mposhi Karunga ntani Vashe Muyogholi wetu Yesusi Krisitusi tumutangaghuke! Munkenda yendi yayinene, Ghuye kwatupa lishampuruko lyendi lyalipe muliparu lyalihuguvaro kutwara mulivhumbuko lya Yesusi Kristusi mumfa. ⁴ Evino vyaghupingwa ogho ngaghudiro kukombana, wawo kapi ngaghuvhura kunyata, ntani kapi ngaghukombana. Wawo kwaghukupungwira muliwiru. ⁵ Anwe kwamupopera munkondo daKarunga kupitira mulighuguvaro namuliyoghoro lyakuwapayikiro mukushorora muruvede rwakughulilira. ⁶ Mwavino karenu nalinyanyu, nampiri weno, mukaruvede kakadidi, munakona kuhepa marudi ghamahepeko ghakukushuva-shuva. ⁷ Evino vyakunegheda lipuliro lyenu, kupitakana ghuwa wangorodo ogho wakombanango,nampiri ngoli vayishetekanga kumundiro. Evino kushoroka mposhi mukuwana lipuro mukukara vitundwamo mulitangaghuko, ghuyerere, ntani nalifumano nalimoneko lya Yesusi Kristusi. ⁸ Anwe shimpe kapi mwamumona, mara mwamuhora, kapi munakumumona ngoli, mara mwapura mwendi ntani nalikushamberero naruhafo rwapeke-peke ntani nakuyura naghuyerere. ⁹ Anwe weno kunakuwana vitundwamo vya lihuguvaro lyanaghumwenu, mbyo mwawana liyoghoro namonyo denu. ¹⁰ Kuhamena liyoghoko, vapumbwi vovapumbwiro kuhamena ghufenkenda wongaghuyo kwenu kwaghushanine shankondo-nkondo ntani, nakughukona-kona nawa-nawa, ¹¹ Kwapulire mumuntu munke ndipo ruvede rwampepo yaKristusi mumwavo kwaneghedire ghungambi kumeho vyakuhamena kulihepeko lya Kristusi ntani namaghuwa ogho ngaghakwamoko. ¹² Ghaviva monekere kwavo ashi kapi vanakuku rughanena naghumwavo, mara nwe, opo vaghambire vininke ovyo vamutantilire kovovamuyuvhitiro nkango kutwara mumpepo yakupongoka ovo vatundiro muliwiru-vininke ovyo vaengeli vakengire vyo vatatilire kukenga. ¹³ Makura mangenu nakutunga maghano ghenu. Pukurukenu. Turenu lighuguvaro lyenu nalintje mughufenkenda owongavamuyitira mulimoneko lyaYesusi Kristusi. ¹⁴ Mukukara mwanuke wakulimburukwa, kapishi mukukwatakane naumwenu kumakuyuvho ogho mwakwamine pamwakalire nalincenuno. ¹⁵ Enengoli owoghamuyitiro ghuye ghapongoka, nanwe nka karenu muvapongoki mughukaro wenu naghuntje. ¹⁶ Kwatjanga ashi, "Pongokenu, morwa ame kwa pongoka." ¹⁷ Ntjene aghukughu"Shetu" owo ghapangurango mughushiri ntani kutwara kwa muntu kuvirughana vyendi, kukwatakanenu naghumwenu mughutjire paruvederuno munakara pano ashi vantundwa virongo. ¹⁸ Munayivashi kapishi vyalikombanito lyasiliveli ndipo lya ngorodo yovamumangurura mughukaro waghudona womwapinga kuvadimu venu, ¹⁹ Makura mukondo yahonde yaKristusi, yakufana yira yandjwi yoyadiro shipo ndipo ruvara. ²⁰ Kristusi kwamuyivire kumeho yalitateko lyaudjuni, mara weno anakunegheda kwenu muruvede rwakughulilira. ²¹ Kupitira mwendi ghunapura mwaKarunga, owoghamuyumunino mughufe ntani nakumupa lifumadeko mpongolishi lipuliro nalighuhuvaro likare mwaKarunga. ²² Mwatura monyodenu mughukushuki kupitira mulivhuliko mughushiri. Shino ntjoshitambo shashiwa kuvakurwa mushihoro: Mposhi kuhorahorenu ghumwe naghumwe kutundilirakundungu yamutjima waghukenu. ²³ Anwe vanamushampuruka nka waro, kapishi kumbuto yakudjonaghuka mara kumbuto yakudirakudjonaghuka, kupitira muliparu nakukara munkango daKarunga. ²⁴ Mposhi"nyama nadintje kwakara yira mushoni, ntani mucuko wamuwiya namushoni. Mushoni kukukuta, ntani namucukonagho kumya nakuwa ko, ²⁵ mara nkango daMuyogholi kukarerapo naruntje."Yinondjo nkango yalivangeli oyo vayuvitire kwenu.