¹ Quirosarin copirno Atonisë itopisoso', nanan natantërin: " Ai ninano piyapinënpitarë'chachin Cosoirë ata'huantërin. Inapochachin Quirico ninanonta copirnonënichachin nitërin. Naporahuaton Capaon ninanoquë ya'huëhuano'santa' Cosoirë' anoyatatona, cohuachi nino'huipihuë'," topiso', natantërin. ² Napoaton Quirosarin ya'huëhuano'saso', pa'pi të'huatopi: "Capaonso' panca ninano'. Copirnohuan ninano'ro'sa pochin niconin. Ai ninanoquëran panca panca nisahuaton piyapinënpitanta', miso ahuëtona'piro'sa," tëcatona të'huatopi. ³ Napoaton Quirosarin copirno Atonisë itopisoso', Iporon copirno Oamo itopiso, Carmoto copirno Pirian itopiso, Naquisë copirno Cahuia itopiso, Icoron Copirno Tipiri itopiso, inapita nanan a'patërin: ⁴ "huëco nicatahuatëhua ahuëtahua'. Cosoi, israiro'sa, inapitarë' Capaono'saso anoyatatona noya nini'pisomare', ahuëa'hua'," ta'ton nanan a'patërin. ⁵ Inapoatona a'natërapo amoro copirnoro'saso', nihuëntonpi: Iporon copirno, Carmoto copirno, Naquisë copirno, Icoron Copirno, inapita nihuëntonpi. Sontaronënapitarë'chachin Capaon ninano ahuëcaisomarë' tancapitopi. ⁶ Napohuachina Capaono'saso', Cosoi, sontaro'sa, inapita Quiricaro'quë ya'huëapiso nanan a'patopi: "Manoton huësahuatoma, piyapinëmapitacoi pa'poyacoi. Amororo'sa copirno motopiro'saquë ya'huëpiso', nihuëntona'tona tancapitërinacoi," itopi. ⁷ Napotohuachina Cosoiso', ya'ipi sontaronënpitarë'chachin Quiricaroquëran pa'pi catahuatapona'. ⁸ Siniorori Cosoi itapon: "Ama inapita të'huatëquësohuë'. Carinquën catahuaranquën inapita minsëaran. Co inso tëranta nanitarinhuë chinitiinënquënso'," iterin. ⁹ Cosoiso' sontaronënpitarë'chachin, Quiricaroquëran pipipi. Ya'ipi tashi pasahuatona, a'nanaya inimicoro'sa anoantopi. ¹⁰ Naporo Siniorori inimicoro'sa a'payanin ni'ton, israiro'sari Capaonquë notohuaro tëpapi. A'napitaso', Piti Oron'pa' ira pa'ninso masahuatona ta'apirinahuë imaantapi. Asica, Masita inapita parti ira pa'ninquë tëpaantapi. ¹¹ Israiro'sa ta'ananpitona, inimicoro'saso Piti Oron nicotoana pa'tomapirinahuë', Siniorori chachin inapaquëran panca na'piro'sa të'yanantërin. Asica ninanoquë ira pa'ninso nani chachin napotërin. Napotohuachina notohuaro taquipi. Israiro'sari sahuëniquë tëpapiquëran na'con na'con taquipi. ¹² Siniorori naporo tahuëri israiro'sa catahuarin amororo'sa minsëcaso'. Napoaton Cosoiri Sinioro nontaton, israiro'sa natantonënquë camaitërin: "¡Pi'i, Capaonquë tachitëquë'. Quëmanta yoqui, Acaron nicotoanquë tachitëquë'!" itërin. ¹³ Napohuachinara pi'i tachitërin. yoquinta co huachi pa'ninhuë'. Israiro'sari inimiconënapita i'huërë'taihuarë' naporin. Naporinso', Casiri itopisonta inachachin quiricanënquë ninshitërin. Naporo pi'iso', piiro'të huancana tachitërin. A'na tahërira' pochin inaquëranchin nii'huarin. ¹⁴ Iracaquëran huare co ina pochin tahuëri ya'huërihuë'. ina piquëraonta', co ya'huërinhuë'. Sinioriri chachin israiro'sa ya'huërënamën ahuëtarin ni'ton, naporin. ¹⁵ Cosoiso ya'ipi israiro'sarë'chachin Quiricaroquë pa'mantapi. ¹⁶ A'natërapo copirnoro'saso', ta'atona Masitaquë nanin ya'huërinsoquë ya'conatona na'pirapi. ¹⁷ Namaso Cosoi sha'huitopi: "A'natërapo copirnochachin na'pirapi quënanpi. Masitaquë nanin ya'huërinsoquë nisapi," topi. ¹⁸ Ina natanaton Cosoiso' camaitërin: "Panca na'piro'sa pi'napirahuatoma nanin pa'copitoco'. Naporahuaton inaquë sontaro'sa acoco a'paicaiso marë'. ¹⁹ A'napitanquëmanta', inimicoro'sa imatoma ahuëconco'. Sinioro'so Yosënpoa ni'ton, nani quëtërinpoa inapita minsëcaso'. Napoaton ama ninanonënaquë ya'conatona cha'ëinasohuë'," itërin. ²⁰ Cosoiso israiro'sarë' chachin inapita imatona tiquipi. Caraichin inimicoro'sa pairahuan ninanonënaquë ya'conatona cha'ëpi. ²¹ Inaquëran ya'ipi Israiro sontaro'saso', Cosoi nisarinquë noya huëantapi. Naporo inaso', Masita ninano ya'cari canpaminto ocoipiquë nisarin. Naporahuaton co inso inimicori tëranta Israiro'sa ma'sha itacaiso nanitopihuë'. ²² Inaquëran Cosoiso' camaitaantarin: "A'natërapo copirnoro'sa naninquë nisapiso', i'soarapitoma quëshico'," itërin. ²³ Napotohuachina' quëpatopi, Quirosarin copirno. Iporon copirno, Carmoto copirno, Naquisë copirno, Icoron copirno inapita quëpatopi. ²⁴ Inapita copirnoro'sa quëshihuachinara, Cosoiso' ya'ipi sontaro'sa amatërin. Inaquëran sontaro hua'ano'sa inarë' ahuëtapona pa'piso itapon: "Isopita copirnoro'sa i'naconotërapiaco'," itërin. Itohuachina, inapotëra'piapi. ²⁵ Inaquëran itapon: "Ama manta të'huatocosohuë'. Chiniquën cancantoco'. Sinioro catahuarinquëma ni'ton, isopita nitëramaso pochin ya'ipi inimicoro'sa chinitërinënquëmasopita minsëarama'," itërin. ²⁶ Inaquëran Cosoiriso', copirnoro'sa tëpara'piarin. Inapotahuaton i'huaquë huarë' a'natërapo nararo'saquë pë'tëna'piarin. ²⁷ Nani i'huaraya nipachina pëtënpiquëran anohuarahuatona, na'pipiso naninquë chachin të'yatopi. Inapotatona panca na'piro'saquë nanin pa'copitopi. Ina na'piro'saso', iporahuanta inaquëranchin nisapi. ²⁸ Inapotaton Cosoiso', naporo tahuëri chachin Masita ninano ahuërin. Copirnonënanta' tëparin. Ya'ipi inaquë nisapiso', sahuëniquë tëpapi. Pë'tahuaro'sa, hua'huaro'sa, inapitanta' ya'ipi tiquipi. Quirico copirno napotërinso chachin inapitanta' nitërin. ²⁹ Inaquëran Cosoiso', sontaronënpitarë' chachin Nipina ninano ya'huërë paahuantapi. Inaquë ya'huëpisopita ahuëcaiso mare', pa'pi. ³⁰ Siniorori israiro'sa catahuaantarin ni'ton, ya'ipi inaquë nisapisopita copirnonënarë' chachin sahuëniquë tëpapi. Quirico copirno napotërinso chachin inapitanta' nitërin. ³¹ Inaquëran Cosoiso', sontaronënpitarë' chachin Naquisë ninano ya'huërë paahuantapi. Ina notënanquë ya'huëirahuatona, ahuëconpi. ³² Siniorori israiro'sa catahuaantarin ni'ton, ya'ipi inaquë nisapisopita tahuërinquë canapi. Pë'tahuaro'sa, hua'huaro'sa co inapita tëranta nicha'ëpihuë'. Nipinaquë ya'huëpisopita napotërinso pochin inapitanta nitërin. ³³ Inaquëran Quisiri copirno Oran itopisoso', sontaronënpitarë' chachin Naquisiquë ya'huëpisopita catahuacaiso mare' huëcapaipi. Cosoiri'so sontaronënpitarë chachin pashita'parahuatona tiquipi. ^{34 35} Inaquëran Cosoiso', sontaronënpitarë' chachin Icoron ninano ya'huërë paahuantapi. Ina notënanquë ya'huëirahuatona ahuëconpi. Ahuërahuatona, naporo tahuëri chachin canapi. Ya'ip inaquë nisapisopita sahuëni quëran ata'huantopi. Naquisiquë ya'huëpisopita nitopiso pochin inapitanta nitopi ³⁶ Inaquëran Cosoiso', sontaronënpitarë' chachin Iporon ninano ya'huërë paahuantapi. Caantonahuatona, inapita ya'huërë' ahuëcoantapi. ³⁷ Minsërahuatona sahuëniquë ya'ipi tëpapi. Copirnonënanta' inapotopi. Ina ya'cari ninanoa'huaro'saquë ya'huëpisopitanta' inapotopi. Ya'ipi inaquë ya'huëpisopita ata'huantopi. Icoronquë nitopiso pochin inapitanta nitopi. ³⁸ Cosoiso sontaronënpitarë chachin tahuërëantarahuatona, Tipiri ninanoquë canconpi. Canconahuatona, inahua ya'huërë ahuëcontapi. ³⁹ Ya'ipi inapita copirnonënarë' chachin sahuëniquë tëpapi. Ina ya'cari ninanoa'huaro'saquë ya'huëpisopitanta' ya'ipi tiquipi. Co ma'sha tëranta nicha'ëpihuë'. Iporonquë ya'huëpisopita, Nipinaquë ya'huëpisopita copirnonënarë' chachin ata'huantopiso pochin, Tipiriquënta nitërin. ⁴⁰ Inapoaton Cosoiso', ya'ipi ina no'paro'sa manin. Motopiro'sa parti, Niquipi parti, canon parti, tahuano'sa parti inapita. Nisha nisha copirnoro'sari hua'anëntopirinahuë', piyapinënapitarë' ya'ipi tiquirahuatona, matërin. Sinioro israiro'sa Yosënëni camaitërinso chachin nipi. ⁴¹ Cosoiso israirosarë' chachin sahuëniquë ya'huëhuano'sa tiquipi. Catisi Parnia quëran Casa'pa' huarë'. Nisahuaton Cosin no'pa quëran, Capaon'pa' huarë'. ⁴² Cosoiso' inahua copirnoro'sa ya'ipi minsërin. Minsërahuatona no'panënanta ya'ipi matopi. Sinioro'so israiro'sa Yosënëna ni'ton, Inari inahua ya'huërënamën ahuëtaton catahuarin napotopi. ⁴³ Inaquëran Cosoiso', ya'ipi israiro'sarë' chachin Quiricaroquë canpamëntonëna otënpiquë o'mantapi.