¹ Orait wanpela taim ol lida bilong tumbuna famili long lain bilong Gileat pikinini bilong Makir husait em i pikinini bilong Manase, em ol wanlain bilong Josep, i kam na tokim Moses long ai bilong ol lida husait i stap hetman bilong ol tumbuna lain famili bilong manmeri bilong Israel. ² Ol i tok, ''God Yawe i bin tokim yu, bikpela bilong mipela, long brukim na givim hap skel bilong graun long ol Israel. God Yawe i tokim yu pinis long givim hap skel bilong Selopead brata bilong mipela long ol pikinini meri bilong em. ³ Tasol sapos ol pikinini meri bilong em i marit long narapela lain manmeri bilong Israel na i no wanblut, orait hap skel bilong graun bai mipela rausim long skel bilong ol lain tumbuna. Mipela bai i bungim antap long ol lain ol i bung wantaim. Long dispela as, bai mipela i rausim olgeta dispela kontrak bilong hap skel bilong ol pikinini tumbuna bai i kamap bihain taim tu. ⁴ Sapos i olsem, long yia bilong amamas bilong ol manmeri Israel i kam, nau hap skel bai i go bung wantaim hap skel bilong ol wanblut ol i bin bung. Long dispela rot, hap skel bilong ol bai yumi rausim long hap skel bilong ol lain tumbuna wanblut.'' ⁵ Olsem na Moses i givim wanpela strongpela tok long manmeri bilong Israel, long tok bilong God Yawe. Em i tok, '' Wanem ol lain wanblut bilong lain tumbuna bilong Josep i tok em i stret. ⁶ Dispela em wanem God Yawe i tok long ol pikinini meri bilong Selopead. Em i tok, 'Larim ol i marit long husait ol i ting em i gutpela, tasol ol i mas marit insait tasol long wanblut, famili lain bilong papa bilong ol.' ⁷ Noken senisim hap skel bilong ol lain manmeri bilong Israel wantaim ol narapela lain. Wan wan lain manmeri bilong Israel mas i go yet long hap skel bilong ol wanblut lain bilong tumbuna bilong ol. ⁸ Olgeta meri bilong Israel husait i gat hap skel graun insait long wanblut mas marit long sampela man long lain bilong wanblut bilong papa bilong em. Yupela mekim olsem bai olgeta wan wan manmeri bilong Israel bai i gat luksave long wanlain bilong em. ⁹ Olsem na yupela i no ken larim narapela man i kisim graun bilong yupela, Nogat. Wan wan lain manmeri bilong Israel bai i holim graun bilong ol yet. ¹⁰ Olsem na ol pikinini meri bilong Selopead i mekim olsem God Yawe i bin tokim Moses. ¹¹ Malah, Tisa, Hogla, Milka, na Noa, en ol pikinini meri bilong Selopead, ol i marit long wanlain bilong Manase. ¹² Ol i marit insait long wan lain tumbuna bilong Manase pikinini man bilong Josep. Long dispela rot, ol lain tumbuna i kamap bihain bai i stap yet insait long wan blut bilong papa bilong ol. ¹³ Dispela em ol tok na lo bilong God Yawe i givim long Moses long ol manmeri bilong Israel insait long ples daun bilong Moap arere long Jodan long Jeriko.