¹ Ilelo kwali umuntu wumo vahamwitaga Ananiya, nu mushi wakwe Usafila, vahakazya uluvazu lya shuma shavo, ² ahasengula zimo indalama zye ahazizye ( numushi wakwe wope azimanyile), ahatwala zimo nukuviha muvinama vya mupositili. ³ Pe u Peteli ahati, ''Ananiya, shoni she u satana ahizula mumoyo waho ukuluma ilenga kumupepo umufinjile nu kusengula zimo indalama zya mugunda? ⁴ Lwe vatakazile, atasyaye waho, na lye wakazya, atali muvulamulili vwaho? Wuwenu we auvisile zinizi mu moyo waho? Utalumile ilenga kuvantu, loli kwa MUlungu.'' ⁵ Lwe ayivwa amazwi ganaga, Ananiya ahagwa pansi nukufuta ilyavumalilo, ilyoga ipiti lihinza pavonti ve vahazyivwa. ⁶ Avalumendo vahamunyamusya nu kumupinya, vahamunyamula kufuma nawo nu kumusyila. ⁷ Lwe pajenda utuvalila kushimbila tutatu, umushi wakwe ahinjila, atamanyile she shavomvilwe. ⁸ U Peteli ahati kuwuyo, ''Mbuzya ine nanti mukazizye umugunda kundalama izi.'' ahati, ''Mwemumo, she zili.'' ⁹ Pe uPeteli ahati kuwuyo, ''Zyamile vuli ukuti mwivwana poka ukumulinga umupepo wa Mwene? Yenya, inyayo zya valumendo ve vashiliye umulume waho zili pa mulyango, vandi vakufumye kunzi.'' ¹⁰ Mwaluvilo ahagwa pansi muvinama vyakwe nu kufuta ilya vumalilo. Lwe avalumendo vinjiye, vahaga afuye, vahamufumya kunzi nu kumusyila paluvazu pa mulume. ¹¹ Ilyoga ipiti lihinza pa shivanza shonti napa vonti ve vahivwa zinizi. ¹² Ivimanyisizyo ivyinji ni visukumizyo vihavombaga pa vantu ukujendela munyove zya va positili. vamile vonti poka pa mulyango wa Solomoni. ¹³ Ilelo patamile nawumo we ajimvile ukuva nawo; nashezyali uvu, vahazing'wamiha nkani avantu. ¹⁴ Vashili vamo avitisi vahonjela kwa Mwene, impuga lya vanavuli na vantanda, ¹⁵ pe vahavanyamulaga na vavinu kuvaviha mutudala nukuvagoneha muvitala namumatengi, nalwe u Peteli akwinza kupipi, ishizyungani shakwe shahavagwiaje vamu muvavo. ¹⁶ Pe vahinza havili poka imbazyo impiti iya vantu kufuma mutwaya twa kuzyungulila mu Yerusalemu, vahaletaga ava vinu na vantamyo zya mpepo inkandamanu, pe vonti vahapolaga. ¹⁷ Ilelo umuputi umupiti ahanyamuha, navonti ve vali nawo ( ye yamile mpuga yava Sadusayi); vahinza nuvuzuva. ¹⁸ Vahaviha inyove pava positili, Vahavakunga mwijela ilyavapina. ¹⁹ Lwe vusiku uhavizya wa Mwene ahavigulila amalyango ga jela nukuvafumya kunzi, ahati, ²⁰ ''Valaji, mwimilile mwitempeli nukuyanga ku vantu amazwi gonti kuvulanzi uvu.'' ²¹ Lwe vivuye zinizi, vahinjila mwitempeli pe izuva likwinjila vahamanyisya. Pe umuputi umupiti ahinza, nave valinawo, ahazyita poka inyumba zya valongozi, vonti avasongo va vantu va Isilayeli, nukuvatuma ku jela ku vasenda avapositili. ²² Loli avalongozive vavazile vatahavaga mujela, vahagaluha nukulingania. ²³ ''Twazile ijela lyigalile navalindilizi vashilyango vimiliye pa shilyango, lwe twigula, tutamwazile nawumo mukasi.'' ²⁴ Ilelo lwe umusunga tempeli navaputi avapiti vahivwa amazyi ganaga, pe vahalangana avene kunzila zye kwe zyinzaje. ²⁵ Pe wumo ahinza ahavavuzya, ''avantu ve muvavisile mujela vimiliye mwitempeli vakumanyisya avantu.'' ²⁶ Pe umusunga tempeli ahajenda na valongozi vahavaleta pisinda, ilelo patali umuvwalanga, mwe vahogopaga ukuti vangavasumba namavwe. ²⁷ Lwe va valesite, vahavatwala kjunyumba ya vulongozi. Umupiti umupiti ahavavuzilizya, ²⁸ ahati, ''Twavalajiye imwe nuljulajilo ukuti mutamanyisyaje mwizina linili, nashe mwizuzizye u Yerusalemu nimanyisya zyinyu nivinyonywa nukuleta amavanda gamuntu uno paliswe.'' ²⁹ Pe u Peteli navapositili vahamula, ''Tuhondeye ukumwivwila uMulungu kulusya umuntu. ³⁰ Umulungu wa vatata ahamuzyusya nu Yesu, we mwamugozile ukwa kumupajiha mwikwi. ³¹ Umulungu amutendamisile kunyove yakwe indyelo nukuva mulongozi nu muposhi, ukupa ulupinduho ku Isilayeli, nulutetelo ulwa mbivi. ³² Twe vahome vazinizi, havili mupepo umufinjile, we uMulungu amupiye wonti we akumwitiha.'' ³³ Lye avalongozi vivuye zinizi, vahalaye vahanzaga nukuvagoga avapositili. ³⁴ Umu Falisayi we vahamwitaga Gamaliyeli, umanyisi wa ndajilo we avantu vonti vamushindisile, ahanyamuha muluhomano lwa vahome nukulajila avapositili ukuti vafumaje panzi muhavalilizyo hansi. ³⁵ Pe ahati kuvavo, ''Vantu va Isilayeli, mutejelezye nkani zye mukusiva ku vantu iva. ³⁶ Lwe insiku zishili, Tudasi ahayiyanga ukuva wumo, imbazyo ya vanavuli, 400, vahava nawo. Vahamugoga, vonti ve vahamushindihaga vahasata pe vahasila. ³⁷ Pisinda pa muntu uno, u Yuda wa muganileya ahanyamuha munsiku zye avantu vahavazilwaga nukusimbwa ahatapa vamu avantu. ahalova, vonti ve vahamushindihaga vahasata. ³⁸ Ishi nkuyanga kwimwe, muve ukutali vavo avantu vanava muvaleshe veka, nanti insivo izi pamo mbombo zya muntu, pe zilivoneha. ³⁹ Nanti zya Mulungu, mutalizikwanisya imwe; munginza mwaje mukulwa nu Mulungu.'' Pe vahavalambilizya. ⁴⁰ Pe vahavita mukasi ava positili nukuvahoma nukuvalajila ukusita kuyanga havili mwizina lya Yesu, vahavalashela vahajenda. ⁴¹ Pe vahepa kunyumba ya valongozi nuluseshelo she vapeliwe ukuhondela ukuyimba numusamu mwizina. ⁴² pisinda isiku lyonti, mwitempeli na kufuma munyumba ni nyumba, vahajendelela kumanyisya nukulumbilila ipangwi ilyinza ukuti u Yesu wu Chilisiti.