¹ Lwe vatulesite ahinza umwakudumunsania, iswe tuhasambilila ukuti aha sungo hahitwaga u Melita. ² Avantu ava muhaya hehala vatahayifumya navwe vwila vweka, nkandi avene vahatupembela umoto nukutuposhela iswe swenti pakuti yihatonyaga imvula havili kwahataye. ³ Nkandi uwene u Pavuli lwe avunganisile umuzigo wankwi pe ahaziviha pa moto, inoha yihafuma shifukwa shilungula pe yihamukakatila pa nyove. ⁴ Pe avantu ava mwemula vahenya ishikoko shikulelemba kunyove yakwe, vahayanga woka ku wamwavo, ''Umuntu uno nalyoli angava mugozi we aponile afumile mwa sumbi, uvwanalyoli vutakumwitishila ukuti ave nuvulanzi.'' ⁵ Nkandi uwene ahasanyantila ishikoko pa moto atahivwa ukuva nakumo. ⁶ Pe avene vahalindililaga ukuti ayivwe ukupya nakwe kutetema lumo angagwa nu kufwa. Lwe vamwenyelezya ahavalilo ahatali vahenya ukuti nashimo ishivivi she shikumwaga, vahandula insivo zyavo pe vahayanga ukuti uwene shilungu. ⁷ Pe ishi uvuzilo vwe vapalamiye pali utwaya utwa mwene wumo uwa pa nsungo, umuntu uyo vahatinji u Pabuliyasi. Ahatuposhela iswe nukutupa ivwa vwila iswe amasiku gatatu. ⁸ Shavomvilwe ukuti ubaba uwa Pabuliyasi agonile avinile inzegema na mukasi. Lwe u Pavuli avazile kukwakwe, ahayiputa ahaviha inyove pa wuyo, nukumupozya. ⁹ Lwe izi zyavombwa, avantu vonti pa ha sungo hala ve vamile vope vahinza nukupola. ¹⁰ Pe avantu vahatushindiha iswe namashinzi aminji. Lwe tukusengania izya kujenda mu minzi, vahatupa iswe vye tuhanzaga. ¹¹ Lwe gajenzite amezi gatatu tuhavusya ukujenda ni meli ye yadiliye ulupepo paha nsungo, imeli iya Alekizandiliya, yewu ''Utulungu utwamapasa'' ukuva mbazyo yitwe. ¹² Ishi pe lwe tufisile muhaya aha Silakasi, pe tuhatendama pala amasiku gatatu. ¹³ Ukufuma pala vahajenda nukufiha pa nkaya iya regiyumu. Lwe pajenda isiku lyoka inkungu iya kuvuswelo yihanyamuha, pe pamasiku gavili tuhinza munkaya ya Puteyolo. ¹⁴ Pepala tuhavaga avamwitu vamo vahatuposhela ukuti tuve navo amasiku 7. Mwidala linili tuhafiha ku Roma. ¹⁵ Pe ukufuma pala avamwitu, lwe vivuye izyitu, vahinza ukuhomana niswe pavutali inza she pavuzilo uvwa kukazizya uvwa pa Apiya napa nyumba zitatu izya kugona. Lwe u Pavuli avavonyi avamwavo, ahamusalifya uMulungu nukuva nuvujimvu. ¹⁶ Lwe twinjiye mu Roma, u Pavuli vahamwitishizya ukutendama pawuyo weka navasikali ve vahamulindililaga wuyo. ¹⁷ Pe zihafishila ukuva lwe pajenda amasiku gatatu u Pavuli ahavita poka avantu ve vali valongozi muva Yuda. Pe avene lwe vinzile poka, ahati kuli vavo, ''Vamwitu, nashe ine ntavomvile nashimo ishivivi ukuvavushila avantu pamo amiho aga vatata, ine nkaletwa inza she umukungwa ukufuma ku Yerusalemu nukuvala munyove izya va Roma. ¹⁸ Pe lwe vambuzishizya ine, pe vahasungwa ukundeha nukuva ne musatushe, pakuti shitaliko nashimo she shihandeta kumfwa mu nongwa yane. ¹⁹ Nkandi lwe avene ava Yuda vayanzile nizya kwanza kwavo, pe vahamupatishizya ukuvoneshela kwa Kayesala, nashe zitali inza uvu izyakuti ine naletaga ukususania nukuyivushila insi yane. ²⁰ Inza she zili, pelelo, ine nkwisite ukuti ningakwenya nukuyanga niwe, ishi shili vwevulo pamulandu wa lusuvilo ulwa Isilayeli ukuti ine ishi nzwaye amanyololo.'' ²¹ Pe ahayanga kuli wuyo, ''Tutahatela tuposhele amakalata kufuma ku Yudeya aga zyinyu imwe, nakwe kuti wumo uwa vamwinyu ayinze na kwe kuyanga shimo ishivivi ishi mwe. ²² Nkandi iswe tukwanza ukutejelezya ukufuma kukwinyu zye mukusiva ukuyana nahagavo, pakuti zimanyisile niswe ukuti hakuyangwa ahavivi konti kula.'' ²³ Pe lwe vamuseveye isiku ilyakwe, avantu avinji vahinza kukwakwe pe uwene ahatendama. Pe ahavapa avene amazwi, nukuvasimishizya izya shinamwene isha Mulungu. Ahalwisya ukuvalambilizya avene kuzya Yesu, vonti avakufuma mundajilo izya Mose nakufuma ku Vakuvwi, ukutaliha inzanchi ukufiha ishamazuva. ²⁴ Pe vamo zihavahola zila zye vaziyanzile, vope avinji vatahasuvila. ²⁵ Lwe avene vatinkine woka nu wamwavo, avene vahepe lwe u Pavuli ayanzile izwi lyoka ili; ''Umupepo umufinjile ahayanga ahinza mwa Yesaya umukuvwi ku vatata vinyu. ²⁶ Pe ahati, 'Valaga ku vantu ava uti, ''Ukwivwa imwe kwe muliyivwa, nkandi imwe mutalizimanya; kope ukwenya imwe kwe muliyenya, nkandi imwe mutaliyenyelezya. ²⁷ She amoyo aga vantu ava gava magomu, nage makutwi gavo galesile ukwivwa, pe naminso gavo gasinziliye. Pe ishi lumo vanginze venye naminso gavo, nukwivwa namakutwi gavo, nukuzimanya na moyo nu kupinduha, pe ine ningavapozya avene.''' ²⁸ Pelelo, imwe muhondeye ukuzimanya ukuti uvupokwa vwa Mulungu vutumilwe ku vakunzi, pe avene valitejelezya.'' ²⁹ Lwe uwene ayanzile ivintu vinivi, ava Yuda vahepa. Pe vati nukudalinkana ukupiti muli vavo veka. ³⁰ Uwene u Pavuli ahadila amaha gonti gavili munyumba ye apanzile, pe ahavaposhela vonti ve vahavalaga ku kwakwe. ³¹ Ahalumbililaga izya shinamwene isha Mulungu ahasambilizyaga zimo izya Mwene uYesu Chilisiti nuvujimvu nukusita kupingwa.