¹ Pe vamo avantu vahiha ukufuma ku Yudeya vahavalaga mu Antiyokiya vahavasambilizya avamwavo, vahati, ''Nanti mutangavolwa ukuyana na miho aga Mose, imwe mutalipona.'' ² Ishi shihamuleta u Pavuli nu Balinaba ukudalinkana ukupiti nukuyanzania navo. Upavuli nu Balinaba, poka na vamwavo vamo mu vevala, vahavaseva ukuti vakwele ku Yerusalemu ukuhomana na vapositili navasongo ukuyana ni vuzyo ili. ³ Avene lelo, mwe vatumilwe nishivanza, vahadumunsania pa Fonikiya nu Samaliya nu kukumusya izya kuyanzania nava panzi. Avene vahaleta ukuseshela ukupiti ku vamwavo vonti. ⁴ Lwe vinza ku Yerusalemu, vahaposhelwa nishivanza na vapositili na vasongo, pe vahavapanjila ivintu vyonti vye uMulungu avavomvile poka navo. ⁵ nkandi vamo avantu ve vitisile, ve vali vamumpuga yava Falisayi, vahimilila vahati, ''Shingava shinza ukuvavola nu kuvapatishizya ukuzilema inkomelezyo izya Mose.'' ⁶ Pe avapositili na vasongo vahavungana poka nukuyisivilila intamyo ino. ⁷ Lwe vayanzizinie nkani, u Peteli ahimilila nukuvavuzya, ''Vamwitu, muzimanyile ishinza shila ukufiha hali uMulungu ahasala mulimwe, ukuti nalye lilomo avakunzi vivwe amazwi aga ipangwi ilyinza, nu kwitih. ⁸ Umulungu, we agamanyile amoyo, avasimishizizye avene pa kuvapa umupepo umufinjile, inza she avomvile kuliswe. ⁹ Atahavomba ukulesania pakasi piswe na vavo, pakugazelufya amoyo gavo nu lwitiho. ¹⁰ Pe ishi lelo shoni she ukumuyezya uMulungu, ukuti iwe uvishe ikoli munsingo izya vasundikwa lye avatata vitu pope niswe tungalinyamula? ¹¹ Nkandi iswe tukwitiha ukuti tukwinza ukupokwa muvwila vwa Mwene witu u Yesu, inza she vali.'' ¹² Pe ipuga lyonti yihapuma nukutejelezya u Balinaba nu Pavuli ahavavuzya izya vyivonesyo ni visukumizyo uMulungu vye avavombeye ava kunzi ukujendela muvavo. ¹³ Pe lwe valesile ukuyanga, u Yakovo ahamula, ahati, ''Vamwitu, ntejelezyi ine. ¹⁴ U Simoni ahavavuzya mwe uMulungu atalishiye uvwila ahavavwa avakunzi ukusenda vamo avantu ukuva vizina lyakwe. ¹⁵ Amazwi aga va kuvwi gakwintinkana nizi, inza she lisimvilwe, ¹⁶ 'Lwe vyajenda ivi ine ndigaluha, pe ndizenga havili ihema ilya Davedi, pala pe paguye pansi, pe ndiyania nukuzenga havili mwe linanjisile. ¹⁷ Kwe kuti avantu vonti vevasyaye vamulondole uMwene, ukusanzya nava kunzi ve vahitwa mwizina lyane.' ¹⁸ Ishi she uMwene akuyanga, wuwenu we avomvile ivintu vinivi vye vyamanyiha ukufuma mutuvalilo utwahali. ¹⁹ Ishi, ine nadumula ukuti tutahavatamiaje avo avakunzi ve vakwinza kwa Mulungu. ²⁰ Pe iswe tulivasimba avene ukuti valeshe ukunyazya nivilungu, ukufuma mumbivi iya luvembu, ninyama zye vabuzite, ni vanda. ²¹ Umose ahavalumbilila munkaya zyonti ukufuma kuluho ulwa vahali pe halumbililwe muma sinagogi usabata wonti.'' ²² Pe zihavoneha nyinza ku vapositili navasongo, poka nishivanza shonti ukuseva u Yudasi we akwitwa u Balasabasi nu Sila, ve vali valongozi va vamwavo, vahavatuma ku Antiyokiya nu Pavuli nu Balinaba. ²³ Ukusimbila nazye nyove zyavo, ''Ukutaliha kuvapositili na vasongo, na vamwinyu, navamwinyu ava panzi ava mu Antiyokiya, mu Siliya, na mu Siliya vakuvalamuha! ²⁴ Pakuti tuvivuye vamo avantu vafumile ukwepa kuliswe, ukusita lulajilo ukufuma kuliswe, vavapuvya imwe namazwi ge gagalula uvulanzi vwinyu, ²⁵ shali ahinza kuliswe, swe tufisile ku nsivo yoka, ukusala avanavuli na kuvatuma kukwinyu nava nkundwa vitu u Balinaba nu Pavuli, ²⁶ avantu ve nge vavutezizye uvulanzi vwavo pa zyizina lwa Mwene uYesu Chilisiti. ²⁷ Pe ishi tumutumile uYudasi nu Sila, vevankwinza ukuyanga kuliswe ivintu vyali vyoka mumazwi gavo. ²⁸ Ishi pe shali ahinza kwa mupepo umufinjile na kukwitu, ukusita kuvatwiha umuzigo umupiti ukulusya inyinza zinizi: ²⁹ ukuti imwe mwepushe ku vila vye mukuyipa ku vilungu, na mand, nivya kubuda, nizya luvembu, Nanti mungepuha kulizi, ziliva ahinza nkani izyi imwe. Nkuvanzila uvwinza.'' ³⁰ Pe avene, lwe vavashimbizya, ahaiha ahinza mu Antiyokiya; lwe valivunganisile ipuga poka, vahavalemeha ukalata. ³¹ Ishi avene lwe vavazizye, vahadovela pakuti vahavagomya. ³² Uyudasi nu Sila, ve vali vakuvwi, vahavagomya avamwavo na mazwi ge minji nu kuvapa amaha. ³³ Lwe vadiliye hamo ahavalilizyo pala, pe vahavatuma nu mutende ukufuma kuvamwavo ukuvala ku vala ve vavatumile avene. ³⁴ Nkandi ishi pe shali ahinza kwa Sila ukusyala pepala. ³⁵ Pe u Pavuli nu Balinaba vatendime mu Antiyokiya, vahasambilizyaga nukulumbilila ( poka navamwavo avinji) izwi ilya Mwene. ³⁶ Lwe gajenda gamo amasiku u Pavuli ahati kwa Balinaba, ''Nzaga ishi tugalushe tuvajendele avamwitu munkaya zyonti mwe twalumbiliye izwi ilya Mwene, nu kuvenya mwe vaveleye.'' ³⁷ Ubalinaba ahanzaga havili ukuti amusende u Yohani we ahitwa u Maliko. ³⁸ Nkandi uwene u Pavuli ahasiva ukuti zitali ahinza ukumusenda u Maliko, we avalesile avene mu Pamfiliya pe atahaje nawo nkani ku mbombo. ³⁹ Ishi pala pavusile uvusita lwivwano uvuhali, pe vahalehana woka nu wamwavo, u Balinaba ahamusenda u Maliko ahalovoha nawo ku Siyupulasi. ⁴⁰ Uwene u Pavuli ahamusala u Sila vahepa, ukufuma pala pe avamwavo vamulajizizye nizya vwila uvwa Mwene. ⁴¹ Pe avene vadumunsania mu Siliya na mu Silisiya, ukuvipa amaha ivivanza.