¹ Mwakalata uwakwanda nkakusimbila, Tiyofilo, we ayanjile zyonti zye uYesu atalisile ukuzivomba nu kuzisambilizya, ² ukufiha isiku lye anyamulilwe, lwe uwene avapiyed inkomelezyo ukwinzila mwa mupepo umufinjile avapositili ve avasevile. ³ Amayimba lye gasila, ahayilanjizya wuyo weka she mupuma kuli vavo nivyakumusimishizya inyinji. Ahavavoneshela avene amasiku 40, pe ahaziyanga izya shinamwene isha Mulungu. ⁴ Lwe avene vahomine poka nawo, uwene ahavahomeshezya ukuti vatahepe mu Yerusalemu, ukuti valindilile ululajizyo ulwa Tata, we uwene amuyanzile, ''Muhivwa kufuma kuline ⁵ ukuti u Yohani nalyoli ahozyaga na minzi, imwe mwandi mwinze mozelwe nu mupepo umufinjile mumasiku amansi.'' ⁶ Lwe vavungine poka vahamuvuzilizya, ''Mwene, hangava havalilo he wakwihazya uvumwene kuva Isilayeli?'' ⁷ Ahati kuvavo, ''Zitali kulimwe ukumanya utuvalilo twe Utataatavatisile nu vulamulili vwakwe. ⁸ Nkandi imwe muliposhela amaha lwe umupepo umufinjile afisile palimwe, pe muliva mwe vahome monti mu Yerusalemu namu Yudeya monti namu Samaliya, ukufiha kuvumalilo uvwansi.'' ⁹ Lwe uMwene uYesu ayanzile izi, pe lwe vakwenya kumwanya, uwene ahazuva, nivingo lihamuzyiha kuminso gavo. ¹⁰ Lwe avene vakwenya nulutontomelo kumwanya pe askujenda, vahivushila pe avanavuli vavili vimiliye papipi vazyaye ivizelu. ¹¹ Vahati, ''Mwe vantu vamu Galilayi, shoni she mwimiliye apa mukwenyelezya kumwanya? U Yesu uno we anyatulilwe kulimwe ukuvala kumwanya, she ali galuha vwevulo inza she mumuvonyi akujenda ukuvala kumwanya.'' ¹² Pe vahagalushila ku Yelusalemu ukufuma pi gamba lye vakuti lyamavula, lye lilikupipi nu Yerusalemu, vwalimile vulendo vwakujenda usabata woka. ¹³ Lwe vafisile vahakwela ukuvala pavuzilo uvwa pamwanya, kwe vahihalaga. Pali u Peteli, u Yohani, u Andireya, u Filipu, U tomasi, u Batolomeyo, u Yakovo umwana wa alufeyo, u Simoni umuzeloti, nu Yuda umwana wa Yakovo. ¹⁴ Vonti vayipiye ku shintu shoka pakuputa, poka navantanda, nu Maliya umama wa Yesu, navamwavo. ¹⁵ Mumasiku gegala u Peteli ayimiliye pakasi pa vamwavo, ukuyana namazina 120, pe ahati, ¹⁶ ''Vamwitu, shamile ahinza ukuti amasimbo gafishile, zila zye umupepo umufinjile aziyanzile mwilomo ilya Daveti izya yudasi, we avalongozizye vala ve vahamulemaga uYesu. ¹⁷ She ali woka uwiswe pe ahaposhela ishigavo mumbombo yinino.'' ¹⁸ ( Ishi umuntu uno ahakala umugunda muvukavi vwe aposheleye kujendela muvutala malandu, pe ahagwila itwe, numuvili wakwe wuhapunta pavuzelu, namavula gakwe gonti gahitishila pansi. ¹⁹ Vonti vala vevahihalaga mu Yerusalemu vahazyivwa izi, pe vahitizya umugunda wula munjango yavo ''Akelidama, ''Kwekuti, ''Umugunda uwivanda.'') ²⁰ ''She lisimbilwe mwa kalata uwa Masalimu, 'Leha umugunda wakwe wuve payo, mutahamwitishizyaje umuntu nawumo ukwihala kuko'; 'Pe mumwitishizye wumo asende imbombo yakwe iya vulongozi.'' ²¹ Hinza, pizyo, woka umuntu we ali poka niswe ahavalilohonti Umwene u Yesu ukwinjila nukufuma pakasi papitu, ²² ukwandila pa lozyo ulwa Yohani ukufiha isiku lye anyatuliwe ukwepa kuliswe, lihava wuhome poka niswe izya kuzyuha kwakwe.'' ²³ Pe vahavaviha kuntanzi avanavuli vavili, u Yosefu wakwitwa u Balabasi, we vamwisite u Yusitasi, nu matiyasi. ²⁴ Vahayiputa vahati, ''We, Mwene, ugamanyile amoyo ga vantu ava vonti, tuvumbulile ku vavili ava woka we umusevile, ²⁵ ukuti asende uvuzilo mumbombo ino niya vupositili vwe u Yuda ahepuha nu kuvala kuvuzilo uvwakwe.'' ²⁶ Pe vahiliha ishili isha vavo, pe ishili shihamugwila u matiyasi, pe vahamuvazizya nava Positili 11.