¹ Lwe isiku lya pentekositi lyinzile, vonti vali poka muvuzilo vwoka. ² umwakugandushizya kuhinza ukufuma kumwanya ukulila ngati kujenda kwa nkungu ya maha, pe yihakwila munyumba yonti mwe vihaye. ³ Pe zihaloleha kuli vavo indimi fwe ngati moto we wuhakwila, pa wonti muli vavo. ⁴ Vonti vahizuliwa numupepo umufinjile nu kwanda ukuputa mundimi izinji, she umupepo wuhavitishizya. ⁵ Kwamile ava Yuda ve vahatendamaga mu Yelusalemu, avanyila Mulungu, kufuma munsi zyonti izya muntende mumwanya. ⁶ Lwe ishongo shivwisile, ipuga lihavungana pe vayuvine poa mulandu ali wonti ahavivwaga vakuyanga munjango yavo. ⁷ vahazunguha nu kutentwa; vahati, ''Nalyoli, tevevano ve vakuyangaga ishi Galililyani? ⁸ Shoni she iswe swenti tukuvivwa zye vakuyanga munjango zye twapafilwe nazyo? ⁹ Ava pantiyanisi nava Medi na elamiyiti, navala ve vakutendama Mumesopotamiya, nava Yudeya nava kapadokiya, nava pontusi nava Asiya. ¹⁰ Nava Filigiya nava Pamfuliya, nava Igiputi navanji mumbazu zya Libya zye zipalamine nu Kileni, navajeni ukufuma ku Roma, ¹¹ Ava Yuda nave vinjiye ishi Yuda, ava Kiletanisi nava Alabusi, tukuvivwa zye vakuyanga munjanjango zyitu vakumutima umulungu kumbombo zyakwe impiti.'' ¹² Pe vahasukumila nkani nu kusaga; vahavuzilizania vahati, ''Ishi she shoni?'' ¹³ Ilelo vamo munumo vahataliha ukuvajevula pe vahati, ''Iva vahozilwen ipele.'' ¹⁴ Nkandi u Peteli ahimilila poka navala 11, ahataliha kuvaholela kwizwi ipiti, pe ahati kuvavo, ''Mwe vantu vamu Yudeya navonti ve vakutendama mu Yelusalemu, pe izi zimanyikwe kulimwe; mutejelezye amazwi gane. ¹⁵ Avene avantu ava vatahozilwe inga she mukusiva, she iha havalilo havutatu uvwisiku. ¹⁶ Ukwene izi zye aziyanzile umukuvwi u Yoweli: ¹⁷ kumasiku agakumpelela; Umulungu akuyanga, 'Ndipungulila umupepo wane kuvwinji. Avana vinyu avanavuli navalindu vali kuvwaga, Ava vinyu valiyenyaga injozi, pe vope avasongo vinyu valilotaga ivilota. ¹⁸ Pe namwe muvavomvi vane ava navuli nave vavomvi avantanda mumasiku ago ndipungulila umupepo wane, pe avene valikuvwa. ¹⁹ Pe ndilanjizyaga amafindango kumwanya ni vivonesyo munsi ya pansi, ivanda, numoto nu kusuha ukwilyosi. ²⁰ Izuva liligalunkana ukuva shisi, nu mwezi wuliva mushemamu inza mavanda izyo zyonti zililoleha lwe uvushindamu uvwa Mwene vushili kuloleha pisiku lila ipiti ilya kwinzya u Mwene. ²¹ Ziliva kuvala ve vakupunda mwizina lya Mwene ve valipokwa.' ²² Mwe vanavuli vamu Isilayeli, mwivwe amazwi aga: u Yesu wamu Nazaleti muntu we uMulungu avalolesizye ukuti akuvomba ivisukumizyo namafindango nivivonesho vye uMulungu ahavombaga mumwakwe pazyinyu, she nimwe mweka muzimanyile. ²³ Inza she uMulungu amanyile nukusivilila ukuvomba ukufuma hali; pe nimwe, ukwinzila munyove izya vutalamalandu, muhamugoga pakumuhomela pashihovenkanio. ²⁴ Ilelo uMulungu ahamuzusya, ahamusatula mumayimba agavufwe, mulandu zitamuhondeye wuyo kumwaga. ²⁵ She u Davidi ayanzile nizyakwe, 'Nkamwenya u Mwene shima pilongolela lyane, she pe ali kunyove yane iya ndilo kulizyo ntakogopa. ²⁶ Pe ilelo umuyo wane wuhahovoha nalwe lulimi lope luhaseshela. havili, umuvili wane wuliva nu lusuvilo. ²⁷ Mwe tepe uhandeshe kuvuzimu posye ukwitiha ukuti umuvili wane wufishe kuvola, ine ne mufinjile waho. ²⁸ Undanzile ine amadala aga vulanzi; ulimpa uluseshelo ulupiti nkani mwe indi poka niwe. ²⁹ Vamwitu, ntangavazyiha ukuti utata witu u Davidi afuye nukusilwa, imbipa yakwe yili panapa ukufiha ilelo. ³⁰ Ilelo, she amile mukuvwi pe amanyile ukuti uMulungu alifilke kulufingwi ukuti aliyimiha ishihomwa isha muvili wakwe muvu Mwene vwakwe. ³¹ Azivwenyi zye zili vombwa kuntanzi pe ahayanga izya kuzyuha ukwa Chilisiti, we atamulesile kuvuzimu posye ukwitiha ukuti umuvili wakwe wufishe kuvola. ³² U Yesu wununo- uMulungu amuzusizye, she swenti swe vahome. ³³ Ilelo, she amupiye uvushindamu kunyove ya ndyelo iya Mulungu nu kumuposhela ululajizyo ulwa mupepo umufinjoile ukufuma kwa tata, we ahitila wenewo she mwashenya nu kwivwa. ³⁴ She u Davedi atazuvile kumwanya, ilelo uwene ayanzile, 'Umwene ahati kwa Mwene wane, ''Yihala kuluvazu lyane ulya ndilo ³⁵ ukufishila pe navaviha avalugu vaho pansi pavinama vwaho.'''' ³⁶ Ilelo, ava Isilayeli vonti vamanye ukuti uMulungu amuvisile ukuva wu Mwene havili wu Chilisiti, uYesu wununo we muhamuhomela.'' ³⁷ Ilelo lwe vivuye zinizi, zihavalasa nkani mumoyo gavo. pe vahati kwa Peteli poka na kuvas positili,"vamwitu, pe ishi tuhonzye vuli? ³⁸ Pe u Peteli ahavamula ahati, mwe mupindushe nu kozelwa mwizina ilya yesu chilisiti inga mutetelwe imbivi zyinyu nukuposhela ishikunjilwa isha mupepo umufinjile. ³⁹ She ulifingwi kuli mwe na kuvana vinyu na kuvala avakuvutali, kwe kuti kuvala vonti ve umwene uMulungu alivita." ⁴⁰ Kumazwi ge minji ahajendelela ukuvahomeshezya nu kuvashindiha vavo, ahati, imwe muyiposhe ku vuvivvi uvwa nkulo yinino. ⁴¹ Pe vala ve vaposheleye amazwi gakwe nuluseshelo vahozelwa, isiku lila vahonjelaav avantu ve vafiswiye 3000 ishi. ⁴² Lwe vakusambilizya izwi ku vala ve vitisile uvupoka uvwa vapositili nuvulilani, vahamensulaga ikati nukulya poka. ⁴³ Pe ishitetemwi shihavagwila vonti, pe ivisukumizyo ivyinji nivilolesyo vikuvombeha na va positili. ⁴⁴ Vonti ve vamwitisile vali poka havili vali ni vintu ivyakuholana. ⁴⁵ Vahakazyaga ivintu vye vali navyo navyakulonka nukuvigavanya ukuyana na mwe vasovelilwe. ⁴⁶ Vahavunganaga pa tempeli insiku zyonti.havili vahamensulaga amakati mu nyumba zyavo, nukugavana ishakulya poka nu moyo umwinza nu luseshelo, ⁴⁷ Pevahamutimaga uMulungu nukuvahondezya avantu vonti, uwene ahonjezyaga insiku zyonti ku shivanza vala ve vapinduha.