¹ Ilelo, mwe pe u Chilisiti ahayimvilwa mu muvili, muyinyamizye mwemwe mweka ninsivo ye yihaline. She uno we akuyimvilwa umuvilinwe aleheni nu vutalamalandu. ² Ishi zye zikulandata, umuntu wewula, she muhavalilizyo hakwe honti ali mumuvili, pe utahatendamaje ukuyanana nasdhe avantu vakwanza, nkandi ukuyana nu kwanza ukwa Mulungu. ³ She ahavalilizyo he hajenzite bhakwiliye kuli imwe ukuvomba ukwanza ukwa vantu ava panzi, ukutendama mu vumalaya, nukulandata impapilo imbivi, nu vwashing'wela, nukuva nukuseshelela ukwa kuholwa, ukuva nuluseshelo ulwa kunzi, nu vuvombezi vwa Mulungu vwe mwiho nzila. ⁴ Avene vakusiva ishi ukuva shijeni ukuti imwe mutakuyisanzya navo mulizi izya kwizula ukwa havele ahavivi, pe vakuvayanjila imwe imbivi. ⁵ Avene valitwala imbombo zyavo pilongolela ilya wula we ayisenginie pakulonga avalanzi na vafwe. ⁶ Ye nongwa ino ipangwi ilyinza lihalumbiliwa na kuvafwe vulo, kwe kuti, nashe avene valonzilwe mumuvili pakuva vantu, avene vangava valanzi mumupepo kwidala lye uMulungu angalivomba. ⁷ Uvumalilo uvwa vyonti vupalamiye. Ishi lelo ulungamane munsivo, havili uvanje we wakuteshela lwe ukusivilila pamulandu uwa mputo. ⁸ Ipiti ku zyonti, mukundanaje kumoyo wonti woka, nu wamwavo, she ishikunzi shikuzijila impuga ilya vutalamalandu. ⁹ Muposhelelaje woka nu wamwavo shisita kukwinkwina. ¹⁰ Inza she woka uwa imwe aposheleye ishikunjilwa, ashivombezye shenesho ukuvapoha woka nu wamwavo inza vasunzi avinza ava mu vwila uvwa Mulungu muhavele ahakulehana lehana. ¹¹ Inga wumo akuyanga, pe izyene zivanje mu mazwi aga Mulungu. Nanti wumo akupoha, pe izyene zivanje zya kufuma mu maha ge uMulungu akufumya. Vomba ivintu vinivi vwrevulo kwe kuti mu madala gonti uMulungu we ashindamaje mwe mwa Yesu Chilisiti. She zive kwa Yesu Chilisiti uvushindamu nu vulamulili shima na shima. ameni. ¹² Vankundwa, mutahenyaje ngati shijeni ukulingwa mu moto zye zivomvilwe kulimwe, ngati shintu shimo ishijeni shikuvombwa kulimwe. ¹³ Muvuzilo vwakwe, nashe iwe ungagamanyinsania ahinza amayimba aga Chilisiti, seshelaga, kwe kuti iwe uhaseshela havili nukuhovoha lwe uvushindamu vwakwe vukuvumbukwa. ¹⁴ Inga mukulingwa mwe mwizina lya Chilisiti, pe mulositwe, mwe pe umupepo uwavushindamu nu mupepo uwa Mulungu we azkutuzya pali mwe. ¹⁵ Nkandi nawumo uwimwe ayimbe ngati we akugoga, umwiva, umuvomba mbivi, pamo umuluma luma. ¹⁶ Nkandi wumo inga akuyimba ku zya kuva mu Chilisiti, uwene atahapeziwaje insonin, muvuzilo vwakwe, amushindihaje uMulungu nizina lyelila. ¹⁷ She iha havalilizyo ahakutaliha ukwa vulonzi ukwandila muva munyumba iyaq Mulungu. Inga shingatalishila ku kwitu, pe ishi ziliva vuli ku vala ve vatakwivwila ipangwi ilyinza ilya Mulungu? ¹⁸ Pe ''Inga shigomu ku vagolosu pakupokwa, pe ziliva vuli kuve vakumuhana uMulungu na vatalamalandu?'' ¹⁹ Pelelo avene ve vakuyimba kuzya lukasamo ulwa Mulungu vagavishe amoyongavo kwa mupeli umusuvalilwa umwakuvomba inyinza.