¹ Ishi lelo, muvuvishe kuluvazu uvuvivi vonti, nilenga, nishifumbo, nuvuzuva na zyonti imbivi izyakuziyanga. ² Ngati twana utwabonda, musambaje lye lisusu ilya mwa mupepo, kwekuti ukujendela muli lilyo imwe mukule muvupokwa, ³ inga mumuyezizye ukuti uMwene ali nuvwila. ⁴ Nzaji kukwane wuyo we livwe ilya vulanzi lye avantu valihana, nkandi ilyene lye lyasevilwe nu Mulungu ukuva lya mutengo ku kwakwe. ⁵ Nimwe vulo muholine namavwe agavulanzi gegazenzilwe ukuva nyumba imfinjile nimwe muve mwe vaputi avafinjile ve vakufumya imputile imfinjileye yikwitishilwa nu Mulungu mwa Yesu Chilisiti. ⁶ Amasimbo gali nizi mumo: ''Yenya, ine naliviha muziyoni ivwe lya panguto, lisevwa na lya mutengo nkani. Uno we akusuvila muli wuyo atalipeziwa insoni.'' ⁷ Pe umutengo lelo, kuli imwe mwe mukumwitiha. Nkandi ku vala ve v atakwitiuha, ''Ivwe lye avazenzi valihanile, lye lyava livwe ipiti ilya pa nguto,'' ⁸ havili, ''Ivwe ilya kupunula liyalavwe lye likuvagwisya avene.'' Avene vakupunula mwe pe vatakulyivwila izwi- ishene she avene vasevilwe ukuti vavombaje. ⁹ Nkandi imwe mwe vantu avasevwa, umuputi uwashimwemwe, ninsi imfinjile, vantu ukuva shuma isha Mulungu ukuti mukumusye imbombo zyakwe izya kusukumizya izya wula we ahavita imwe ukufuma kushisi ukuvinjizya muvuzilu mwakwe uvwakusukumizya . ¹⁰ Imwe mutamile mwe vantu, nkandi ishi mwe vantu ava Mulungu. Mutaposheleye uvwila uvwa Mulungu, ishi ilelo muposheleye. ¹¹ Mwe vankundwa, nkuvakwezya imwe mwe vajeni havili mwe vakungwa mwepushe ku vinyonywa ivya muvili, vye vukulyana na moyo ginyu. ¹² Inkalo yinyu pakasi pa vakunzi vuvanje vwa kushindikwa, vakuvayanga ukuti mwe vavomba mbivi, vazyenyaje imbombo zyinyu inyinza inga mumutume uMulungu pisiku lye alivoneshela. ¹³ Muve mwe vakwivwila kuvalamulili vwonti uvwa muntu pa shifukwa sha Mwene. Muvivwilaje vonti avamwene pakuti vapiti, ¹⁴ havili nakuvalongozi, ve vatumilwe kwisunde ilya vavomba mbivi pe nukuvatima vala ve vakuvomba inyinza. ¹⁵ She uku kwe kwanza ukwa Mulungu, mukasi mukuvomba inyinza mukuyipumilizya injango insita kumanya iya vantu avapukupuku. ¹⁶ Inza she vantu avasatushe, mutahavombaje uvusatushe ukuva shakugwinchila uvutalamalandu, nkandi muholane navavomvi ava Mulungu. ¹⁷ Muvashindihaje avantu vonti. Muvakundaje avamwinyu. Munyile uMulungu. Vashindishe ava mwene. ¹⁸ Vavomvi, muve mwe vakwivwila ku vapiti vinyu nu mushinzi wonti. Muve mwe vakwivwila te kunyinza zyeka nukuva mwe vatonsu nkani, nkandi nakwe kuvahali. ¹⁹ She ishi sha kusalifya inga, mwe pe uwene we amumanyile uMulungu, umuntu akujimbilila muvilima lwe akuyimba muvusita vugolosu. ²⁰ Ishi pe vilipwa vuli vye vilipapo inga ukuvomba imbivi nukuti mujimbaje lwe mukuyimvilwa? Nkandi inga muvomvile inyinza pe ishi mukuyimba lwe muli mwisunde, izi zye ntimo zye zihondeye ukufuma kwa Mulungu. ²¹ She ishi shili kulizi ukuti imwe muhitwa, mwe pe uYesu wope ahavayimbila imwe. Uwene ahavaleshela ishiholanio ukuti mulandate inyayo zyakwe. ²² ''Uwene atahatala nalumo imbivi, navwe vuluma ilenga vutahajikwa nalumo mwilomo lyakwe.'' ²³ Ilelo lwe akulingwa, uwene atahavagalushizya indigo. We akuyivwila, atahavogofyaga, nkandi uwene ayivisile weka kwa wula we akulongaga uvwanalyoli. ²⁴ Uwene wuyo weka ahanyamula uvutalamalandu vwitu mu muvili wakwe pikwi kwe kuti tuve ukutali nu vutalamalandu nukuti twihalaje muvugolosu. Mwe muvilonda vyakwe mwe muhapolela. ²⁵ Mwenti imwe muhatendamaga ngati ng'onzi zye zisoveleye, nkandi ishi mwagalushila ku mudimi we akwenyelezya imizimu ginyu.