¹ U Peteli, umupositili wa Yesu Chilisiti, ku vajeni ve vasasite, ve vasevilwe monti mu Pontusi, Galatiya, Kapadokiya, Asiya, nu Betaniya. ² Izi zye zyezila zye uMulungu uTata azimanyile nzila, ukujendela mumbombo yakuzyelefuwa mwa mupepo, ukwivwila nu kunyansiwa kwi vanda lya Yesu chilisiti uvwila vuve kukwinyu, numutende winyu wuvulaje. ³ Umulungu nu Tata wa Mwene witu uYesu Chilisiti vatimwaje! ukuvula kwa vwaila vwakwe, we atupiye iswe ukupapiwa ukupya nu vwihazi uvwa lusuvilo ukujendela mukuzyuha kwa Yesu Chilisiti ukufuma kuvafwe. ⁴ Uvu vwe vupwano vwe vutalisila, vutalinyaziwa nukukulupa. Shisenguliwe kumwanya ishinyu. ⁵ Muzijililwe namaha ga Mulungu ukujendela mulwitiho lwakupokwa vwe vuyananiziwe ukuvumbuliwa mutuvalilo twakumpelela. ⁶ Muhovosile nkani shizi, pe zingava zya kuhondela kwimwe ukuswilimana kundingo inyinji izya kulehana lehana. ⁷ Izi zye zyakulusimishizya ulwitiho lwinyu, she izi zye zilusizye uvushindamu va golide we akulova, nape inga apamiwe nu moto. Izi zikuvombwa ukuti ulwitiho lwinyu lyajikwaje ukuti lulete intimo, nuvushindamu, numushinzi lwe akuvumbukwa uYesu Chilisiti. ⁸ Utamwenyizye, loli umuganile. Utakumwenya nishi, loli ukusuvila mumwakwe nukuseshela nuluseshelo lwe utangalulingania nukwizula nuvushindamu. ⁹ Pe ishi, ukuposhela wewe weka ukufuma mulwitiho lwaho. Vwe vupokwa vwa mizimu yinyu. ¹⁰ Ukuyana nukupokwa uvu, avakuvwi ve vahakuvwa ukuyana nuvwila vwe vwamile vwakwinza kwimwe, vahakulondola ninjele nu kuvupima nulusajilo, ¹¹ nukuvuzilizya kwe kumuntu vuli pamo havalilo vuli ahamupepo uwa Chilisiti muzizyo zihavoneshaga lwe asimishizizye nzila ukuyana nukuyimvilwa kwa Chilisiti nuvushindamu vwe inti vulandate. ¹² Zihavumbukwa kuvavo ukuti vatahayivombelaga vavo veka, loli imwe, lwe vakuyanga ivintu vye vivuziwe kukwinyu muvala ve vavalumbiliye izwi kwimwe mwa mupepo umufinjile we ahatumwa ukufuma kumwanya- ivintu vye avahavizya vakvisamba ukuvyenya. ¹³ Pe mupinye amalamba ga nsivo zyinyu. Muteshelele. Muvishe ulusuvilo lwinyu nkani pa vwila vwe vuliletwa kukwinyu pe uYesu Chilisiti avumbukwa. ¹⁴ Ukuvala mwe vana va lwivwilo, mutayanduye mwemwe mweka kumpapilo zye muhalandataga lwe mutahazyaganiaga. ¹⁵ Inza she we avisite imwe mufinjile, nimwe, vulo, muve mwe vafinjile munkalo zyinyu zyonti. ¹⁶ Pakuti zisimbiwe, ''Muve mwe vafinjile, shifukwa ne mufinjile.'' ¹⁷ Inga mukwitizya ''tata'' we wuyo we akulonga ukuyana nukujendela mumbombo zya muntu, ukujendela mutuvalilo utwavulendo vwinyu muvugolosu. ¹⁸ Mukumanya ukuti te wu siliva uwakuvola pamo ugolide ukuva we avawomboye ukufuma kutuvele twinyu utuvozu twe muhamanyila ukufuma kuva Tata vinyu. ¹⁹ Muvuyo vwakwe, mukomboliwe nivanda lya pamwanya ilya Kilisitu, we amile ngati hang'onzi he hatali nahalema nanti hamo nahavamba nanti hamo. ²⁰ U Chilisiti amanyikilwe lwe ninsi yishili ukwalwa, ishi pe avumbukwa kwimwe mutuvumalilo twa vumalilo. ²¹ Ukujendela muwuyo mukusuvila mwa Mulungu, we ahamuzusya ukufuma kuvafwe nukumupa uvushindamu. Pe ulwitiho lwinyu nu lusuvilo luli mwa Mulungu. ²² Mukugapela amazimu ginyu amazelu pa kwivwila uvwanalyoli. Ishi shali shamfundo yamwa namuntu mulugano; pe muganane nkani ukufuma mumonyo. vimo ivya kewanzikwa nivwahali ivwa giliki vye vahenyezya lwe vakuvazya, mukuyiperla imizimu yinyu mizelu pakwivwila uvwanalyoli ukujendela mwa mupepo. ²³ Mupafilwe havili, te mwemumbeyu iyakulova, loli ukufuma kumbeyu ye yitakulova ukujendela mwizyi lya Mulungu ilanzi lye litaliyepa. ²⁴ She, ''Amavili gonti gali ngati lisole, nuvushindamu vwakwe vuli ngati vwezya uvwa mwisole. Isole likumila, nuvwezya vukulagala. ²⁵ Loli izwi lya Mwene lilivapo shima.'' Ili lye lizwi lye lihalumbiliwa kukwinyu.