¹ ای پادشاه، ای می خدا، ترَه مُتعال دَخأنم و تا اَبد گویم کی تی نام متبارکه. ² هر روز ترَه پرستش کونم و تا اَبدالآباد تی نامَ ستایش کونم. ³ خداوند بی نهایت عظیمه و شایسته یه کی اونَ پرستش بوکونیم، اونِ عظمتَ اَمَأن انسانان نِتَأنیم درک بوکونیم. ⁴ زمینِ مردمان نسل در نسل تی اعمالَ ستایش کوند و تی کارایِ عظیمِ جَه تعریف کوند. ⁵ اوشَأن دربارۀ تی عظمت و شکوه، و دربارۀ تی عجیبِ کاران گب زند. ⁶ مردم تی کارایِ عجیبِ جَه گب زند، و من تی عظمتِ جَه تعریف کونم. ⁷ اوشَأن تی مهربانیانِ حکایتَ تعریف کوند و من تی عدالتِ جَه گب زنم. ⁸ خداوند بخشنده و مهربانه، اون دِئر عصبانی بِهه و پور جی مُحبته. ⁹ اون همه تَه مرَه مهربانه و، همۀ خو مخلوقاتَ محبت دَأره. ¹⁰ ای خداوند، همۀ تی مخلوقات ترَه ستایش کوند و، همۀ تی مؤمنین ترَه شُکر کوند. ¹¹ اوشَأن تی ملکوتِ جلالِ جَه گب زند و تی قدرتَ نقل کوند. ¹² تا همۀ مردمَ تی کارایِ عظیمِ جَه خبردارَ کوند و تی پادشاهی جلالَ همه تَه رِه بوگوید. ¹³ تی ملکوت جاودانیه، تی سلطنت همیشه باقیه و تومأمَ نیبه.