¹ خداوندَ شُکر بوکونید، چره کی اون مهربانه و اونِ رحمت تا اَبدالآباد. ² بنی اسرائیل بوگوید: اونِ رحمت اَبدیه. ³ هارونِ خاندان بوگوید: اونِ رحمت اَبدیه. ⁴ خداترس مردمان بوگوید: اونِ رحمت اَبدیه. ⁵ پریشانی موقع خداوندِ حضور دوعا بوکودم، اون می داد فَأرسه و مرَه نجات بدَه. ⁶ خداوند می اَمرَه یه، پس نترسم. انسان مرَه چی تَأنه بوکونه؟ ⁷ خداوند می کنار ایسَه و می یاوره، پس می دوشمنانِ شکستَ می چومِ اَمرَه دینم. ⁸ خداوندَ توکل دَأشتن بهتره جی انسانَ اُمید دوَستن. ⁹ خداوندَ توکل دَأشتن بهتره جی رهبرانَ اُمید دوَستن. ¹⁰ هر چند همۀ جهانِ اُمتان مرَه دؤرَ کوده دَأرد، ولی خدا یاری اَمرَه همه تَه یَ هلاکَ کونم. ¹¹ اوشَأن جی هر طرف مرَه دؤرَه کودد، ولی خدا یاری اَمرَه همه تَه یَ هلاکَ کونم. ¹² زنبورِ مَأنستَأن می دورَ بیگیفتد، ولی کولوشِ آتشِ مَأنستَأن زود خاموشَ بوستد، چره کی خداوندِ نامِ اَمرَه همه تَه ی جی میَأن بوبوردم. ¹³ مرَه فوتورکستد کی بکفم، ولی خداوند مرَه یاری بوکود. ¹⁴ خداوند می قوّت و می سرود و می نجات دهنده یه. ¹⁵ عادلانِ خیمه یانِ جَه پیروزی و نجاتِ آواز به گوش رسه کی گوید: خداوندِ راست دس شجاعتَ اَمرَه عمل کونه، ¹⁶ خداوندِ راستِ دس متعاله، خداوندِ راست دس شجاعتَ اَمرَه عمل کونه. ¹⁷ من نیمیرم، بلکی زنده مَأنم و خداوندِ کارانَ همه تَه رِه تعریف کونم. ¹⁸ خداوند مرَه سخت تنبیه بوکود، ولی وَأنَأشت بیمیرم. ¹⁹ پیلدانه معبدِ دروازه یانَ مرِه بازَه کونید تا اویَ بودورون بوشوم و خداوندَ ستایش بوکونم. ²⁰ اَ خداوندِ دروازه یه، کی عادلان اونَ بودورون شُد. ²¹ ترَه شُکر کونم کی مرَه اجابت بوکودی و می نجاتَ باعث بوبُستی. ²² سنگی یَ کی معماران ردَ کودد، هَسَه اون ساختمانِ مهمترین سنگ بوبُسته. ²³ اَ کار خدا کاره، ولی اَمی نظرِ جَه عجیبه. ²⁴ اَن روزی ایسه کی خداوند چَأکوده، اون روزِ دورون جشن بیگیرم و شادی بوکونیم. ²⁵ آه ای خداوند، اَمرَه نجات بدن، ای خداوند اَمرَه سعادت عطا بوکون.