¹ چند وخت بعد عیسی دریاچۀ طبریه ورجَه ایبارِ دیگر خورَه شاگردانَ ظاهرَ کود. اونِ ظاهر بوستَن اَطو اتفاق دکفت: ² شمعونِ پطرس و تومایِ معروف به دوقولو و نَتَنائیل کی قانایِ جلیلِ شین بو و زِبِدی دو تَه پسرَأن و دو تَه دیگر جی شاگردان اویَ جمع بود. ³ شمعونِ پطرس اوشَأنَ بوگوفت:«شؤم تا ماهی بیگیرم» اوشَأن اونَ بوگوفتد:«اَمَأنم تی اَمرَه اَئیم» اوشَأن راه دکفتد و ایتَه قایقَ سوارَ بوستد، او شبِ رِه هیچی نیگیفتد. ⁴ صبحِ زود بیدد اینفر ساحلِ میَأن بپا ایسَه، ولی شاگردان اونَ نشناختد. ⁵ عیسی اوشَأنَ بوگوفت:«زَأکأنْ، چیزی خوردَأنِ رِه دَأرید؟ اونَ جواب بدَأد:«نه» ⁶ عیسی اوشَأنَ بوگوفت:«دامَ تَأوَأدید قایقِ راستِ طرف، اویَ تَأنید ماهی بیگیرید» اوشَأنم هَ کارَ بوکودد و اَقدر ماهی بیگیفتد کی نتَأنستد دامَ فأکشد قایقِ دورون. ⁷ بعدْ اون شاگردی کی عیسی اونَ دوس دَأشته پطرسَ بوگوفت:«اون خداونده» وختی شمعونِ پطرس اَ حرفَ بیشتَأوست، چون لُخت بو، خو رختَ خو دور بیپیچَأنی و بپرست آبِ دورون و تا ساحل شِنا بوکود. ⁸ باقی شاگردان قایقِ میَأن بِئسَأد و دامِ پور جی ماهی یَ خوشَأنِ اَمرَه فأکشد تا ساحل، چون ساحلْ دور نوبو و قایق حدودِ صد متر خوشکی مرَه فاصله دَأشته. ⁹ وختی فأرسد ساحلَ بیدد آتش روشنه و ماهی اونِ رو نَهَه و نان هم نَهه. ¹⁰ عیسی اوشَأنَ بوگوفت:«ماهی یانی کی تازه بیگفته ایدِ جَه، چن تَه بأورید» ¹¹ پطرس بوشو و دامَ فأکشِه خوشکی رو و ماهیانَ بیشمارد، صد و پنجاه سه تَه پیلدانه ماهی بو، با اَنکی اَن همه ماهی بیگیفته بود، ولی دامْ پارَه نوبوسته بو. ¹² عیسی اوشَأنَ بوگوفت:«بأئید صبحانه بوخورید» ولی هیچکس جرأت نوکود اونِ جَه وَأورسه:«تو کیسی؟» چون دَأنستد کی خداونده. ¹³ اونموقع عیسی بأمو نانَ بیگیفت و فأدَه اوشَأنَ و ماهی هم هَطو. ¹⁴ و اَن سومین بار بو کی عیسی بعدِ اَنکی مُرده یانِ جَه زنده بوسته بو، خورَه شاگردانَ ظاهرَ کود. ¹⁵ بعدِ غذا خوردَن، عیسی شمعونِ پطرسَ بوگوفت:«ای شمعون، یونا پسر، آیا ویشتر جی اَشَأنْ مرَه دوس دَأری؟» پطرس جواب بدَه:«بله ای خداوند، تو دَأنی کی ترَه دوس دَأرم» عیسی بوگوفت:«پس می برّه یانَ خوراک بدن» ¹⁶ بارِ دوم اونَ بوگوفت:«ای شمعون، یونا پسر، آیا مرَه دوس دَأری؟» پطرس بوگوفت:«بله ای خداوند، تو دَأنی کی ترَه دوس دَأرم» عیسی اونَ بوگوفت:«پس می گوسفندانِ مواظب بوبون» ¹⁷ عیسی، سومین بارِ رِه اونَ بوگوفت:«ای شمعون، یونا پسر، مرَه دوس دَأری؟» پطرس ناراحتَ بوست، چون سومین بارِ رِه اونِ جَه وَأورسه ئه کی؛ مرَه دوس دَأری؟ پطرس عیسی یَ جواب بدَه:«خداوندا، تو همه چیزَ دَأنی، تو خودت دَأنی کی ترَه دوس دَأرم» عیسی اونَ بوگوفت:«می گوسفندانَ خوراک بدن. ¹⁸ یقین بدَأن وختی جوان بوئی، تی کمرَ دَوَستی و هر جا کی خَأستی شوئی، ولی زمانی کی پیرَ بی تی دسانَ درازَ کونی و دیگران ترَه دَوَدد و جایی بورد کی نَخأیی» ¹⁹ عیسی اَ حرفِ مرَه پطرسِ مرگَ اشاره بوکود و جوری کی وَأستی بیمیره و خدایَ جلال بده، و بعدْ پطرسَ بوگوفت:«می دونبال بیأ» ²⁰ پطرس وَأگردست و بیده اون شاگردی کی عیسی اونَ دوس دَأشته اوشأنِ دونبال اَمون دره، اون شاگرد هون کسی بو کی شامِ وخت عیسی شانه یَ تکیه بزَه بو و اونِ جَه وَأورسه بو:«خداوندا، کیسه کی ترَه تسلیم کونه؟» ²¹ وختی پطرس اونَ بیده، عیسی جَه وَأورسه:«خداوندا، پس اونِ عاقبت چی بِه؟» ²² عیسی اونَ بوگوفت:«اگر بخَأیم تا می وَأگردستأن اون بِئسه، ترَه چی مربوط؟ تو می دونبال بیأ» ²³ عیسی اَ حرفِ وَسی، برأرأنِ میَأن شایع بوبُست کی اون شاگرد نیمیره، در حالی کی عیسی نوگوفت اون نیمیره، بلکی بوگوفت:«اگر بخَأیم تا می وَأگردستن اون بِئسه، ترَه چی مربوط؟» ²⁴ هون شاگرده کی اَ چیزانَ بینیویشت و شهادت دِهِه کی همه اَشَأنْ حقیقت دَأره، و اَمَأن دَأنیم که اونِ شهادت راسته. ²⁵ عیسی کارهایِ زیادِ دیگری هم بوکودْ کی اگر همۀ اوشَأنْ ایتَه ایتَه بینیویشته بیبه، گومان نوکونم حتی همۀ دونیا همْ اون کیتابانِ رِه جا بدَأره.