¹ و شائول کسی بو کی اِستیفانِ کوشتَنِ مرَه موافق بو. و هو روزِ دورون شروع بوکودد کلیسایِ اورشلیمِ اَعضایَ اَذیت و آزار کودَأن، جوری کی همۀ ایمانداران پراکندَه بوستد مناطقِ یهودیه و سامِرِه، فقط رسولان اورشلیمِ میَأن بِئسَأد. ² و ایتَه جرگه جی آدمای دوروستکار اِستیفانِ جنازه یَ دفنَ کودد و اونِ رِه ایتَه پیله مراسمِ عزاداری بیگیفتد. ³ ولی شائول تقلا کوده کی هر جور بوبُسته کلیسایَ جی میان بوبوره و خانه به خانه گردسته و زنَأکان و مردَأکانَ بیرون فَأکشِه یِه و تَأوَأدَه ئِه زندان. ⁴ و اوشَأنی کی پراکندَه بوستِه بود هر جا کی شوده خدا کلامَ بشارت دَأئِد. ⁵ فیلیپُس هم به ایتِه جی شهرهای سامره بوشو و مسیح نامَ اویَ موعظه بوکود. ⁶ و اویِ مردم وختی مُعجزاتی کی فیلیپُس انجام دَأئِه یَ بیدد، همه تَه اِشتیاقِ اَمرَه اونِ گبانَ گوش بوکودد. ⁷ ارواحِ ناپاک فریادِ اَمرَه جی کسانی کی اوشَأنَ گرفتارَ کوده بود بیرون اَموده و خیلی جی فَلجَأن و لَنگان شفا پیدا کودد. ⁸ و هَنه وَسی او شهرِ دورون شادی عظیمی بپا بوبُست. ⁹ ولی سامره دورون اینفر زندگی کوده کی «شمعون» نام دَأشته و خو اَعمالِ جادوگری اَمرَه سامره مردمانَ حیرانَ کوده بو و اِدعا کوده کی پیله کسی ایسه. ¹⁰ همۀ مردم جی پیلدانه و کوچی دانه خُب اونِ گبانَ گوش کودد و گوفتد:«اَ مرد قوّتِ اون خدایی ایسه کی، قدرتِ عظیم نام دَأره» ¹¹ مردم اونِ گبانَ گوش کودد و اونَ احترام نَده، چون خیلی وخت بو کی خو جادوگری اَمرَه اوشَأنَ حیرت زده کوده. ¹² ولی وختی فیلیپُس دربارۀ خدا ملکوت و عیسی مسیح مردمِ اَمرَه گب بزَه و اوشَأنَ بشارت بدَه، همه تَه ایمان بأوردد و زن و مرد تعمید بیگیفتد. ¹³ حتی شمعونم ایمان بأورد و تعمید بیگیفت و همش فیلیپُسِ اَمرَه ایسَه بو و اونِ جَه دورَ نوبوسته، و جی آیات و مُعجزه یانی کی فیلیپُس انجام دَئِه مات و مبهوت بوبُسته بو. ¹⁴ وختی اورشلیمِ جَه رسولان خبردارَ بوستد کی سامریان خدا کلامَ قبول بوکودد، پطرس و یوحنایَ اوسه کودد اوشَأنِ ورجَه. ¹⁵ وختی اَ دو نفر فَأرسد سامره یَ، اوشَأنِ رِه دوعا بوکودد تا روح القدسَ دریافت بوکوند. ¹⁶ چون هنوز روح القدس هیچکودام جی اوشَأنَ نازل نوبوسته بو و فقط به نام عیسی مسیح تعمید بیگیفته بود. ¹⁷ پس پطرس و یوحنا خوشَأنِ دسَأنَ اوشَأنِ رو بنَأد و اوشَأنم روح القدسَ دریافت بوکودد. ¹⁸ وختی شمعون بیده کی رسولانِ دس نَهَأنِ مرَه روح القدس عطا بِه، ایته مبلغ پول بأورد اوشَأنِ ورجَه و ¹⁹ رسولانَ بوگوفت:«مرَم اَ قدرتَ فَأدید تا هر کی رو دس بنم روح القدسَ دریافت بوکونه» ²⁰ پطرس بوگوفت:« تی پول خودتِ اَمرَه جی میأن بیشِه، چره کی خیال کونی خدا عطایَ شَه پولِ اَمرَه هِئِن، ²¹ تو اَ خدمتِ دورون هیچ سهم و قسمتی نَئری چره کی تی دیل خدا ورجَه راست نییِه. ²² تی اَ شرارتِ جَه توبه بوکون و خدا جَه بخَأه کی شاید تی اَن دیلِه فکر آمرزیده بیبِه. ²³ من دِئِن دَأرم کی حسادت و گوناه تی دیلَ سیاهَ کوده و شرارتِ زنجیرانَ گرفتاری» ²⁴ شمعون بوگوفت:«شومَأن می وَسی خداوند ورجَه دوعا بوکونید تا اونچی کی بوگوفتید می سر نَأیِه» ²⁵ بعدِ اینکی پطرس و یوحنا سامره مردمِ رِه شهادت بدَأد و خدا پیغامَ اعلام بوکودد وَأگردستد اورشلیم. وَأگردستَأنِ موقع چن تَه جی سامره دأهاتانی کی اَشَأنِ راه سر نَهَه بو میَأنم، خدا پیغامَ اعلام بوکودد. ²⁶ در اَن موقع خداوندِ فرشته فیلیپُسَ بوگوفت:«ویریز بوشو جنوبِ طرف، و به او جاده ای بوشو کی بیابانیه و جی اورشلیم شِه به غزه» ²⁷ پس ویریشت و راه دکفت، راه میَأن ایتَه خواجۀ حبشی یَ بربوخورد کی حبشه ملکه، یعنی «کَنداکِه» دربارِ دورون مقامی دَأشته و اونِ خزانه دار بو، اون زیارتِ رِه بأمو بو اورشلیم. ²⁸ در اونموقع اون وَأگردستَأن دوبو خو سرزمین، و خو کالسکه دورون نیشته بو و اِشعیای نبی کیتابَ خَأندَأن دوبو. ²⁹ و روح فیلیپُسَ بوگوفت: «توندتر بوشو و اون کالسکه مرَه همراه بوبون» ³⁰ فیلیپُسم خو پایَ توندَ کود و بودوَست اون کالسکه طرف و بیشتَأوست کی خواجه کیتابِ اِشعیای نبی یَ خَأندَأن دره، پس اونِ جَه وَأورسه:«آیا اونچی کی خَأندَأن دری یَ فهمی؟» ³¹ خواجه بوگوفت:«تا کسی مرَه راهنمایی نوکونه، چوطو تَأنم بفهمم؟» بازن فیلیپُسِ جَه خواهش بوکود کی کالسکه یَ سوارَ بِه و اونِ ورجَه بینیشِه.