¹ هو روزَأن کی شاگردان زیادترَ بوستد، یهودیانِ یونانی زبان، جی یهودیانِ عِبری زبان شکایت بوکودد کی غذا تقسیم کودَأنِ موقع، اَشَأنِ بیوه زناکانَ غذا فَأنرِسه. ² بازن دوازده تَه رسول، همۀ شاگردانَ جمعَ کودد و بوگوفتد:«دوروست نییِه کی اَمَأن غذا تقسیم کودَأنِ وَسی، خدا کلامِ اِعلام کودَأنِ جَه غافل بیبیم. ³ پس ای برَأرأن، خودتَأنِ میَأنِ جَه هفت نفر کی خوش نام، و پور جی روح القدس و حِکمت بوبودَ انتخاب بوکونید. ⁴ و اَمَأن خودمَأنِ وختَ نهیم دوعا کودَأن و خدا کلامِ اِعلام کودَأنِ رِه» ⁵ اَ گب همه تَه یَ خوش بأمو. پس استیفانَ کی ایمانداری قوی و پور جی روح القُدس بو، و فیلیپُس و پروخُروس و نیکانور و تیمون و پَرمیناس و نیکولائوسَ، کی اِنطاکیه شین بو و اول غیرِ یهودی بو و بازن یهودی و بعد مسیحی بوبُسته بویَ انتخاب بوکودد. ⁶ اَ مردَأکانَ بأوردد رسولانِ ورجَه و رسولان اوشَأنِ رِه دوعا بوکودد و اوشَأنِ سرِ رو دس بنَأد. ⁷ و خدا پیام، هَطو مُنتشرَ بوسته و خیلی زود ایمانداران اورشلیمِ میَأن زیادَ بوستد، و خیلی جی کاهنانم مسیحَ ایمان بأوردد. ⁸ استیفان هم پور جی فیض و قدرت، مُعجزه یان و آیاتی عظیم مردمِ میَأن ظاهرَ کوده. ⁹ و چن نفر جی کنیسۀ «آزادگان» بأمود اِستیفانِ ورجَه، و شروع بوکودد اونِ اَمرَه بحث کودَأن، اوشَأن جی یهودیانِ قیرَوان و اسکندریه، و چن نفرم جی قیلیقیه و آسیا بود. ¹⁰ ولی استیفان چنان حکمت و روحِ قدرتِ اَمرَه گب زَئِه کی اوشَأن نِتَأنستد اونِ پِشِ جَه مقاومت بوکوند. ¹¹ پس چن نفرِ جَه بخَأستد کی بوگوید: «اَمَأن بیشتَأوستیم کی اَ شخص، موسی و خدایَ کُفر گوفته» ¹² اوشَأن باعث بوبُستد کی مردم و شیخَأن و یهودِ مُلایان عصبانی بوبود. و همۀ اوشَأن فوؤستد اِستیفانِ سر و اونَ دستگیر بوکودد و محاکمه رِه بوبوردد شورا. ¹³ و چن نفر شاهدِ دوروغی بأوردد کی بوگوفتد:«اَ شخص همش اَ مکانِ مُقدس و موسی شریعتَ کُفر گویه. ¹⁴ خودمَأن بیشتَأوستیم کی گوفته؛ عیسایِ ناصری اَیَه ویرانَ کونه و رسم و رسومی کی موسی اَمرَه بیسپُرده یَ تغییر دِهه» ¹⁵ هَ موقع همۀ کسانی کی شورا دورون نیشته بود، اِستیفانَ فَأندرستد و بیدد کی اونِ صورت فرشته یانِ مَأنستَأن درخشانَ بوسته.