¹ و اما اینفر کی «حَنانیا» نام دَأشته خو زن «سَفیره» اَمرَه ایتَه تیکه زمین بُفروخت، ² و فقط مقداری جی زمینِ پولَ بأورد و رسولانِ پا ورجَه بنَه، اونِ زنم اَ کارِ جَه خبر دَأشته. ³ پطرس اونَ بوگوفت:«ای حَنانیا، چره وَأهَأشتی شیطان تی دیلَ پورَه کونه کی روح القدسَ دوروغ بوگویی و ایبچی جی زمینِ پولَ تی ورجَه بدَأری؟ ⁴ مگر او زمین خودتِ شین نوبو؟ آیا وختی اونَ بُفروختی اونِ پول تی ورجَه نِنَه بو؟ چی باعث بوبُست کی اَ کارَ بوکونی؟ تو انسانَ دوروغ نوگوفتی، بلکی خدایَ دوروغ بوگوفتی.» ⁵ هَطو کی حَنانیا اَ گبانَ بیشتَأوست زمین رو بکفت و جابجا بِمرد. همۀ کسانی کی اَ چیزانَ بیشتَأوستد بترسِد. ⁶ اونموقع جوانان بأمود و اونَ کفن دوکودد و بوبوردد بیرون و دفن بوکودد. ⁷ حدوداً سه ساعت بوگوذشت و اونِ زن کی خبر نَأشته اونِ مرد بِمرده دَأره بأموبودورون. ⁸ پطرس اونِ جَه وَأورسِه:«مرَه بوگو زمینَ هَ قیمت بوفروختید؟» او زنای جواب بدَه: «بله، هَ قیمت» ⁹ پطرس اونَ بوگوفت:«چره همدیگرِ اَمرَه دس به یکی بوکودید تا خدا روحَ آزمایش بوکونید؟ کسایی کی تی مردَ بوبوردد و دفنَ کودد، هَسَه اَمون درد و درِ ورجَه ایسَد و ترَه هم بورد» ¹⁰ هو لحظه، سَفیره هم پطرسِ پا ورجَه بکفت و جان بدَه. وختی جوانان وَأگردستد بیدد اونم بمرده دَأره. پس اونِ جنازه هم بیرون بوبوردد و اونِ مردِ ورجَه دفنَ کودد. ¹¹ کلیسا جماعتَ و همۀ کسانی کی اَن بیشتَأوستدَ ترس بیگیفت. ¹² رسولان آیات و مُعجزه یانِ زیادی قؤمِ میَأن انجام دَئِد و همه تَه یکدیل و هَمنظر اِیوانِ سُلیمانِ میَأن جمعَ بوستد. ¹³ اما هیچکس جی مردمِ عادی جرأت نوکوده اوشَأنَ نزدیکَ بِه، هر چن همۀ مردم اَشَأنَ خیلی اِحترام کودد. ¹⁴ و هر روز زنَأکان و مردَأکانِ ویشتری خداوندَ ایمان اَوردد و اَموده اَشَأنِ جمعِ دورون. ¹⁵ تا جایی کی خوشَأنِ مریضانَ اَوردد کوچه یانِ میَأن و تخت یا تُشکِ رو خوسَأنِده، تا وختی پِطرس اویِ جَه دوَأره، لااقل اونِ سایه دکفه بعضی جی اوشَأنِ رو. ¹⁶ و خیلی یَأن جی شهرهای اطرافِ اورشلیم بأمود و خوشَأنِ مریضان و کسایی کی ارواح پلید دَأشتد و دیوانه بوسته بودَ بأوردد، و همه تَه شفا پیدا کودد. ¹⁷ ولی کاهنِ اَعظم و همۀ اونِ همکاران کی فرقۀ صَدّوقیانِ جَه بود، جی روی حسودی دس به کار بوبُستد. ¹⁸ و رسولانَ بیگیفتد و تَأوَأدد زندان عمومی. ¹⁹ ولی هو شب خداوندِ فرشته زندانِ درَ وَأکود و اوشَأنَ بیرون بأورد و بوگوفت: ²⁰ «بیشید و معبدِ دورون بِئسید و دربارۀ اَ حیاتِ تازه مردمِ اَمرَه گب بزنید.» ²¹ اوشَأن اَ گبَ کی بیشتَأوستد، سَحرِ موقع بوشود مَعبد و شروع بوکودد مردمَ تعلیم دَئَن. وختی کاهنِ اَعظم و اونِ دستیاران بأمود، شورا اَعضاء و اسرائیلِ شیخَأنَ دعوت بوکودد و جلسه ای تشکیل بدَأد. بازن چن نفرَ اوسه کودد کی بوشود رسولانَ جی زندان بأورد. ²² ولی وختی مأموران بوشود زندانِ دورون، اوشَأنَ زندانِ دورون پیدا نوکودد، و وَأگردستد و بوگوفتد: ²³ «زندانِ دَر مُحکم دوَسته بو و نگهبانانم درِ بیرون بِپا ایسَه بود، ولی زندانِ درَ کی وَأکودیم هیچکس اونِ دورون نِئسَه بو» ²⁴ وختی کاهنانِ اَعظم و معبدِ نگهبانانِ فرمانده اَ خبرَ بیشتَأوستد، حیران بِئسَأد و به فکر بوشود کی؛ اَ کارِ آخرعاقبت چی بِه؟ ²⁵ هَ موقع اینفر بأمو و اوشَأنَ خبربدَه کی:«اوشَأنی کی تَأوَأدَه بید زندان هَسَه معبدِ دورون ایسَد و مردمَ تعلیم دَئَن درد» ²⁶ پس معبدِ نگهبانانِ فرمانده، مأمورانِ مرَه بوشو و رسولانَ بأورد، ولی نه به زور، چون ترسِئِد کی مردم اوشَأنَ سنگسار بوکوند. ²⁷ وختی رسولانَ بأوردد، اوشَأنَ شورا پِشِ جَه بپا بدَأشتد، اونموقع کاهنِ اَعظم اوشَأنِ جَه وَأورسی: ²⁸ «مگر شمرَه قدغن نوکوده بیم دِ به اَ نام تعلیم ندید؟ شومَأن اورشلیمَ شیمی تعلیمِ مرَه پورَه کوده دَأرید و خَأئید اون مردِ خونَ به اَمی گردن تَأوَأدید.» ²⁹ پطرس و رَسولان در جواب بوگوفتد:«وَأستی خدا جَه ایطاعت کودَأن نه انسانِ جَه. ³⁰ اَمی پئرانِ خدا، هو عیسایی کی شومَأن اونَ به صلیب فَأکشِه اید و بوکوشتید، جی مُرده یان ویریزانی ³¹ و اونَ بوبورد بوجُر و سر بُلندی مرَه خو راستِ طرف بینیشَأنی، و سَرور و نجات دهنده چَأکود تا بنی اسرائیلِ قؤمَ فرصت عطا بوکونه خوشَأنِ گوناهانِ آمرزشِ وَسی توبه بوکوند، ³² و اَمَأن همۀ اَشَأنَ شهادت دهیم، هوطو کی روح القدسم شاهده، روح القُدسی کی خدا اونَ خو مُطیعانَ بِبِخشه دَأره.» ³³ وختی اَ گبانَ بیشتَأوستد جوری عصبانی بوبُستد کی تصمیم بیگیفتد اوشَأنَم بوکوشد. ³⁴ اما اینفر جی فرقۀ فریسی کی اونِ نام «عمالائیل» و شریعتِ مُعلم بو و همۀ مردم اونَ احترام کودد، مجلسِ جَه ویریشت و دستور بدَه کی رسولانَ چن دقیقه ای بیرون بوبورد. ³⁵ بازن حاضرانَ بوگوفت:«ای اسرائیلیان، مراقب بیبید اَ اَشخاصِ اَمرَه چی خَأئید بوکونید. ³⁶ چن وخت پیش ایتَه مردای کی «تئودا» نام دَأشته اِدعا بوکود کی خوره پیله کسی ایسه، و نزدیک چهارصد نفرم خو دؤر جمعَ کود، ولی اونَ بوکوشتد و اونِ دار و دسته همه جی میَأن بوشو. ³⁷ بازن سرشوماری موقع بو کی یهودایِ جلیلی قیام بوکود و ایته جرگه اونِ دونبال بوشود، ولی اونم هلاکَ بوست و اونِ یارانم پراکنده بوستد. ³⁸ هَسَه شمرَه گوفتأن درم اَشَأنَ کار ندَأرید، اَشَأنَ وا بدید، چره کی اگر کاری کی کودَأن درد و نقشه ای کی دَأرد جی انسان بیبِه، به ثمر نرسه، ³⁹ ولی اگر جی خدا طرف بیبِه، نِتَأنید اوشَأنَ شکست بدید، و وَأستی مراقب بیبید نوکونه خدا اَمرَه جنگ بوکونید. ⁴⁰ پس اوشَأنم قانع بوبُستد و رسولانَ دخَأدد و شلاق بزد، و قدغن بوکودد کی دِ به عیسی نام گب نزند، بازن اوشَأنَ مرخصَ کودد. ⁴¹ رسولان شادمان جی شورا حضور بیرون بوشود، شادمان بود چون خدا اوشَأنَ لایق بدَأنسته بو عیسی نامِ وَسی بیحُرمتی بیدیند. ⁴² و هر روز معبدِ دورون و خانه یانِ میَأن تعلیم دَئِد و همۀ مردمَ مُژده دَئِد کی عیسی هون مسیحه موعوده.