¹ وختی روزِ پنطیکاست بوبُست، همۀ ایمانداران ایتَه جا جمع بود ² کی ایمرتبه جی آسمان ایتَه صدا، بادِ دمَستَأنِ صدا مَأنستَأن بأمو و همۀ اون خانه ای کی اونِ دورون نیشته بودَ پورَه کود. ³ و ایته چی زبانه های آتشِ مَأنستَأن بیدد کی تقسیم بوبُست و هر کودامِ رو قرار بیگیفت. ⁴ بازن همه تَه جی روح القدس پورَه بوستد، و جوری کی روح اوشَأنَ قدرتِ گب زَئَن دَئِه، شروع بوکودد به زبانهای دیگر حرف زَئَن. ⁵ هو روزَأنِ میَأن همۀ یهودیانِ خداپرست، جی همۀ مملکتان بأمو بود اورشلیم. ⁶ وختی اَ صدا بُلندَ بوست خیلی جی مردم جمعَ بوستد، وختی فَأندرستد بیدد کی ایمانداران به اوشَأنِ زبان گب زَئَن درد، خیلی تعجب بوکودد. ⁷ و هَطو کی حیران بود بوگوفتد:«مگر اَشَأنی کی گب زَئَن درد همه تَه ایالتِ جلیلِ شین نییِد؟ ⁸ پس چوطویه کی هر کودام جی اَمَأن ایشتَأویم کی به اَمی کشورِ زبان گب زند؟ ⁹ اَمَأن پارتیان، مادیان، عیلامیان، بین النهرینِ مردم و یهودیه و کاپادوکیه و پونتوس و آسیا، ¹⁰ و فریجیه و پامفیلیه و مصر و لیبی مناطقی کی قیروانَ بِچِسبسته دَأره، و زائرانی کی جی روم اَیِد، ¹¹ چی اوشَأنی کی یهودی زاده یِد و چی اوشَأنی کی یهودی بوبُسته دَأرد، و کرتِ و عربستانِ مردم، همه تَه ایشتَأویم کی اَشَأن به اَمی زبان خدا کارایِ عظیمِ جَه تعریف کودَأن درد.» ¹² پس همه تَه حیران و سرگردان همدیگرِ جَه وَأورسده:«اَ اِتفاق یعنی چی؟» ¹³ اما بعضیانم مسخره اَمرَه گوفتد:«اَشَأن شرابِ جَه مستَ بوستِه دَأرد!» ¹⁴ اونموقع پطرس اون یازده نفرِ دیگرِ اَمرَه ویریشت و خو صدایَ بُلندَ کود و رو به اوشَأن بوگوفت:«ای یهودیان و ای اورشلیمِ مردم، متوجه بیبید و اونچی کی گوفتَأن درمَ خُب گوش بوکونید. ¹⁵ اَ مردکان اوطو کی شومَأن خیال کونید مست نییِد، چره کی هَسه ساعت نُه صُبحه. ¹⁶ بلکی اَن هون چیزی ایسِه کی یوئیلِ نبی درباره اون پیشگویی بوکوده بو؛ ¹⁷ خدا فرمایه؛ روزایِ آخرِ دورون، همۀ بشرَ می روحِ جَه پورَه کونم. شیمی پسرأن و دخترأن نبوّت کوند، شیمی جوانان رویأها دیند و شیمی پیرأن خوابان، ¹⁸ و اون روزَأنِ دورون، حتی غلامان و کنیزانم می روحِ جَه پورَه کونم، و اوشَأن نبوّت کوند. ¹⁹ در بوجُر، آسمانِ جَه عجایب، و بیجیر زمینِ رو، جی خون و آتش و بخار مُعجزات ظاهرَ کونم. ²⁰ پیشتر جی اونی کی خداوندِ پیله روز، اون روز عظیم و پور جلال فَأرسه، خورشید تاریکَ بِه و ماه خونِ رنگ بِهه. ²¹ اونموقع هر کی خدا نامَ دخَأنِه، نجات پیدا کونه. ²² ای قؤمِ اسرائیل گوش بوکونید؛ هوطو کی خودتَأن دَأنید، عیسای ناصری مردی بو کی مُعجزه یان و آیاتی کی خدا اونِ دسِ اَمرَه ظاهرَ کود، اونِ حقانیتَ ثابت بوکود. ²³ ولی شومَأن اونَ کی بر طبقِ خدا اِراده شمرَه تسلیم بوبُسته بویَ فَأدَأئید کافرانِ دس، و اونَ به صلیب فَأکِشِه ئید و بوکوشتید. ²⁴ ولی خدا اونَ زندَه کود و مرگِ عذابِ جَه آزادَ کود، چره کی محال بو کی مرگ بتَأنِه اونَ خو چنگِ دورون بدَأره. ²⁵ هوطو کی داوود دربارۀ اون فرمایه؛ "همیشه خداوندَ می روبرو دینم، چره کی اون می راستِ دسِ ورجَه ایسَه، تا اشتباه نوکونم، ²⁶ هَنه وَسی می دیل شادمانه و می زبان جی شادی فریاد کونه، و می جان، اُمیدِ دورون سامان دَأره، ²⁷ چره کی مُرده یانِ دنیا میَأن، مرَه ولَ نوکونی، و وَأنَألی تی اَمینِ بنده فِسادَه بیدینه. ²⁸ تو زندگانی راهانَ مره یاد دهی و تی حضور می جانَ جی شادمانی پورَه کونه و تی راستِ دسِ ورجَه ایسَأن مرَه لذت دهه" ²⁹ ای برَأرَأن، تَأنم اطمینانِ اَمرَه بوگویم کی اَمی پیله جدّ، داوود بِمرد و دفنَ بوست و اونِ مقبره تا هَسَه اَمی ورجَه باقیه. ³⁰ ولی اون نبّی بو و دَأنسته کی خدا اونِ رِه قسم بوخورده و اونِ نسلِ جَه اینفرَ پادشاهی تختِ رو نیشَأنِه. ³¹ پس پیشاپیش آینده یَ بیده بو و دأنسته، هَنه وَسی دربارۀ مسیحِ قیام بوگوفت کی اونِ جان مُرده یانِ دونیا میَأن نِمَأنِه و اونِ تن فاسدَه نیبِه. ³² خدا هَ عیسی یَ مَردن پسِ رِه ویریزَأنی و اَمَأن همه تَه شاهدیم. ³³ عیسی بوشو دَأره بوجُر و خدا راستِ دسِ طرف ایسَه، و روح القدسِ موعودَ پئرِ جَه فَأگیفته دَأره و اونَ خو پیروانَ عطا بوکوده کی ایمروز شومَأن اونِ نتیجه یَ دِئِن دَأرید و خودتَأن ایشتَأوید. ³⁴ چون داوود خودش به آسمان بوجُر نوشو، ولی با اَن حال بوگوفته؛ خداوند می خداوندَ بوگوفت؛ می راستِ دسِ طرف بینیش، ³⁵ تا تی دوشمنانَ تی پا جیر تَأوَأدم. ³⁶ پس ای اسرائیلِ قؤم، همه تَه یقین بدَأنید کی خدا، اَ عیسی یَ کی شومَأن به صلیب بِکِشِه اید، خداوند و مسیح قرار بدَه دَأره.» ³⁷ وختی مردم اَ گبَ بیشتَأوستد، ناراحتَ بوستد و پطرس و باقی رسولانَ بوگوفتد:«ای برَأرأن، هَسَه چی وَأستی بوکونیم؟» ³⁸ پطرس جواب بدَه:«توبه بوکونید و هرکودام جی شومَأن شیمی گوناهانِ آمرزشِ وَسی، به نام عیسی مسیح تعمید بیگیرید، بازن خدا شمرَم اَ هدیه یعنی روح القدسَ عطا کونه. ³⁹ چره کی اَ وعده شومَأن و شیمی زَأکأنِ شین و همۀ کسانی شینه کی سرزمینایِ دورِ میَأن ایسَأد، یعنی هر کسی کی اَمی خداوند خدا اونَ دِخَأنه.» ⁴⁰ پطرس گبای زیادِ دیگرِ اَمرَه شهادت بدَه و اوشَأنَ دعوت بوکود و بوگوفت:«خودتانَ آزادَ کونید جی اَ مُنحرفِ نسل» ⁴¹ پس اونِ پیامَ قبول بوکودد و تعمید بیگیفتد. هو روزِ دورون نزدیکِ سه هزار نفر تعمید بیگیفتد. ایمانداران با هم زندگی کوند ⁴² اوشَأن همۀ خوشَأنِ وختَ بنَأد رسولانِ جَه تعلیم بیدیند و اوشَأنِ مرَه مشارکت کودد و نان پارَه کودد و دوعا کودَأنَ مشغول بود. ⁴³ و همه حیرت بوکوده بود و خؤفِ الهی همه تَه یَ بیگیفته بو، و رسولان مُعجزاتِ زیادی ظاهرَ کودد. ⁴⁴ همۀ ایمانداران با هم زندگی کودد و همه چی دورون با هم شریک بود. ⁴⁵ خوشَأنِ اَموال و زمینانَ فروختد و اونِ پولَ بسته به هر کی احتیاج همدیگرِ میان قسمت کودد. ⁴⁶ اوشَأن هر روز معبدِ دورون جمعَ بوستد و خوشَأنِ خانه یانِ دورون نان پارَه کودد و دیلخوشی و صمیمیتِ اَمرَه همدیگرِ اَمرَه غذا خوردد ⁴⁷ و خدایَ شُکر کودد. همۀ مردم اوشَأنَ احترام نَأئِد و خداوندم هر روز کسایی کی نجات پیدا کوددَ به اوشَأنِ جمع ایضافَه کوده.