¹ ای تِئوفیلوس جان، من می اولی کیتابَ دربارۀ همۀ اُموری بینیویشتم کی عیسی تعلیم دَأئِه و خودشم عمل کوده، ² از اول تا روزی کی بواسطۀ روح القدس دستوراتی خو انتخاب بوبُستِه رسولانَ فَأدَه، و بازن به بوجُر بوبورده بوبُست. ³ اون بعدِ اینکی رنج بِکِشه، خودشَ به اَ اَفراد آشکارَ کود، و دلایلِ زیادی اَمرَه اوشَأنَ ثابت بوکود کی زنده بوبُستِه دَأره. اون چهل روزِ میَأن بارها اوشَأنَ ظاهرَ بوست و دربارۀ خدا پادشاهی اوشَأنِ مرَه گب بزَه. ⁴ ایبار غذا خوردنِ موقع اوشَأنَ بفرماست:«اورشلیمِ جَه نیشید، بلکی اون وعده ای رأفا بِئسید کی پئر شمرَه بدَه بو و می جَه بیشتَأوستِه اید. ⁵ چره کی یحیی آبِ اَمرَه تعمید دَئِه، ولی چن روز دیگر شومَأن روح القدسِ اَمرَه تعمید گیرید» ⁶ وختی شاگردان دؤرِ هم جمعَ بوستِه بود، اونِ جَه وَأورسِد:«خداوندا، آیا هون موقعه کی اسرائیلِ پادشاهی یَ دوباره وَأگردَأنی؟» ⁷ عیسی جواب بدَه:«شمرِه واجب نییِه اَیام و تاریخأنی کی پئر خو اختیار دَأره یَ بدَأنید، ⁸ ولی موقعی کی روح القدس شیمی رو نازل بِه، قدرت پیدا کونید و اورشلیم و یهودیه و سامره میَأن، و حتی جهانِ دورترین نقطه میَأن می شاهدان بیهیدی» ⁹ وختی عیسی اَ گبَ بزَه، هوطو کی همه فَأندرستَأن دوبود، به بوجُر بوبورده بوبُست، و ایتَه اَبر اونَ، اوشَأنِ چومِ جولو جَه قائمَ کود. ¹⁰ وختی اون شوئون دوبو و اوشَأنم هَطو آسمانَ فَأندرستَأن دوبود، ایمرتبه دو تَه سفید دوکوده مردای اوشَأن ورجَه بِئسَأد ¹¹ و وَأورسِد:«ای جلیلِ مردَأکان، چره اَیَ ایسَأئید و آسمانَ فَأندرید؟ هَ عیسی کی از شیمی ورجَه به آسمان بوجُر بوبورده بوبُست، هَطویی کی بوجُر بوشو و شومَأن بیده اید، دوباره هَطو وَأگرده.» ¹² اونموقع رسولان جی کوهِ زیتون وَأگردستد اورشلیم، کوه زیتون یک کیلومتر اورشلیمِ مرَه فاصله دَأشته. ¹³ وختی شهرَ فَأرسِد، بوشود اون بوجُرِ اُتاقی کی اوشَأنِ اِقامتگاه بو. اوشَأن، پِطرس و یوحنا، یعقوب و آندریاس، فیلیپُس و توما، بَرتولما و مَتّی، و یعقوب حَلفی پسر، شَمعون فدایی، و یهودا یعقوبِ پسر بود. ¹⁴ اَشَأن همه تَه، همۀ زنَأکانِ مرَه و عیسی مار مریم و عیسی برَأرَأنِ مرَه، همۀ خوشَأنِ وختَ دوعا کودَأنَ مشغول بود. ¹⁵ ایتَه جی اون روزَأن، پطرس ایماندارانِ میَأنِ جَه کی حدوداً صد و بیست نفر بود بِپا بِئسَه ¹⁶ و بوگوفت:«ای برَأرَأن، لازم بو کی کیتاب مقدسِ پیشگویی انجام بیبِه کی اونِ دورون خیلی وخت پیش، روح القدس داوودِ زبانِ جَه دربارۀ یهودا پیشگویی بوکوده بو، کسی کی افرادی کی عیسی یَ دستگیر بوکوددَ راهنمایی بوکود. ¹⁷ چره کی اونم جی اَمَأن بو و سهمی اَ خدمتِ دورون دَأشتِه. ¹⁸ اون خو شرارتِ دسمُزدِ مرَه، ایتَه تیکه زمین بِهِه و اونِ میَأن سرِ اَمرَه بکفت به زمین و جی میَأن پارَه بوست و همۀ اونِ دیل و روده فووَست بیرون. ¹⁹ اورشلیم مردم همه تَه خبر دارَه بوستد و اون زمینِ نامَ «حَقِل دَما» بنَأد، یعنی خونِ زمین. ²⁰ کیتابِ مزامیرِ دورون بینیویشته بوبُسته؛ اونِ خانه ویران بیبِه، و کسی اویَ سامان نیگیره. و بازم بینیویشته بوبُسته؛ اونِ مأموریت کسِ دیگری یَ بیسپُرده بیبِه. ²¹ هَنه وَسی لازمه کسانی جَه کی اَمی جرگه جَه بود و همۀ اَ مدتِ دورون کی خداوند عیسی اَمی میَأن شوئون اَمون کوده، اَمی اَمرَه ایسَه بود، ²² یعنی جی یحیی تعمید تا روزی کی عیسی اَمی میَأنِ جَه به بوجُر بوبورده بوبُست اینفر بَأیِه اَمی جمع دورون، تا اَمی اَمرَه جُزءِ شاهدانِ عیسی زنده بوستَأنِ بیبِه.» ²³ پس دو نفرَ پیشنهاد بوکودد: اینفر کی یوسف نام دَأشتِه و اونِ لقب بَرسابا بو، و اونَ یوستوس هم دخَأدد، و اوی تَه هم مَتیاس نام دَأشتِه. ²⁴ بازن اَطو دوعا بوکودد:«خداوندا، تو همه تَأنِ دیلِ جَه خبر دأری، تو خودت اَمرِه آشکارَ کون کی کَ ی تَه جی اَ دو نفرَ انتخاب بوکوده ای ²⁵ تا یهودا جانشین بیبِه، چره کی اون خو خدمت و رسالتَ جی دس بدَه و بوشو جایی کی هویِ شین بو.» ²⁶ بازن قُرعه تَأوَأدد و مَتیاسِ نام بیرون بأمو. و اَطو اونم جُزءِ یازده رسولِ جرگه بوبُست.