¹ پولس و سیلاس جی آمفیپولیس و آپولونیا دوَأرستد و فَأرسد تَسالونیکی یَ، در اویَ یهودیان کنیسه دَأشتد. ² پولس طبقِ خو عادتِ همیشگی بوشو کنیسه دورون یهودیانِ ورجَه، اون سه تَه هفته شنبه روزِ رِه شوئِه و اوشَأنِ اَمرَه جی کیتاب مقدس بحث و گفتگو کوده، ³ و توضیح دَأئِه و دلیل اَورده کی لازم بو کی مسیح رنج بیدینه و مَردن پسِ رِه جی مُرده یان زنده بِه. پولس گوفته:«اَ عیسایی کی شمرَه اعلام کودَأن درم، هون مسیحه» ⁴ بعضی جی یهودیان، و خیلی هم جی یونانیانِ خداپرست و زنانِ سرشناس قبول بوکودد و پولس و سیلاسِ اَمرَه مُتحد بوبُستد. ⁵ اما یهودیانِ بی ایمان حسودی بوکودد. اوشَأن ایتَه عده لات و اوباشَ بازارِ سر جمعَ کودد و ایته دسته به راه تَأوَأدد و شهرَ شلوغَ کودد. بازن هوجوم بوبوردد یاسونِ خانه تا پولس و سیلاسَ بأورد بیرون و مقاماتَ تحویل بدد. ⁶ ولی اوشَأنَ پیدا نوکودد، پس یاسون و چن نفر دیگر جی ایماندارانَ بیگیفتد و فَأکش فَأکش بوبوردد شهرِ مقاماتِ ورجَه و فریاد بوکودد:«اَشَأنی کی دونیایَ آشوب بوکوده دَأرد، هَسَه بامو دَأرد اَیَ ⁷ و یاسون هم اَشَأنَ خو خانه راه بدَه دَأره. اَشَأن همه تَه قیصرِ اَحکامِ جَه سرپیچی کوند و اِدعا دَأرد ایتَه شاه دیگری ایسَه کی اونِ نام عیسایه» ⁸ وختی مردم و شهرِ مقامات اَ گبانَ بیشتَأوستد، نگرانَ بوستد. ⁹ پس یاسون و دیگر ایماندارانِ جَه ضمانت فَأگیفتد و اوشَأنَ آزادَ کودد. ¹⁰ هو شبِ رِه مسیحیان عجله اَمرَه پولس و سیلاسَ اوسه کودد بیریه. وختی اوشَأن فَأرسد اویَ بوشود یهودیانِ کنیسه. ¹¹ اوشَأن تسالونیکی مردمِ جَه روشنفکرتر بود، چونکی اشتیاقِ اَمرَه پولس و سیلاسِ پیامَ گوش کودد و بازن کیتاب مقدسَ فأندرستد و بررسی کودد تا بیدیند طبقِ خدا کلام ایسه یا نه. ¹² و خیلی جی یهودیان و خیلی هم جی زنان و مردانِ سرشناسِ یونانی ایمان بأوردد. ¹³ وختی تسالونیکی یهودیان بیشتَأوستد کی پولس بوشو دَأره بیریه و در اویَ خدا کلامَ پخشَ کودَأن دره، بأمود بیریه و در اویَ هم شهرَ شورش تَأوَأدد. ¹⁴ مسیحیان سریع پولسَ اوسه کودد دریا کنارِ طرف، ولی سیلاس و تیموتائوس هر دو نفر اویَ بِئسَأد. ¹⁵ کسانی کی پولسَ راهنمایی کودَأن دوبود، اونَ بوبوردد شهرِ آتن، بازن پولس اوشَأَنَ بوگوفت وَأگردید بیریه و سیلاس و تیموتائوسَ بوگوئید هر چی زودتر بَأید می ورجَه. ¹⁶ وختی کی پولس آتنِ میَأن او دو نفرِ رَأفا ایسَه بو، بیده کی آتن پور جی بُته، هَنه وَسی خیلی ناراحَتَ بوست. ¹⁷ پس شوئه کنیسه یانِ دورون و یهودیانِ مرَه بحث و گفتگو کوده و هر روزم بازارِ سر راه دوَأرانِ مرَه گب زَئِه. ¹⁸ ولی بعضی جی فیلسوفایِ «اپیکوری» و «رواقی» اونَ بربوخوردد و اونِ اَمرَه مخالفت بوکودد، بعضی جی اوشَأن گوفتد:«اَن چی چرت و پرت گوفتَأن دره؟» بعضیانم گوفتد:«مثل اینکی خدایانِ بیگانه یَ تبلیغ کونه» چره کی پولس، عیسی و قیامتَ اوشَأنَ اعلام کوده. ¹⁹ پس اونَ خوشَأنِ مرَه بوبوردد ایتَه کوهِ جُر کی مریخ نام دَأشته و شهرِ تالار اویَ نَهَه بو، اوشَأن پولسَ بوگوفتد:«تَأنیم بدَأنیم اَ تازه تعلیمی کی دَئَن دری چیسه؟ ²⁰ تی گبانَ کی ایشتَأویم اَمره عجیبه، خَأئیم بدَأنیم اَشَأنِ معنی چیه» ²¹ همۀ آتنِ مردم و خارجی یانی کی او شهرِ دورون زندگی کودد مشغولیتی جُز اَن نَأشتد کی همدیگرِ دؤر جمعَ بود و دربارۀ عقاید تازه گب بزند. ³⁰ سابقِ رِه خدا اَ نادانی یَ نادیده گیفته، ولی هَسَه همۀ مردمانَ هر جایی کی ایسَد حُکم کونه کی توبه بوکوند. ³¹ چون روزی یَ تعیین بوکوده کی جهانِ مردمَ عادلانه داوری کونه، بواسطۀ شخصی کی خودشه انتخاب بوبُسته یه و اونَ جی مُرده یان زنده کوده تا اَ حقیقت ثابت بوکونه و همه یَ جی اَ کار خاطر جمعَ کونه» ^{32 33} مردم وختی دربارۀ قیامت و مُرده یانِ زنده بوستَأن بیشتَأوستد، بعضیان پوزخند بزَد و مسخره بوکودد و بعضیانم بوگوفتد:«اگر بیبه ایتَه فرصتِ دیگر دربارۀ اَ موضوع تی جَه بیشتَأویم» و اَطو پولس خو گب زَئَن تومامَ کود و تالارِ جَه بوشو بیرون. ³⁴ اما چن نفر پولسِ جَه پیروی بوکودد و مسیحَ ایمان بأوردد، کی اوشَأنِ جَه شَه «دیونیسیوس» جی اَعضایِ تالارِ مریخ و زنی کی «داماریس» نام دَأشته یَ نام بوردَأن.