¹ جی پولس کی به خواست خدا عیسای مسیح رسوله، و اَمی برَأر تیموتائوسه طرفِ جَه، به خدا کلیسا کی شهرِ قُرِنتُسِ میَأن نَهَه، و همۀ مسیحیانی کی ایالتِ یونانِ میأن زندگی کوند. ² اَمی پئر خدا و اَمی خداوند عیسی مسیح شمرَه فیض و سلامتی عطا بوکونه. ³ مُتبارک بیبه خدا و اَمی خداوند عیسی مسیح پئر، کی پئری مهربان و همۀ دیلگرمیانِ خدایه. ⁴ کی اَمرَه همۀ اَمی سختیانِ میَأن دیلگرمی عطا کونه، تا اَمَأنم بتَأنیم اون دیلگرمی ایی کی اونِ جَه بیگیفته دَأریمِ مرَه، دیگرانی کی سختیانِ جَه دوارستَأن دَأردَه دیلگرمَ کونیم. ⁵ چون هر چقدر ویشتر مسیح وَسی زحمت بیدینیم، هو اندازه مسیح طرفِ جَه آسایش و دیلگرمی ویشتری دریافت کونیم. ⁶ اگر زحمت و سختی بکشیم، شیمی نجات و شیمی دیلگرمی وَسیه، و اگر آسایش اَمی رأفأ ایسَه، بازم شیمی نجات و دیلگرمی وَسیه، و اَن زمانی بِهه کی اگر شومَأنم ایتَه روزی اَمی مَأنستَأن رنج و زحمتِ میَأن دکفتید، صبر و حوصله بدَأرید و تحمل بوکونید. ⁷ اَمی اُمید شمرَه اُستواره، چره کی دَأنیم هوطو کی اَمی درد و رنج میَأن شریکید، اَمی آسایش میَأنم شریک بیهید. ⁸ ای برأرأن، نَخَائیم جی سختیانی کی ایالتِ آسیا میَأن اَمی سر بأمو شومَأن بیخبر بیبید. فشارِ مشکلات بحدی بو کی دِ نِتَأنستیم طاقت بأوریم و اصلاً اُمید نَأشتیم کی زنده بمأنیم. ⁹ دِ احساس کودیم کی اَمی مرگِ حُکم صادر بوبُسته. ولی همۀ اَشَأن اتفاق دکفت تا نه خودمانَ، بلکی خدایی یَ توکل بوکونیم کی مُرده یانَ ویریزانه. ¹⁰ و اون اَمرَه یاری بوکود و جی خطرِ ایتَه وحشتناکِ مرگ نجات بدَه، و اُمید دَأریم کی جی اَن پسم اَمرَه نجات دِهه. ¹¹ مخصوصاً کی شومَأنم وَأستی شیمی دوعائانِ مرَه اَمرَه یاری بوکونید، بازن کسانِ ویشتری خدایَ شُکر کوند وختی بیدیند کی خدا شیمی دوعائانِ وَسی کی اَمرِه و اَمی سلامتی رِه کونید، اَطو فیضِ اَمرَه جواب دِهِه. ¹² اَمی افتخار اَنه و اَمی وجدانم اَمرَه شهادت دِهه کی اَمی رفتار دونیا میَأن و مخصوصاً شیمی اَمرَه قدوسیت و صداقتِ مرَه بو، اَمَأن حکمتِ دونیایی مرَه عمل نوکودیم، بلکی بر حسبِ خدا فیض رفتار بوکودیم. ¹³ اونچی کی نیویسیم، دوروست هونی ایسه کی شومَأن خَأنید و فهمید. و من اُمیدوارم ¹⁴ هوطو کی اَمرَه تا حدودی بشناخته دَأرید، اَ چیزانم کاملاً بفهمید تا آخرسر خداوند عیسی روزِ میَأن هوطو کی اَمَأن شمرَه افتخار کونیم شومَأنم اَمرَه افتخار بوکونید. ¹⁵ اَ اطمینانِ وَسی بو کی تصمیم بیگیفتم اول بأیم شیمی ورجه تا دو بار شمرَه برکت برسَأنم. ¹⁶ یعنی خَأیم بوشوم مقدونیه شیمی مسیرِ جَه بوشوم، و وَأگردستنِ رِه هم بازم بأیم شیمی ورجَه و شومَأن مرَه یهودیه طرف راهی بوکونید. ¹⁷ 17 هسَه ایمکان دَأره وَأورسید، موقعی کی اَ تصمیمَ گیفتَأن دوبوم دودل بوم؟ و یا اَنکی فکر بوکونید آدمای معمولی مَأنستَأن بوبُسته دَأرم و وختی گب زنم همزمان هم آهانه و هم نه یه! ¹⁸ اون خدایی کی اونِ گبان راست و قابله اعتماده شاهده کی، اَمی گب زَئَن شیمی اَمرَه دوپهلو نییه و وختی گوئیم آهان، اَمی منظور هون آهانه. ¹⁹ چره کی خدا پسر عیسی مسیح هم کی اَمَأن، یعنی من و سیلوانُس و تیموتائوس دربارۀ اون شیمی میَأن موعظه بوکودیم، هیچموقع دودیل نوبو، بلکی اونِ بله، همیشه بله بو. ²⁰ و اونه کی خدا وعده یانَ، هر چقدرم کی زیاد بیبه عملی کونه، و اَمَأن همه جا اعلام بوکوده ایم کی اون چقدر خو وعده یانَ وفاداره، تا اَطو اون جلال پیدا کونه. ²¹ ولی خدایه کی اَمأن و شمرَه مسیح اتحادِ اَمرَه اُستوار بوکوده و اَمرَه مَسح بوکوده ²² و خو مالکیتِ مُهرَ اَمی رو بزَه دَأره، و روح القدسَ به عنوان آینده برکتانِ بیعانه، اَمی دیلانِ میَأن بنَه دَأره. ²³ خدایَ شاهد گیرم به خودمه جان قسم اگر تا هَسَه نَأمو دَأرم قُرِنتُس، نخَأستم خودمه سرزنشانِ مرَه شمرَه ناراحتَ کونم. ²⁴ نه اینکی فکر بوکونید شیمی ایمانَ حکم کودَأن دریم، نه، اَمَأن شیمی اَمرَه شیمی شادمانی وَسی تلاش کونیم. چره کی ایمانِ میَأن اُستوارید.