¹ Oli, Yesus hamolang lamal hur nua ututuk ubagang kolang kadingkil mi. Goleng nama tohing rai amara adu ang gilang gang mida e anu tang miha kolang gadingkil mi. oli, nama tohing anga ae tatitang kolang gadingkil mi. ² Oli, gang hur hamolang tohing rai mia ging ba adu ang giala tutuk mia hur koli mi mega. Gialatutuk gomi mi anga, gang mia giala tutuk. 3 "Halelah! Namanu p'ing farehak mia iladagalmi. ⁴ Ang muse, ang muse gang bing farehak, bing joa viag gadingkilmi haru, oli aduang adu, ang muse tuluk kede. ⁵ Joa oli val dagarang mi mugu meke ka rai bana. P'ing anga user biling laju ibase meke ka rai bana. ⁶ Oras vid tutung herek, ping p'iling anga valing se gabariking ubana, ping p'iling anga tati malotil. ⁷ Joa oli dagarang gahama mi mugu. p'iling ibase Anga muse dagarang p'iling geng tei anga muse p'ing p'iling penang amira, oli bing penang ka ahi ubana. ⁸ Ibase, joa oli meke abogami nua anga gahiu, p'iling, oli bal magala, tanggahi magala karatoga migabuala, kartalaung mi gabuala, oli ratuanu migabuala". ⁹ Ang muse, Yesus tutuk, "alangba oli gaveli u se, oli uhalela!" ¹⁰ Oras anu Yesus galokang, nama geng goleng, ga sakola gonong karanu falung alo mia hama, taganing mia Yesus galatutuk mia koli mi mega anga. ¹¹ Anga muse, gang gihur gaedeng, surga abang ga mau ugaluali ang nang mia p'ing. Agani base, ging ba na ma ebeng, kolitutuk ba mia gialatutuk, ¹² Ani, anihi ging uling geli, ging uling geli iba ging geli bana, oli ging uhalela bana, ging uhalela iba ganukung bana. ani hise ging ake giafak ubaruati oli ging uampo gana." yesaya 6:9-10 HUR TARANG MIA NAMA PING VAREHAK MI MEGA 13 Ang muse Yesus gialatutuk ubagang," kolitutuk anga ing u'u ganukung geli e'e naga? tata banihi hur kolitutuk ajimi ing uganukung geli? ¹⁴ Naba ba ping farehak anga hur hamolang farehak. ¹⁵ Ging amba nama ping viag gadingkil mi haru, manaba ga hur hamolang ang ututuk. Oras ging u halela, setan user adu oli hur hamulang mia gialatutuk anga utaruhang mia gigene. ¹⁶ Agani iba, ging ba p'ing farehak mia meke ba val karang anga gingba user hur nua uhalela oli uareak. ¹⁷ Ibase, bariking ka ging mi anamang bana mang ol edeng. A ganiang gilang p'ela oli tota o'rang ging tang adu hur nua benag ging user mugu. ¹⁸ Oli p'ing ebeng anga dagarang gomi haru, ging anga nama ba hur nua uhalela, ¹⁹ Oli joa anga gi p'ukang mali ang ging gie ala mulang mi, oli hur tabokang oli kafasa, ang gilang giomi mirarafak, oli phela gahalang giomi mi mada oli il ebeng adu hur hamolang gahama mi, oli geng hanampit ang gilang gang ka gahi ubana. ²⁰ Ibase ging ba farehak meke aboga gomi, anga ging ba hur nua uhalela, ukarajang, oli gahi u, karatoga mi gabuala, kartalaung me gabuala, oli ratu anu mi gabuala." KOLITUTUK MIAMA LAMPU MI MEGA ²¹ Oli, Yesus gialatutuk, lampu namakah b'ana il dumang gamihing kautiali bana oli ka mia laku dumang ga mihing bana? Iba lampu ang malekang mia gatela giaka ang tang ga mihing. ²² Ang gilang, il joa ka tabuningbana oli ganukung bana. Oli ani ibase, il joa katabuning bana oli nining di balilang. ²³ Oli nama joa ang gafeli use uhalela, oli mia gang uhalela!" ²⁴ Angamuse, Yesus giala tutuk, " uli neningba ing uhalela. Sudi ba mia nala hama bale mia eng sudi, oli ebeng mia magala mia a'dang. ²⁵ Ang gilang alang ba geng use, magenang magala, iba alangba geg ubanase, neningba geng u anga bale mia." KOLITUTUK MIA BING MI MEGA ²⁶ Anga muse, yesus tutuk, "Lahatala ga abang hamolang ang emang hula namanu ae b'ing farehak meke mi. ²⁷ Nama bing farehak anga il kakoa gang ta il liali mate, oli bing ang hupak gafel u oli p'iling. Nama b'ing farehak anga ka il geli bana. ²⁸ Meke ang gail gani mia u. Halomang abukul, oli gakilang u, anga muse alak kafali ae ga kilang mi. ²⁹ Alak kafali anga gonong aruka, nama user adu aturu ga oras gahika jema." KOLITUTUK MIA SAWI KAFALI MI MEGA ³⁰ Anga muse, Yesus tutuk, nening ba b'ing mia Lahatala Ga abang hamolang ang tomega? Oli, oli tutuk taangba mia tomega? ³¹ Lahatala ga abang hamulang anga emang hula sawi kafali mia meke mi muding, anga ba sawi kafali anga mi ol ae te kafali gie ala mulang mi, ³² Oli anga muse, ging muding, sawi kafali anga p'iling p'al te ebeng gala hama bana ae il adagalmi, oli gagatang horuk p'al anga muse aduang burang bohing mi adu filik gene mi miha. ³³ Oli ajimi miama kolitutuk mi mega, Yesus hur hamolang anga mia gialatutuk, emang hula ging umagia jema. ³⁴ Gang hur hamulang usarinta ibase gang ka kolitutuk mia gidang bana, ibase gang tarang mia ga sekolah fal anga gilokang hi gang gialatutuk. YESUS EANG P'AL GAHAPA ³⁵ Oli, fid viang gadang Yesus sakola fal gialatutuk, "Mae ping kolang ga edeng mifa." ³⁶ Nama tohing anga mia giohapha, ging Yesus gala topuni e tang mida ging gala mana ba gang biasa mi. Oli, e ebeng di giala taponi. ³⁷ Anga muse, eang p'al buaning kolang p'al e benang gonong barisik jial e benang gonong afing. ³⁸ Ibase, Yesus ae e lap mi, gang ae e lap mi banole tang ta. Anga muse, ging gamehal mate ging anga mi Galatutuk, "guru, Angka niomuling banase ping amina adi?" ³⁹ Anga muse, Yesus mate eang benang gahapa, anga muse gang tang galatutuk, "Takimang! Nuaba tening!" Anga muse, eang benang takimang oli tang benang tening rama. ⁴⁰ Anga muse, gang oli gialatutuk, getabani ba ibukang mali? Anga se parasaja ae bana?" ⁴¹ Gi bukang mali ibase ging tateteng, "adi alang ba gie? Anga muse eang p'al kolang p'al ging uada!"