1 YOHANIS PEMBAPTIS GAKARAJANG 1 Adiba sarinta ga halomang-halomang miama Yesus Kristus Lahatala, gaval gadang. 2 Emanghula ae miama boma Yesaya ga surat mi hula anga gajoang. "Uling! Nang saruang bala geng gahing gohi viag tula viag usadia. Maleakhi 3:1 3 Nama anu moe belantara babula mi agang moring ubagang se bola: 'Viag usadia miama Lahatala gadang, Viak gene gamolo"' Yesaya 40:3 4 Yohanis nama tohing raih belantara babula gomi jial miama gibiang tang senghi seba gang oli giohi giafak anga ugabuala angahi Lahatala ganua hama anga gang miama ging tang gaharung gabokong. 5 Oli, Yudea e Yerusalem ga manusia anga ajimi Yohanis galuali jema. Moe Yordan ga jial mol mi, gang jial miama gibiang tang senghi seba oli giohi gi'pela gahalang anga u mangaku. 6 Yohanis ga pakiang anga unta amudi ga deko hial anga te 'bual. Oli ga mud e ga jial anga kamet e vani jial. 7 Yohanis ga sarintah gomi anga gang ubagang se bohola, "Neng ba ma e adu ading nama anu ae naluali adu ma jia anga ga kuasa anga mi 'pal ka neng gajoang banaga. Neng ading toku hela e ga kas ga hial angaba uhaiaka di jadi banaga. 8 Neng ading jial ba miama ibiang tang, ani ibase geng ba ae ma jia anga gang Roh Hamolang ba miama nama gabiang tang." YOHANIS JIAL MIAMA YESUS GABIANG TANG 9 Oli, oras anu gomi mi, Yesus moe Nasaraet, galelea ga goang gomi, Yohanis gang ga jial miama Yesus gabiang tang moe Yordan mol mi. 10 Savaka, Yesus uling se burang ga Viak ejel balelang Lahatala ga Roh Hamolang hela ga rupa anga emanghula aduang ulo gajoang hela gabiang tang. 11 Oli, nama anu gamang to'e sorga mi hela ubagang se bohola, "Eng adingba na Val mamolo eng angaba nomi ojajia. Oli eng angaba nang eng suka." ROH BELA YESUS GA'ALI GALALEKO 12 Oras anu gadang, Yesus Roh geng pana babula pal anu mi. 13 Gang moe babula pal mi Roh Bela geng soba sampe tereng kar'puta. Yesus moe binanta 'bela gahahama mi ibase lahatala ga bala geng gahing ma gomoling. YESUS LAHATALA GA NUA HAMA MIAMA GALELEA ABANG MI TUTUK 14 Yohanis nama miama tabuhang gomi seng muse, Yesus gang Galelea abang gadang jema Lahatala ga'nua ga'hama anga ututuk ubagang. 15 Gang gialatutuk ubagang se bohola, "Sorga abang ga'jel apal jema. Nua ba iavak ubaruati senghi seba Lahatala ga hur nua hama anga'ba utarima!" YESUS GA SAKOLA VAL ADEDENG U OLU 16 Oras anu gadang Yesus Galelea ga kolang ga'dingkil mi lamal, gang geng uling se Simon ga'kaku Anderias, gibala ae kolang gomi dalang galolang jia, ging gi karajang ba dalang pana ab gola. 17 Anga muse, Yesus gialatutuk ubagang se bohola, "Ma e Naluali , Nang bohola ing pake i dalang pana miama manusia ba u'gaholang." 18 Anga seng muse Simon e Andreas gibalapi gidalang benang miama mega ging mate Lahatala u'galuali. 19 Gang jema mana anga galeta, gang geng uling se Yakobus, Zebedeus ga val, oli gakaku, Yohanis, ging ae e tang miha dalang bulang jia. 20 Anga muse, Yesus savaka gi agang, gimang Zebedeus, ae e tang miha jia anga di gimota magenang oli nama ba adu dalang bulang gang ging seva anga di, ging mate Yesus galuali. YESUS NAMA AJAR LAHATALA GA KUASA GOMI 21 Anga muse, Ging Kapernaum mi sampe vid nua, Yesus e hamolang gomi mi nama ga'vomung ga'pahang. 22 Ga'vomung pahang gomi anga, nama tohing rai anga ajimi baruati, ga'vomung pahang anga ka ahli-ahli taurat gonong gajong banaga. 23 Oras anga gadang, nama amu anu e hamolang gomi mi roh 'bela geng tang adu geng tang ma anga gagelang gang kalili, va mate ma mate, 24 Gang galatutuk, "Eng e neng nening karajang ba ping mia tadang hai, Yesus Nasaret val? Ang adu ma ading Ang bohola nenetemina? Nang geli se bohola eng adi alang? Eng anga'ba Lahatala ga Val Amu!" 25 Ani ibase, Yesus gomi mia gikalila, ubagang se bola, "takimang! Nuaba nama adi uhaba!" 26 Anga muse eang bela 'benang gomi mi gavavili gang kalili gamang mada, eang anga uha'pa e kaluar e ehi jema 27 Ani anga gelang ginangajimi baruati ging va anu geteng ma anu geteng taganing, ubagang se bola, "Adi getabani ba gagiani adi? Karajang gagiani adi karajang ajaji! gang parenta eang pela anga gogaluali." 28 Anga muse, ging laju-laju mate jema nua hama ututuk ubagang mana-mana kakanap oli Galelea mi. SIMON GIDAT HIAL OLI NAMA TOHING RAE MONA 29 Seng muse Yesus ga sakola val ginang ajimi e hamolang uha'pa, ging mate Simon ga emi oli Andreas, Yakobus, Yohanis gala. 30 Ibase, Simon gidat hial kamundil anga gagelang keta e ae ta jia, Ketang adi ging miama Yesus galatutuk. 31 Yesus geng harak anga muse gatang mi puni gohi mate. Oras anga mi di ketang kalila anga ebanaga gang mate giobalenta mia gidang. 32 Vid se viang, il'gomi kakua jema, ani ibase ging ketang kalila tohing rae oli rupa-rupa oli eang 'pela giomi mi miha di ajimi Yesus gola adu. 33 Anga muse, abang ga manusia ajimi adu e ga hondal goa miha. 34 Yesus ketang rupa-rupa anga ajimi gahoning oli nama ba eang pbela gomimi miha anga di ajimi gang gihoning. Ani ibase, gang eang pbela gihapa giohi ake tutuk ganang, eang pbela anga ajimi Yesus geli. YESUS SAMBAJANG OLI HUR NUA HAMA UTUTUK 35 Oras anu gadang, koko il gomi do kakua, Yesus mate mana takimang anu gadang jema, anga muse gang anga mi sambajang. 36 Anga muse, Simon oli nama tohing rae gala topuni Yesus gola. 37 Ging jema Yesus harak, seng anga muse ging ubagang sebola, "Nama tohing rae ae Ola jia!" 38 Anga muse, Yesus gialatutuk sebola, "Ma e ping jema bendar apal-apal piabung mi tangahi nua hama adi ututuk miama nama tohing rae giala hama. Adi gelang ba, nang adu ba adi. 39 Oli ani anga gelang, Yesus lamal mate Galelea abang ajimi mi aji. Gang nua hama ututuk e hamolang kakanap gang oli nama ba setang gomi mi miha anga di gene mona. NAMA APEBURANG GENG GENE MONA 40 Oli, nama anu ketang apeburang geng gene anga gelang gang Yesus gola adu. Anga muse gang giaka p'ung muding gabagang sebola, "Ang ujali se, Ang neng gene mona." 41 Gomi gahi ol tadili muse gang gomi mia gajahi, Yesus gatang puni miama gataning miama nama ketang anga midegi anga muse gang ubagang sebola, "Neng di ujali ang mona!" 42 Mang misavaka di nagase, nama ketang apeburang p'enang ae banaga anga muse nama p'enang mona. 43 Yesus nama p'enang gohi savaka gohapa. 44 Seng anga muse gang gialatutuk ubagang sebola, "Angka nama gala sarinta ganang. Ibase, ang jema, avak pahi anga miama barate anggonong ba gitubing, sengse ang mona gasadaka anga ba mia, emang hula boma Musa miama iala tutuk iohi ukarajang anga gajoang miama tanda anu gafagi." 45 Ani ibase, nama adi jema muse gang takimang banaga ilba gang urasa gap'etal gomimi anga gang tutuk ubagang miama nama tohing rai gadang. Anga gelangba Yesus gangka geng balelang bendar gomi lamal mate nua hama ututuk ubagang bana. Gang lamal mana takimang anggonong ba mi senghise hurnua anga ututuk ubagang. Ani base, serang tohing rae anga ajimi gadang ehi geng tepa lahatala gamang hamolang anga umagia.