¹ Vid adedeng gomi Yesus bale Kapernaum gadang jema, umagia se bola gang moe emi. Nama tohing nama rae topuni tokadaru mana di naga ² jema, sampe viaga jel ujia, gang oli Lahatala gamang kavali miama ugiala tutuk. ³ Angamu, ging nama puta nama kivil toni Tuhan Yesus gola adu. ⁴ Ging nama kivil anga ging gala adu iba se ging ka Yesus gabung jadi bana, ging nama tohing ugahala, ging anga mi ekadoku garikil seng hise nama keta anga ging miama laku tang gala ekadoku mi hela Yesus gabung mi ta. ⁵ Yesus gipara saja uling geli, gang angami nama ketang anga gala tutuk, aje naval agahalang nang uampo jema. ⁶ Ibase marang p'al adedeng miha uling geli miha gomi ganukung, ⁷ geta bani ba nama adi tutuk gene geni? gang Lahatala gahula! alang babisa gahalang uampo Lahatala hi bisa? ⁸ Yesus eang hamolang gomimi gang uling giomidi geli gang angami gialatutuk. Geta bani ba ganokung ani anga ae yomimi? ⁹ Nening ba minua nama kivil anga gialatutuk, bola agahalang anga nang uampo jema ba nua ba mate abuhu anga palikul mati e lamal? ¹⁰ Ang uling geli sebula Lahatala gaval amu bisa nama gagahalang uampo gie alamulang gomimi. "Yesus nama kivil gala tutuk, ¹¹ "Nang ala tutuk: mate, e abuhu anga palikul, e aemi jema." ¹² Nama kivil penang mate, gabuhu mia, mate kodo hela nama tohing gahondal goa mi jema. Ginanga jimi baruati Lahatala tajening, ubagang sehula, "ningka il ani anga ningka gelibadu!" LEWI YESUS GALUALI ¹³ Yesus kolang gadingkil miva, anga muse nama tohing rae anga, golaadu gang ilmia gitubing. ¹⁴ Gang lakal va gang uling se Lewi, Alfeus gaval, mana balasteng bajar ae miha jia. Yesus angami giala tutuk, "Mae naluali." anga muse, Lewi val mate oli galuali. ¹⁵ Oli, oras anga Yesus e Lewi gaemi miha il kede jia, nama balas teng mia oli nama gahalang gene gonong di miha Yesus oli gasako laval gonong gala il kede, anga mi anga nama tohing Yesus galuali. ¹⁶ Oras anu mi surat hamolang gaboma oli farisi gonong ginguling se yesus ae nama gahalang oli nama balasteng bajar gala il kede jia, anga muse ging sakola val gonong giteng, "getabaniba gang nama belasteng bajar oli nama gahalang gene gonong gala il kede?" 17 Yesus umagiamu, gang angami giala tutuk, "Gimba mona anga gingka kilavali ga agang bana, ibase gingba ketang angaba ging kilavali ga agang. Nang adu adi nagka nama moloba ga agang bana nang adu adi nang nama gahalang ba gola." GETABANI BA ING KANEMPEL ¹⁸ Yohanes ga sakolah val miama Farisi gonong gala oras adi ging gie kanempel. nama adedeng adu mu ging taganing, "Getabaniba Yohanis ga sakola val oli farisi ga sakola val ging kanempel, getabaniba a sakola ba anga gingka kanempel bana?" ¹⁹ Anga muse, Yesus giala tutuk, "anga se gimba ginaming ae gila topuni di ging kanempel? oras ginaming ae gila topuni, se gingkah kanempel bana. ²⁰ Ani iba, se gang oras anu ae aduma anga se ginaming, nama mia se ging di kanempel bae. ²¹ Nama ka ilpaha bugur anga namaka il haba miama bulang bana. Ani se il haba bugur, oli gabugur tang pal. ²² Oli namakah tuak miama kadeva paha mibana. Ani se tuak ang gang kadeva paha mi se kadeva oli tuak anga gajahing. Minua se tuak anga ring miama kadeva haba ba mi. YESUS VID HAMOLANG GABIANG ²³ Vid hamolang gadang, Yesus oli gasakola gonong gala alak iladagal gomimi va, ga sakola val gonong alak ahi anga ging aturi. ²⁴ Anga muse, farisi gonong gila tutuk, "Uling, geta bani ba ging karajang vid hamolang gene bana adi ba ging gene?" ²⁵ Anga muse, gang angami giala tutuk, "ingka ilba Daud gene anga inka basa badu genge oli gajua gaserang gala viagomi lamal sampai umalapal? ²⁶ Tabani gang Lahatala ga e gomi mida oras Abyatar do gapangka marang pal, oli nama pungkul miama sadaka gavagi ging mia kede, pungkul ba nama miama sadaka gene, anga marang oli nama tohing bae marang gonong gala amba kede?" ²⁷ Anga muse, Yesus farisi gonong giala tutuk, "vid hamolang nama gene miama namanua gadang, ambola vid hamolang mia namanua gadang. ²⁸ Jadi, manusia gaval angaba Tuhan, geng angaba vid hamolang gatanggoa.