¹ Apa lyapitire Lisabata, mukutameka tupu kuyenda kuliytuva lyakuhova mushivike, Maria magdalena ntani na Maria ghumweya avaya vayakenge kumbira. ² Kengenu, kwakalire likunyungango lyalinene lyalivhu, muEngeli waHompa atunda mu liwiru, aya ntani atindumuna ko liwe litundeko, makura ashungiripo. ³ Limoneko lyendi kwakalire yira ruvadi, ntani vyuma vyendi vyavikenu yira ndaghu. ⁴ Vakungi aghu vayere ghoma ntani avakara yira vakafumu vakufa. ⁵ MuEngeli atantere vakamali ntani nakughamba kwavo, ''' Kapishi mutjire, naviyiva ashi Jesusa muna kushana, owo vapampalire. ⁶ Kapishi kuno anakara, ano ngoli ghuye karambuka, yira moomo aghambire. Yenu muyakenge livango opo aralire Hompa. ⁷ Yendenu wangu ntani mukatantere varongwa vendi, ' Ghuye ana rambuka mumfa. Kengenu, ghuye kuna kuyenda kumeho yenu kuGalilea. Oko kumu kamumona.' Kengenu, Namutantilire.'' ⁸ Vakamali makura avatundu kumbira wangu-wangu na woma ntani naruhafo rwarunene, makura avaduka vakatantere varongwa vendi. ⁹ Kengenu, Jesusa agwanekere navo nakughamba ashi, '' Moro!. Vakamali avaya, avakwata mpadi dendi ntani nakumukarera. ¹⁰ Makura Jesusa aghamba kwavo, '' Kapishi mukare naghoma. Yendenu muka tantere vaghunyande vayende kuGalilea. Oko nko vakamonena''. ¹¹ Weno opo vakamali vayendire, kengenu, vakengeli vamwe avayendi mushitata makura avatantere vapristeli vavanene vininke navintje ovyo vyashorokiro. ¹² Vapristeli vavanene apa vagwanikilire navakurona ntani nakuyoyera vishorokwa navo, vatapire maliva ghamangi kuvakavita; ntani nakuvatantera, '' ¹³ Tanterenu vamweya, ' Varongwa va Jesusa vanaya matiku nakuyavaka rutu rwendi opo tuna rara'. ¹⁴ Ntjene ashi vitundwamo vino vikatika kwa Nguuru, kutu mushengawida nakughupa vinka kehe vino kukwenu.'' ¹⁵ Vakavita vaghupire maliva ntani varughanine yira moomu vavanangwilire. Vitunwamo vino vyakuhaninine ghunene mukatji kava Juda ntani kuna kutwikira nampili namutji. ¹⁶ Ano ngoli varongwa ronambiri vayendire kuGalilea, kundundu oko avneghidire Jesusa. ¹⁷ Apa vamumonine, vamukalilire, ano ngoli vamwe vakalire na mashinganyeko. ¹⁸ Jesusa aya kukwavo ntani nakughamba kukwavo ashi, ''' Nkondo nadintje vaditapa kwande muliwiru ntani napalivhu. ¹⁹ Mpo ngoli ashi yendenu mukaronge varongwa vamudimuhoko nadintje. Vayoghenu mulidina lya She, lya Mone, ntani lya Mpepo yakupongoka. ²⁰ Vashongenu valimburukwe vininke navintje ovyo namurawira anwe. Kengenu, Nanwe nakara kehe pano, nampili kughuhura waghudjuni.