¹ Weno apa ngurangura yayire, Navantje Vapristeli vavanene ntani vakurona vavantu avaghamba mukukulimba na Jesusa mukukamutokwera kumfa. ² Vavo ava mumanga, ava mughupupo, ntani nakukamutapa kwaPilatusi Nguuru. ³ Makura opo Judas, ogho amu shoroliro, amonine ashi Jesusa vana mupangura, ghuye akushighura ntani avyuta vingcengere rontatu vya Siliveri kuva Pristeli vavanene na vakurona. Ntani a ghamba, '' ⁴ Ame nadjono mukushorora honde yakupira ndjo.'' Ano ngoli vavo a vaghamba, '' Vinke ngoli ovyo kukwetu? Kenga kovyo naghumoye.'' ⁵ Makura ghuye a vhukuma vingcengcere vya Siliveri muntembeli, makura a tundupo, makura arupuka nakukakumangerera naghumwendi. ⁶ Vapristeli vavanene avaghupu vingcengcere vyaSiliveri nakughamba, '' Kapi vyapulitira mukutura vino mushikesha mukonda ashi yayo ntjontjo yahonde,'' ⁷ Ava kuyongora shishorokwa kumwe, ntani ava ghuru lifuva lya mushongi walirova omo ngava vhumbikanga vantunda virongo. ⁸ Nakonda yino olyo lifuva kwalitwenyanga ashi, '' Lifuva lya honde" nanamuntji lino. ⁹ Makura ovyo a ghambire muporofete Jeremiya vyatikiliremo, mukughamba, '' Vavo vaghupire vingcengcere rontantu vyaSiliveri, ntjontjo vatulire pendi vana vavakafumu vaIsrael, ¹⁰ Ntani vavitapire kulifuva lya mushongi walirova, yira moomo Hopma ampititilire ame.'' ¹¹ Weno Jesusa ayimanine kumeho yaNguuru, ntani Nguuru amupura, '' Ove Hompa wa vaJuda ndi?'' Jesusa a mulimburura, '' Ove ghuna kuvighambo.'' ¹² Ano ngoli opo vamurundilire vaPristeli vavanene na vavakurona ghuyte kundereko ovyo alimbwilire. ¹³ Makura Pilatusi aghamba kukwendi, '' Ove kapi ghuna kuviyuva navintje vana kukurundira ndi?'' ¹⁴ Ano ngoli ghuye kapi alimbwilire nampili nkango yimwe, mpo ngoli ashi Nguuru vyamutetulire ngudu. ¹⁵ Weno pakalire shilika shapampo sha Nguuru mukumangurura nkwate yimwe ya kuhoroghora mbunga. ¹⁶ Pashirugho osho vavo vakalire namunadorongo wamukorokoshi wamunene walidina Brabbas. ¹⁷ Opo vapongire kumwe, Pilatus aghamba kukwavo, '' Are ogho munashana nimumangwilire anwe?'' Barabbas, ndi Jesusa ogho vatwenyanga Ashi Kristusa?'' ¹⁸ Ghuye aviyivire ashi vavo kwa muyitire Jesusa mukonda yaMfudu. ¹⁹ Ghuye nda a shungilira kushipuna sha mpanguro, mukamali wendi atumu nkango kwendi nakughamba ashi, '' Washarughanako vintu kogho mukafumu wakupira ndjo. Mbyovyo ashi ame nina hepa ngudu namuntji mukonda ya ndjodi eyi nakara nayo yakuhamena kukwendi.'' ²⁰ Weno vaPristeli vavanene ngani vakurona ava shongawire mbunga mukupura Barabbas, ntani nakudipaghaJesusa. ²¹ Nguuru avapura vavo, '' Ghunindjepo pavaviri muna shana ame nimumangwilire anwe?'' Vavo avaghamba ashi, Barabbas''. ²² Pilatusi aghamba kukwavo, '' Vinke ovyo nirughana kwaJesusa ogho vatwenyanga ashi Kristusa?'' Navantje ava limburua, '' Mupamparenu.'' ²³ Makura ghuye aghamba, '' Morwa nke, vinke vyavidona ovyo a rughana?'' Ano ngoli ayiyire nka ghunene, '' Mupamparenu.'' ²⁴ Pilatusi apa avimonine ashi ghuye naghumweshi ana kumutegherero, ano ngoli madongadongo ghambunga ghatamikire, Ghuye a ghupire mema, a kushu maghoko ghendi kumeho yambunga, ntani a ghamba ashi, '' Ame kapishi nameko kuhonde yamukafumu ghuno. Vimonenu ngoweyo. ²⁵ Vantu navantje ava ghamba ashi, '' Honde yendi yikare papetu ntani navana vetu.'' ²⁶ Makura ghuye ava mangwiliri Barabbasi kukwavo, ano ngoli ghuye a shepwilita Jesusa nakumutapa vamupampare. ²⁷ Makura vakavita va Nguuru vaghupire Jesusa mulivango lyampanguro ntani ava pongeka mbunga nayintje yava kavita. ²⁸ Ava mushepura makura ava tura lirwakani papendi. ²⁹ Vavo ava rughana nkata ya migha makura ava mudwateke kumutwe wendi, ntani nakura mpango mulighoko lyendi lyarulyo. Vavo ava tongamene kumeho yendi ntani nakumushwaghura, na kughamba ashi, '' Ogho, Hompa wava Juda! ³⁰ Vavo ava mutipire, ntani vavo vaghupire mpango ntani nakuyimutoghonita mumutwe nka. ³¹ Vavo ava mushwaghura nakumughupa lirwakani makura ava mutura lirwakani lyamwene. ³² Vavo apa varupukire, vawanine mukafumu waku Kireni walidina Simon, ogho vatininikire vayende naye kumwe mposhi ghuye avhure kushimba Shikurushe. ³³ Vavo avaya palivango vatwenyanga Golgotha, evi vina kutanto '' Livango lya Shikora.'' ³⁴ Vavo ava mupa vhinyu anwe yakuvhonga na nyangwe. Ano ngoli ghuye apa amakilireko, ghuye kapi ayi nwine. ³⁵ Apa vamanine kumupamparere, makura ava kutapere vidwata vyendi pashifungu-fungu, ³⁶ Ntani vavo ava shungire nakutura vakungi papendi. ³⁷ Pawiru yaMutwe wendi ava turapo shitjangwa sha kumurundira, osho shatantiro, ''Ghuno Jesusa, Hompa wava Juda.'' ³⁸ Vana mahaka vaviri kwavapampalire kumwe naye, ghumwe kurulyo rwendi ntani ghumwe kurumontjo. ³⁹ Ovo vapitiro nakumutinda, nakukupuka dimutwe davo. ⁴⁰ Ntani nakughamba ashi, '' Ove oghu wayendiro ghuka djonaghure Ntembeli ntani nakuyidika mumayuva matatu, kuyoghore naghumoye! ntjene ashi ove Mona Karunga, tundako kushilivindakano oko!'' ⁴¹ Munkedi yakukufana vapristeli vavanene vamushwaghulire, navalirongi matjangwa ntani vakurona, nakughamba ashi, '' ⁴² ghuye apopilire vamwe ano ngoli kapi ana kukuyoghora naghumwendi. Ghuye Hompa wa Israel. Atundeko sha kushilivindakano, ntani ngoli tupura mumwendi. ⁴³ Ghuye a huguvara mwaKarunga, renkenu Karunga amupopere ghuye, ntjene Karunga avishane kumu mangurura. Ghuye nka aghambire ashi, ' Ame mona Karunga.' ⁴⁴ Munkedi yakukufana muna mahaka ogho vapampalire kumwe naye mo nka amushwaghulire. ⁴⁵ Kutunda muviri ya ntayimwe mundema wayire palivango nalintje dogoro vili yantane. ⁴⁶ Paviri ya ntane, Jesusa ayiyihire naliywi lyalinene, Eli, Eli, Lama Sabachtani?'' ovyo vina kutantnto ashi, '' Karunga wande, Karunga wande, vinke evi ghuna ntjuvililire?'' ⁴⁷ Apa vamwe ovo vayimanino opo vaviyuvire, ava ghamba ashi, '' Ghuye kuna kuna kukuwa Elia.'' ⁴⁸ Mpopo ngoli ghumwe wavo aduka nakaghupa Shishampo, shayuro navhinyu yaghururu, nakushitura kumpango ya Mbuu, ntani nakushimupa anwe. ⁴⁹ Vakuhupako navantje ava aghamba ashi, '' Mushuvenu.'' ⁵⁰ Makura Jesusa ayiyiri nka naliywi lyalinene makura atapa mpepo yendi. ⁵¹ Kengenu, likeshe lyamuntembeli kwataghukire paviri kutundilira kuwiru dogoro palivhu, ghudjuni aghu kunyunganga, ntani mawe agha mwakauka mukatji. ⁵² Mbira kwagharukire, ntani marutu gha vantu vakupongoka ava varaliro kwava rambwitire. ⁵³ Vatundiremo mumbira kunyima ya livhumbuko lyendi, Kungena mushitata sha kupongoka, ntani nakumoneka kuvayingi. ⁵⁴ Apa mupititili wava kavita lifere novo vakengiliro Jesusa vamonine likunyungango lyalivhu ntani navininke ovyo vyashorokiro, avakara na ghutjirwe waghunene ntani ava aghamba ashi, '' Vyaushiri ghuno Mona Karunga a kaliro.'' ⁵⁵ Vakamali vavayingi ovo vakwamino Jesusa kutunda kuGalilea naku mupakare mbili vavo kwakengililire kwaghure. ⁵⁶ Mukatji kavo Maria Magdalena, Maria vawina va Jakopo ntani Josefa, ntani vawina vavana vavakafumu vaZebedee. ⁵⁷ Apa yatikire ngurova, apanya mukafumu waghuntungi waku Arimathea, walidina Josefa, ogho a kalironka naye murongwa waJesusa. ⁵⁸ Ghuye ayendi kwaPIlatusi ntani shungida rutu rwaJesusa. makura Pilatusi araghura muku mutapa kukwendi. ⁵⁹ Josefa aghupire rutu, naku rudingira pamakeshe ghamakenu, ⁶⁰ Ntani nakurutura mumbira yendi yayipe eyi a tjokolire muliwe. Makura a shindumwiniko limuwe lyalinene kulivero lyaMbira makura avyuka. ⁶¹ Maria Magadalena ntanmi Maria ghumwe nka mpo vakalire, ava shungire vakuvyuke nambira. ⁶² Liyuva lya kukwamako, olyo lyakaliro liyuva muruku rwamawapayiko, Vapristeli vavakurona ntani vaFalisayi vapongire kumwe naPilatusi. ⁶³ Vavo avaghamba ashi, '' Mukalikuto, atwe kuna kuvhuruka ashi oghunya mupukiti opo akalire muyumi, ghuye aghambire ashi, '' Kunyima ya mayuva matatu ngani kavhumbuka nka,'' ⁶⁴ Mpo araghulire ashi Mbira yikughare dogoro mayuva matatu, varongwa vendi kuvhura ngavaye ntani nakuya muvakamo ntani nakughamba kuvantu, ' Ana vhumbuka kughufe,' ghupukiti wakuhulilira ngaghu ditopa kupitakana wakutanga.'' ^{65 66} Pilatusi aghamba kukwavo, '' Kungenu. Yendenu mukavirughane yira momu mwaviyivira.'' Makura ava yendi nakukakunga Mbira, nakushindumwinako liwe nakuturako vanomeni.