¹ Vaunyande vakupongoka, anwe kwahamena mu untungi wa muliwiru. Karenu mughayare Yesusa, mu apostoli ntani mu pristeli wamunene wa lipuro olyo twatongononanga. ² Ghuye kwa limburukwa kushipara sha Karunga, ogho amutoghorora, yira momu akalire Moses mulimburukwi mundjugho ya Karunga nayintje. ³ Yesusa kwamupa lifumano lya linene kupitakana lya Mosesa. mukonda ashi mutingi wa ndjugho akara na lifumano lya linene kupitakana ndjugho yene. ⁴ Kehe yino ndjugho muntu ayitungo, ano ngoli mutungi wa navintje ndje Karunga. ⁵ Moses kwa kalire mukareli wa kulimburukwa mundjugho ya Karunga nayintje, atape ghungambi wavyo va ghambitre vya kalire kumeho. ⁶ Ano ngoli Kristus ghuye kwa limburukwa yina mona wa kupangera mundi wa Karunga. atwe vantu atwe mundi wendi nange tukare nalididimiko na lihuguvaro lyovo twa taterera. ⁷ Yira momu tupu ya ghamba mpepo ya kupongoka ashi: " Namuntji, nkene kumuyuvha liywi lyendi ⁸ kapishi mukare nadimutjima dakukukuta mukare ghurunde, yira momu mwa kalire mumasheteko ghamu mburundu. ⁹ Navo ngoli mo varundire vakurona venu vantjeteke mushirugho shamwaka dimurongo ne, vamonine virughana vyande. ¹⁰ Mbyo nagarapire unene na mbunga yavo. Ani ghamba ashi, 'kehe pano dimutjima davo kwapuka. Ano ngoli vavo nakukwatashi lighano ndjira dande. ¹¹ Makura mpo natulirepo mughano wa ugara wande ashi: 'kapi ngava kangena mo mulipwiyumikiro lyande.''' ¹² Vaunyande, akrenu muna kotoka ashi mukatji kenu kapishi mukare nampili umwe ogho anakaro na mutjima wa ghudona wadira kupura, atunde kwa karunga wa monyo. ¹³ Mpo ngoli ashi, kukorangedenu kumwe na unyendi kehe liyuvha mpopano shina kara ko shirugho vana kutwenya ashi "Namuntji," mpo ashi kapishi mukare ghumwe mukatji kenu vakukuta mutjima dimupukite ndjo. ¹⁴ Atwe tuna kara ngoli vaholi vaKristusa nkene kutu kwaterera lihuguvaro yira momu twatamikire dogoro na kughuhura. ¹⁵ Kwavino matjangwa kwatanta ashi, "Namuntji nkene ghuyuvhe liywi lyendi, mwasha kukuta dimutjima denu yira mbovo vapiliro kulimburukwa." ¹⁶ Vantu munke ovo vayuvire liywi lya Karunga vapilire kulimburukwa? Nane kapishi muhoko ogho atunditire Moses vatunde mu shirongo sha Egipte? ¹⁷ Vantu munke agarapilire Karunga ure wa mwaka dimurongo ne? Nane kapishi mbovo va djonino, makura ava fere momo mumburundu? ¹⁸ Vantu munke aghanine ashi kapi ngava kangena mushirongo shendi shalipwiyumukiro, nane kapishi mbovo vapiliro kulimburuka kwendi? ¹⁹ Weno tuna vimono ashi vyava limbire mukangena mushirongo sha lipwiyumuko mukonda ya kupira lipuro.