¹ Yaganaucin, be mii gəshi ga ancu naa bae waarra naa makau dari Səku gaɗa akshi daa bi arro. ² Gaɗa na dlamu naa saida ii aɗakshi maa akshi naa ɗaawa aɗa ii ntu Səku, amman ii kun zəgaya bai. ³ Atərro akshi zəga adalta Səku bai, akshi a maka dlama adalta kə aɗakshi. Akshi bari aɗakshi ii adalta Səku bai." ⁴ Atərro baaci jibka duuamaya adalta nən Masipu ii ndawa waarra bari na jiirrewa. ⁵ Gaɗa Musa aa tarrnu iiaɗa adalta waarra vəreu dari dumaya: "Nən waarra aa dlama adalta kə duumaya nən aa dlaɓa na adalta tuku." ⁶ Amman adalta waarra deu dari iiman ramu kasau,"Ka rama ii gəsha ci bai maa, 'A ye kunu dəsku nən tai?' (waato da wurrtai Masipu ii ɗa); ⁷ kurru kaa ramu bai ma, "A fuwa fak ii kunu gagai nən tai?" (waato da tlatli Masipu da gadava ndaawa waarra gamtak). ⁸ Amman kakkadi ramu maa tam? "Təlam gu aa dantu ci, aa miya ci naa kunu gəsha ci." Waato təlam iiman wara waa waazək iiɗau. ⁹ Atərro ka ramu du naa miya ci maa, Yeso məgənyi nən, kurru ka dlamu naa iiman ii gəsha ci maa Səku tlatla naa aci da mutu nən, kaa bii naa ra. ¹⁰ Atərro nən aa dlama iiman ii kunu gəshi ii adalta, kurru nən aa ramo maa aci ba na ra naa miya gəri. ¹¹ Atərro kakkadi Səku ramu ma, "Nən tawanke waarra aa iiman naa aci nən ndaa zhərwa gəri bai." ¹² Atərro Yahudaucin daama daama bai naa Girkaucin. Atərro Məgənyi gu aci Məgənyi kə tiike naa tiike, aci naa bərrəɗ kə aayaɗ (bari) ii nen tawanke waarra aa dlame ci maagita. ¹³ Nən tawanke waarra aa daura dləgun Məgənyi nən ndaa ra naa aci. ¹⁴ Aa dlama nana akshi aa ɗaura nən waarra akshi naa iiman naa aci bai? Akshi aa dlama iiman nana ii nən mii ngalte akshi kəma rama ii aɗa gəri bai? Akshi aa kəmu gu nana naa baaci dlamek shi wazək bii nən? ¹⁵ To akshi aa dlama wazək nana nda wana akshi bii nən? Kakə mii nda tarnu, "Be belan rankata nən zəgər ndaawa waarra aa bari laabarr kaarak kə be bəlan!" ¹⁶ Amman akshi mak kərəmtu labarr herr gu bai. Atərro Ishaya ramma, "Məgənyi, dlamu iiman naa laabarr ja nən tai?" ¹⁷ Iiman rro aani dari kəmu gu, kəmu gu ke dari təlam Masipu. ¹⁸ Amman na ramu ma, "Akshi kəma bai?" Auwo, tabbas. "Adərr shi jən gara ii larrdi tawan ke, təlam shi ke ii mak dadəgəri duniya." ¹⁹ Gusku yaye, na jayau, "Isrraila saanuutu bii ko?" Səkur Musa ramma, "Naa ɗaawa kun kwa dlamu guru naa ndaawa waarra akshi lardi bai, dari lardi mii aa saanuuta be bai, naa ɗawa ii kunu dləmid gəshi." ²⁰ Se Ishaya da vəre ii patata da ramu ma, "Ndawa waarra ngalte maka yu bai dabi na iyu. Na tatkə naa aɗa ga ii ndawa waarra ngalte maka yu bai." ²¹ Amman aci rami Isrrailaucin ma, "I kunu yuwan gaawa naa ɗəvara aikwak ga ii ndak buka nakwana naa gauɗak aɗa."