¹ Gusku kasau, yaganaucin, a dlamine ja magita gaɗa rama mǝgǝnyi da ci kǝma da dlaɓə na kərmai, kakǝ mi dlaɓən gara aari kun. ² A dlamina magita gaɗa ja bi lata darik nda kǝmangar na nda kunu gabshu, gaɗa akshi mak bai ndak bari jirewa. ³ Amman Mǝgǝnyi baci adalta, aci a kkuma na kun kuru da rri na kun dari nda kunu gabshu. ⁴ Kunaja ga vudak ii kunu Mǝgǝnyi iiɗa kun, gaɗa kwa dlami kuru kwarɗa bai na dlama be mi wara ja rami kun. ⁵ Mǝgǝnyi da ɗǝma gǝsha kun kwa ntuci Sǝku na kǝmar zada kə Masipu. ⁶ Gusku kasau be mi jaa rame kun, yaganaucin wa, ii kunu dləgun Mǝgǝnyi Yeso Masipu, aivina na nǝn wara a mbasu vatku wara a rakan iiɗa be mi kwa ba dari ja bai. ⁷ Atəro kun na aɗa kun kwa zəgadu dlamǝn gara bǝlan kwa gugzi zada mbasa ja. Ja dlam mbasu ii gadava kun kakə ndawa wara go ladaɓ bai. ⁸ Ja ta taa nən wambai wara ja ngumi ci bai. I serǝn gu jaa wana dǝvid na afa ii kunu ɗafau na kabine tlapar mak, gaɗa ja mpa duksha ja iiɗa kun bai. ⁹ Ja dlamu kasau gu gaɗa ja bukəna kǝrmai bai. Amman ja dlamu sutku gaɗa ja dlaɓi bii gugza iiri kun gaɗa kwa gugzhi da riija. ¹⁰ Lakwtu mi jaaɗa gayi na kun tən, jaa rame kun, "Nǝn tawanke wara ancu wana bin, da ta bikta bai." ¹¹ Atəro jaa kǝmu gu ma na ndawa aa kuna kun wara anci wana bai. Akshi aa wana bai se rrəbu rrəbu. ¹² Zada ndangu jaa ramekshi zam jaa gabaɗ shi ii kunu Mǝgǝnyi Yeso Masipu, maya akshi da dlama wana na ankal akshi daci ta na aɗakshi. ¹³ Amman kun, yaganaucin, kwaiva dlamak be wara kal-kal bai. ¹⁴ Nǝn wara kuri na bari aɗa gǝri ii tǝlamcin saktu tuku nən, a dlamina yakin na aci zam kwa nəɓka aɗa na aci bai, gaɗa aci da zhirwin gəri. ¹⁵ Kwa ma aci iiɗa makuri bai, amman a gaɓɗina ci iiɗa yagana. ¹⁶ Mǝgǝnyi baci salam na aɗa gǝri da bari kun salam fatawanke na dǝvu tawanke. Mǝgǝnyi da dlaɓa iiri kun mak. ¹⁷ Sutku rro ndima dari ga, Bulus, na aikwak ga, wara na tarnu na aikwak ga i saktu tawanke. Na tarnau kasau. ¹⁸ Herr Mǝgǝnyi Yeso Masipu da dlaɓi na kun mak.