¹ Gusku kasau iiɗak ni Mǝgǝngyi Yeso Masipu na capta wa gaɗa wa dlaɓi iiɗa gayi na a ci: jaa rame kun yaganaucin, ² kwa dlaɓa na tlatlə ankal bai kwa jikta ke bai, ko darik Nǝnuwa, ko darik sakwtu, ko darik kakkadi mi kabe vire dari ja, mi a tatkau ka yuwan nik Mǝgǝnyi zaden gara səram. ³ Kwaiva ɗagai da lǝvati kun bai ko rap. Atəro yuwan gu aani bai se gafo gu jibku, nda tatki baci tlatli ankal, wato baci ɓaana. ⁴ Sutku acine baci gaaba aa gǝtlap aɗa gǝri ke iiɗak be mi gǝɗ aa gənawa na dləgun Sǝku ko be mi nda dlamawu nakwana. Gaɗa kasǝn mbasǝn gǝri iiɗak rii mbasuk Sǝku harr aci da tatkə aɗa gǝri ma aci Sǝku. ⁵ Kwaa dǝmu tano bai lakwtu mi naaɗa gayi na kun na rami kun iiɗak zaɗa bitku mak? ⁶ Gusku kasau kwa zǝgana be wara rrotaci, gaɗa nda tatkaci iiɗak kalkal lakwtu. ⁷ Atəro baci tlatli ankal wara da zəgaya bai ɓandədu səram, amman na baci rrota gəri gusku kasau se nda gwapə na aci da ɗak duvu. ⁸ Watee nda tatka na baci tlatli ankal gu, wara Yeso Mǝgǝnyi aa tǝk na aci na mafiya miya gǝri. Mǝgǝnyi aa kaci na aci be wambai, darik tatka lakwtu ni gǝri. ⁹ Baci tlatli ankal gu aani ii kunu kǝrmai kə lǝspər, na tatka gənawa, na tatka bik dagwar kǝ papiya, ¹⁰ zam na lǝvata mak kə ngadarkwina. Bitku mak aa dlaɓa nakshi kǝ ndawa wara a ɗayi nakshi, gaɗa akshi kurna gǝnyi ntau kə jirewa gaɗa akshi dabə rra. ¹¹ Gaɗa sutku Sǝku ɗayi na asən shi gaɗa akshi da bari jirewa ii papiya. ¹² Be mi aye wakata atu ne akshi mak nda dlama dikshi hagata, ndiwa wara kurna jirewa gaɗa ii sərən gu akshi a kǝmu karak ii kunu buka adalta. ¹³ Amman jaa dlama sambarka ii Sǝku fatawanke gaɗa kun, yaganaucin wara wara Sǝku ntutu. Mǝgǝnyi rro cikɗi kun in mbasu kutli sǝkur gaɗa rra dari viya aipa kun dari Nǝnuwa Sǝku na ntuta bari jirewa wa kun. ¹⁴ Sutku atu ne be ɗawu nda ɗauri kun da rik labarr herr gaɗa kwaabi saksakta ki Mǝgǝnya wa Yeso Masipu. ¹⁵ Gusku kasau, yaganaucin, arɗina bǝlan. A jibina be tawanke wara na gugzi kun, ko darik tǝlam ko darik sakwtu mi ja wane kun. ¹⁶ Gusku kasau Mǝgǝnya wa Yeso Masipu na aɗa gəri na Sǝku Afǝk wa wara ntutu wa da bariwa vəji gǝshi mi go dadəgəri mpik arro ii kəma təku da rik herr, ¹⁷ da ɗauzaci kun da mpi arro kun ii kunu wana bəlan tawanke na kunu tǝlam.