¹ Nali loleshe kabili namwene impanga iliminine pa lupili lwa Sione. Ali pamo naba 144,000 abakwete ishina ne shina lya kwa wishi lyalilembelwe pa mpumi shabo. ² Nalyumfwile ishiwi ukufuma mu mulu likoumfwika kubati ciunda cakupoma kwa menshi ayengi no kubulukuta ukukalamba. Iciumda naumfwile cali kubati ni bakalisha wa masese bakolisha amasese yabo. ³ Balimbile ulwimbo lupya pa cinso ca icipuna ca bufumu na pa cinso ca fya mweo fine na bakalamba. Takwali nangu umo uwingasambilila ulwimbo kano fye ba 1444,000 abalubwilwe ukufumu pe sonde. ⁴ Aba e bamo aba shaikoweshe abene ku banakashi, pantu baliisungile abene abakusanguluka ku bulalelale.Aba bene ebakonka umwana wampanga konse akoya. Aba e balubwillwe ukufuma mu bantu nge ifisabo fya ntanshi kuli Lesa na ku mwana wa mpanga. ⁵ Takwali ubufi ubwasangilwe mu tunwa twabo;abakubula akalema. ⁶ Nali mwene malaika naumbi akopupuka mu lwelele, uwakwete imbila nsuma yamuyayaya iya kubila kuli abo abekala pe sonde - ku nko shonse, umutundu, ululimi, na bantu. ⁷ Alibilikishe ne shiwi likalamba, " Tineni Lesa no ukumupela ubukata. Pantu nshita yakwe iya bupingushi ilishile. Mushinshimuneni, umo uwa bumbile umulu, ne sonde, bemba, na utumfukufuku twa menshi. ⁸ Naumbi malaika - malaika wa cibili - alikonkele, akotila ati, " Aliwile, aliwile babiloni mukalamba, uwa songelekenye inko shonse ukunwa umwangashi wa cipyu ca bulalelale." ⁹ Naumbi malaika - malaika wa batatu - alibakonkele, akotila ne shiwi likalamba, "umfwa uli onse apepa ici ciswango na icimpashanya cakwe no ukupokelela ululembo pa mpumi yakwe nangu pa kuboko kwakwe, ¹⁰ kabili ali nokunwa no mwangashi wa cipyu cakwa Lesa, Umwangashi uyo uwapongolwele uushasankanishiwa icili conse mu lukombo lwa bukali bwakwe. Umuntu uyo uunwa ali no kulungushiwa mu mulilo na kuli salfere pa cinso caba malaika bamushilo aba kwa Lesa na pacinso ca mwana wa mpanga. ¹¹ Ne cushi ukufuma ku kulunguluka kwabo cikema umuyayaya muyayaya, kabili tababa na kutusha akasuba nangu ubushiku - aba bakapepa ba ciswango ne cimpashanya caciko, na onse ukapoka ulembo lwe shina lya ciko. ¹² Pano epali ubwite bwa kushipikisha mumuteka -tima ukwa bantu bakwa Lesa aba mushilo, abo aba sunga amafunde yakwa Lesa ne icitetekelo cabo muli Yesu." ¹³ Nalyumfwile ishiwi ukufuma ku mulu likolanda ati, " Lemba ici: Bakupalwa abafwa aba fwila muli Shikulu." "Eee," efya landa umupashi, " Ukwebati batushe ukufuma ku milimo yabo, pantu imilimo yabo ikobakonka." ¹⁴ Naliloleshe, kabili kwaliko ne kumbi lya kubuta. No waikwikele pe kumbi alikumoneka kubati ni umo umwana wa muntu. Alikewte icilongwe ca golide pa mutwe wakwe ne cikwakwa icakutwa mu minwe yakwe. ¹⁵ Nomba naumbi malaika alishile ukufuma mwi tempele no kubilikisha ne shiwi likalamba kuli uyo umo uwaikela pe kumbi: "Pita icikwakwa cobe na ukutampa ukulobolola. Pantu inshita ilifikile iya kulobolola, pantu ubulobolo lwa pe sonde bulifikile." ¹⁶ Elo umo u waikele pe kumbi alishumpwile icikwakwa cakwe pe sonde, ne sonde lya lisombwelwe. ¹⁷ Naumbi malaika alishile ukufuma mwi tempele lya mu mulu; nao alikwete icikwakwa cakutwa. ¹⁸ Nakabili naumbi malaika alishile ukufuma ku cipailo cakufutumwinapo, uwakwete amaka pa mulilo. Ali kutile neshiwi likalamba kuli uyo umo wakwete icikwakwa icatwa, "Pita icikwakwa cobe icatwa no kukolonganya ifi sansangu fya mwangashi ukufuma mwibala pe sonde, pantu ifisabo filipile." ¹⁹ Malaika alishumpwile icikwakwa pe sonde na ukulbolola ibala lya mwangashi pe sonde. Aliciposele no mwakukamina imyangashi umukalamba umwa cipyu cakwa Lesa. ²⁰ Icikamino ca mwangashi calimikwe kunse ya musumba, no umulopa wa lipongolokele ukufuma mulya mwine iyalepele ukufika ku mikobelo yaba kalemba, pa mpendwa 1,600.