¹ Mu mulu mwalimoneke icishibilo cacipesha amano: umwanakashi alifwele akasuba, no mwenshi panshi ya makasa yakwe ne cilongwe ca ntanda ikumi limo na shibili kumutwe wakwe. ² Alimite, kabili alikulila ku butanshi bwakufyala, mu bukali bwa kufyalwa kwa mwana. ³ Nomba icishibilo calimoneke mu mulu: Mona! kwaliko icisoka icikulu icakukashika icakwete imitwe cine lubali na masengo amakumi, kabili kwaliko ifilongwe fine lubali pa mitwe sha ciko. ⁴ Umucila waciko walikululwile intanda shakulenga butatu mu mulu no kushilampula panshi pa calo. Icisoka caliminine ku ntanshi ya mwanakashi wali mupepi mukufyala, pakweba ati ulo akopapa, cimulile umwana wakwe. ⁵ Umwanakashi alipapile umwana umwaume, umwana mwaume, uwakwisa kuteka inko shonse ne nkoto ya cela. Umwana wakwe bali musompwele kuli Lesa na ku cipuna cakwe, ⁶ kabili umwanakashi alifulumukile mu matololo, ku ncende uko Lesa amupekanishishe, pa kwebati alingilwe ukusungwako pa nshiku 1,260. ⁷ Nomba mu mulu namo mwalimine ubulwi. Mikaeli na bamalaika bakwe balikulwisha icisoka, kabili icisoka na bamalaika baciko balalwisha ukubwekeshamo. ⁸ Lelo icisoka tacali namaka ayengi ayaku cimfya.Eco takwali incende yakwe mu mulu na bamalaika baciko. ⁹ Icisoka icikulu-cilya cisoka cikote icitwa Kasebanya nangu Satana, icilufya icalo conse-baposele pe samba lya calo,na bamalaika baciko baliposelwe kumo panshi nankwe. ¹⁰ Nomba naumfwile ishiwi ilikalamba mu mulu; "nomba ipusukilo lilishile na maka no bufumu bwakwa Lesa wesu,ne nsambu sha kwa Krisitu wakwe. Pantu uwali kubepesha bamuninane balimufwinta panshi, umo uwalikuba bepesha ku cinso cakwa Lesa akasuba no bushiku. ¹¹ Balimucimfishe ku mulopa wa mwana wa mpanga na kubunte bwa cebo cabo, pantu bena tabali kutina kulufya myeo yabo mpaka ne mfwa. ¹² Eico sekeleleni, mwe myulu na mwebo mwebekalamo! Lelo akalanda ku calo na kuli bemba, pantu kasebanya alishile kuli mwebo! Aliswilemo no bukali sana kabili alishibe ukweba ati alishelefye na kashita akanono! ¹³ Ulo icisoka caishibile kwishiba ati baliciposele panshi pesonde, cali fulumwine ulya umwanakashi uwafyele umwana umwaume. ¹⁴ Lelo umwanakashi alipelwe amapindo yabili ayakalamba aya kwa kapumpe pa kwebati afulumukile ukuya kucende iya pekanishiwe kuli ena mu matololo. Iyi incende uko afwile asungwa bwino, pa nshita, inshita, kabili na citika wa nshita-ukufuma kucinso ca cisoka. ¹⁵ Ne cisoka calipongolwele amenshi ukufuma mukanwa kaciko kubati ni nyika pakweba ati cipange ilyenshi lyakonaula. ¹⁶ Lelo calo calyafwilisheko umwanakashi. Icalo caliswile akanwa kaciko no kumina inyika iyo icisoka calikupongolola ukufuma mukanwa kaciko. ¹⁷ Nomba Icisoka epakufulilwa umwanakashi kabili calile ku kukulwisha ababufyashi bakwe, abo abalikubela amafunde yakwa Lesa no kwikatilila na ku bunte bwakwa Yesu. ¹⁸ Nomba icisoka caliminine pa mucanga ku lulamba lwa bemba.