¹ Ubusokololo bwakwa Yesu Kristu ubo Lesa amupele ukulanga ababomfi bakwe ififwile ukucitika mukwangufyanya. Alicilengele ukwishibikwa pakutuma umungeli ku mubomfi wakwe Yohane, ² Uwali kambone palwa cebo cakwa Lesa no bunte bwakwa Yesu Kristu, ifintu fyonse ifyo amwene. ³ Wakupalwa uyo akobelenga akobilikisha ubu ubusesemo nabo abakoumfwa ku mashiwi ya ubu ubusesemo na bakonakila kufyalembwamo, pantu inshita ilipalamine. ⁴ Yohane, ku nkuta cine lubali isha mu Asia: Uku senaminwa kube kuli mwebo no mutende ukufuma ku waba, kabili uwaliko, kabilli uukoisa, no kufuma ku mipashi cine lubali ishaba ku cipuna cakwe, ⁵ No kufuma kuli Yesu Kristu, uuli ni kambone wacishinka, ibeli ukufuma ku bakufwa, kabili kateka wa shamfumu shapa calo. Kuli uyo uwatutemwa kabili uwatulekelela fwebo ku membu ukupitila mu mulopa wakwe - ⁶ alitulenga ukuba isano, bushimapepo kuli Lesa wakwe kabili wishi -kuli ena kube ubukata na maka umuyayaya no muyayaya. Amen. ⁷ Moneni, akoisa na makumbi; ilinso lyonse likamumona, ukubikakofye nabo abamulashile Imitundu yonse ikalosha pamulandu wakwe. ⁸ "Ninebo Alpha na Omega." efyalanda Shikulu Lesa, "Uliko, uwaliko, kabili uuli no kwisa, uwamaka yonse." ⁹ Nebo, ne Yohane-munyinenwe kabili umo uwabana na mwebo mu macushi no bufumu no muteka-tima mukushipikisha ukwaba muli Yesu- nali pa cishi icalikwitwa Paitimos pamulandu wa cebo cakwa Lesa no bunte bwapali Yesu. ¹⁰ Nali mu mupashi pa bushiku bwakwa Shikulu. Kunuma yandi nalwumfwile ishiwi ilikalamba kubati ni ntandala. ¹¹ Lyatile, "Lemba mucitabo ifyo ukomona, no kufituma ku nkuta cine lubali- ku Efeso, Simina, Pagamo, Tiyatila, Sadisi, Filadelfia naku Laodikea." ¹² Nalipilibukile kunuma ukwebati imbone ishiwi lyalikulanda kuli nebo, ilyo napilibukile namwene ifya kutekapo inyali ifya golide cine lubali. ¹³ Pakati kafyakutekapo inyali pali umo uwalikumoneka kubati mwana wa muntu, alifwele umwingila uutali uwalikufika panshi ya makasa yakwe ne cakuikubanya ica golide ico aifimbile ku cifuba . ¹⁴ Umuntwe wakwe no umushishi fyalibutile tuutu kubati butonge- nangu kwati bunga bwamfula - na menso yakwe yali kubati lubingu lwa mulilo. ¹⁵ Amakasa yakwe yali kubengeshima kubati mukuba, ngo mukuba uwalopololwa mu mulilo,ne shiwi lyakwe kubati ciunda cakupoma kwa menshi. ¹⁶ Alikwete Intanda cine lubali mukuboko kwakwe ukwa kulyo, kabili no lupanga ulwatwa kubili lwalikufuma mukanwa kakwe. Icinso cakwe calikubengeshima kubati kasuba ngakabalikisha. ¹⁷ Ilyo namumwene, naliwile pa makasa yakwe kubati muntu wakufwa. Alibikile ukuboko kwakwe ukwa ku kulyo pali nebo no kulanda ati, "Wiba no mwenso. Nine wantanshi kabili uwakulekesha ¹⁸ kabili uyo uwamweo. Nalifwile, nomba mona, ndi uwa mweo umuyayaya pe! Kabili ndikwete imfungulo sha mfwa na ku mbo. ¹⁹ Eico lemba ifyo wamona, ifilipo nomba, nefikesa kucitika panuma yaifi. ²⁰ Nomba pa bupilibulo ubwafiswa palwa ntanda cine lubali wamwene mu kuboko kwandi ukwa ku kulyo, nefya kutekapo inyali ifya golide cine lubali: Intanda cine lubali ni bamalaika ba nkuta cine lubali, ne fya kutekapo inyali cine lubali ni nkuta cine lubali."