¹ ''Ne teka ma we te ding kulangyo ma mema ka bi. ² Ta forma ta mina-abo. Pene koddi ta waru mo tukama ta nyimmani ya shi ta yaani shuran Yamma. ³ Shinui ta ya peen we te longku Fowiim ye neim. ⁴ Ne teka ma te kulang ma koddi ma wanna, ma ta nyimmani ne pegraa ma. Nei tewma ka toomum, longku kama ka shaayi. ⁵ Wende neta wanno shikno mo shunnano, pene a doo mo telano, 'ke ta war tongeem?' ⁶ Pene longku ye ne teka ma we te, turmon yiuma kping. ⁷ Pene ne teka ma yen kulli, ma nei koom, an pegro a ta waru shikmam, pene manaa kookano, ne ta shuru shii ti ma. ⁸ Maa foonna ta shi, an pegroi ta shukani ti kubuk kelmo paaro shasshalau, ⁹ kan paaro yen kpang, kan shiire- paaro shasshalau, longku ye shinui kumu kan nem; ¹⁰ ti Ku paaro yen kpang, longku ne ta wanno jeleno Fowi, birang ma ta we shiknom; ¹¹ ti Ku paaro Shiite, longku fuwa po ya shiire ti Ku angup kubuk te. ¹² Ne kan we yen gbe yeno po tewma, pene ma ta dum penani wendeim. ¹³ Pene shii, shoomin kulli, maa wanna, ta shugma wee yen kullii, shii a ta yaani paaro po kuunim. Pene ta tewani wee ye yaanna, birang ta tewma wee ta waru. ¹⁴ Shii ta shokrono, longku shii ta sharani ti shakki paaro yei weeno in tewma. ¹⁵ Wee ye Fowi kan te ding jal weeno. Wo longkuno te, Yene teka na shoom ta sharuii weeno in tewma. ¹⁶ Ti ta koddi la wiu ma ta we shikno birangum, maa la nesshaa birang ma ta we shikno." ¹⁷ Nang peddi me an yiu shubetni in ya telyo ti shaayi, "We tenei wen ye shii tekamu kama ya, 'ti ta koddi la wiu ma ta we shiknom kan ma la nesshaa ma ta we shikno,' kan, 'Longku ne ta wanno jeleno Fowi'?" ¹⁸ Nang shinui in tel shii ya, "Wo paaro wene ye ke teka ka, 'Koddi la wiu'? minaa peno wene ke sheeraa tem." ¹⁹ Yeesho in geena legejui ka telni, nang in tewon ti shinui ya, "Tenei wee ye ma ta tenglon shaayi ti kwi ya,wee ne teka na, 'Ti ta koddi la wiu ma ta we shiknom, kan ma la nesshaa ma ta we shikno'? ²⁰ Ne tekama yen kulli, ma ta ya kwee, pene kubuk ta ya beere. Posheerima ta daklani, pene daklan posheerima ta yoro we beere. ²¹ Pomun ma ta ya patti kan shilibro longku koddi yuwa,pene ma fuwa po patto lai, tei ta nyimmo shilib ye weyaim longku beere weyan niyon ding ti kubuk. ²² Wendei koddi daklan ta aama, pene ne ta we shikma birang, posheerima in twaalla, a doo mo ta shar ma twaalan sheerimam. ²³ Maa darangii ma ta tello ka we birangum. Ne tekama yen kulli, mama telaa we ding ti kirano Fowi ti ta shomono, Shii ta minma. ²⁴ We war wendei mai telo we ti ta shomono tidangum. Ma telo ta minma, longku beerema in kemoro." ²⁵ "Ne tebraama we te kaa pelle shiwon-shik-paaro, pene koddi ta waru ne ta yuuma paaro ka pelle shiwon-shik-paarom, pene ne ta tewmai paarono Fowii ti ku dam. ²⁶ Maa darangno tere ma ta ya telyo ti ta shomono nei tewma na ne ta waara beng Fono ka longkumam, ²⁷ Fowi Yamma po kuuni lekama longku ye ma lekannen birang man kumi ne pennai ti jeleno Fowi. ²⁸ Ne pennai ti jeleno Fowi, nen riru kubuk. Birang ne ta wessho kubuk nen meeno jeleno Fowi." ²⁹ Me an yiu shubetni ya, "Ma gee, wende ke ta ya paaroi ti ku dam ke ya kaa pelle shiwon-shik-paarom. ³⁰ Wende min penaa ke penaa we ding, a doo mo ta dum yuuko telyo birangum. Longkuno te, min kunnga ke penna ti jeleno Yamma." ³¹ Yeeshon liginon ti shinui, "Ma kunnga wendaa? ³² Ma gee, koddi ta waru, Oo, wende foonaro, ye ta lekroma taama, koonong we war minani, man wesshono ne dokno. Pene a jalnom longku minan Fowi ka shaayi. ³³ Ne tekama we te longku man we kuttan sheeri ti taano. Ti kubuk ma ta weyani turmo, pene ma shero bang, ne yeka bang kubuk."