¹ Na i karuwa ni vola ikwe, aqu qai volaiya yaji ke vuwako mutou, aqu vauqe jiya ke mutu yalo e savasava mo mutu numiya no, ² mo mutu vanumiya na tata eru tatatakiniya i devu i mata o rau na parofita yalo savasava, qaneya lemadu vunau na apositolo ni Turaga nai vacolo. ³ Ni mutu vo kilajiya rewa ikwe, niru lamai ina gauna i bere. O rau na dauvivasewasewani eru na dau tekuciya na ledru gagano bura. ⁴ Eru na kwa, "I vei na tata ni yalayala ni na lesu tale mai o keya? niru vo moce ga na qase, na vikwa taucoko eru si kodaki no ga na vikwa eru a buli mai na vatekivu." ⁵ Ia na vikwa ikwe eru okajiya meru numidei niya na kwakwa ni Kalou ni vo nokoto no mai lomalagi i vuravura muni nivo wase mai na wai, ⁶ evo nokoto no ina vuku ni wai, evo varusai ke na vuravura a nokoto no mai mata, ina waluvu. ⁷ Ia na lomalagi qaneya na vuravura e nokoto no ikwe evo maroroi jiya ga ina tata talega, e maroroi jiya ke na bukawaqa me yaco re na siga ni lewa qaneya na siga ni vivarusai vuwadru na tamata tasi lotu. ⁸ I vuwako mutou na lai lomani, mo mutu kuwa ni numideiniya ikwe, nivo tautauvata vuwa na Turaga e kiya na siga vata na yabaki, e kiya na udolu, vata e kiya na yabaki e kiya na udolu, qaneya na siga e kiya. ⁹ E jikai ni berebere na Turaga ni vaveya na leya tata ni yalayala, me kodaki eru numiya eru yavale na tamata ni berebere. Evo vosojiko datou vabalavu. E jikai ni okajiya e kiya me rusa, meru vivutuni ga na tamata taucoko ga. ¹⁰ Ia na siga ni Turaga ena kodaki leya mai na daudriva qena bogi, ena ladai ke o lomalagi ena rorogo e tatamosamosa, ena waicala muni na vivunikai eru na vacece, e na vaqeyavu taki muni o vuravura qaneya na kwa taucoko e nokoto no ke. ¹¹ Ia niru vo lavele yaji na vikwa taucoko ikwe, na i varau ca re e dodonu i vuwako mutou, ina varau e savasava qaneya na daulotu. ¹² Ni mutu vo dauwaciya no na keya gauna me na yaco mai ke na siga ni Kalou, ena takwali ke o lomalagi ni vo vayagi dai ena wacala muni na vi vuni kwa nivo vayagi. ¹³ Ia i vuwako datou me kodaki na leya tata ni yalayala edu vo waciya no na lomalagi vou qaneya na vuravura vou e nokoto noke nai varau e dodonu. ¹⁴ O keya ikwe, o mutou na daulomani, no mutu vu waciya no na vikwa ikwe, mutu gumatuwa ke me daniko mutou o keya ina vivacegui, ni mutu vo jikai ni tauvi duka, mutu jikai ni cala. ¹⁵ Mo mutu djina jiya vosojiya vabalavu ni ledu Turaga me du colo ke, me kodaki a volaiya muni o wekadatou o Paula me kodaki na vuku a soli vuwa. ¹⁶ Me kodaki taucoko na leya i vola a volaiya, evo kwa ke evo nokoto noke eru yavalu nakwa e dredre medu kilajiya. Ia o rau eru jikai ni vuku eru jikai ni yalodei , eru vo kau vatani me kodaki muni ke nai vola tabu taucoko, meru na rusa ke. ¹⁷ Ia o mutou na leya lomani, mutu vo kilajiya i mata, mutu vatolaviko mutou muni, me mutu na kau vatani ina ledru vivacalai na tamata i varau bura me mutu na lutu mai ina lemutu tu dei. ¹⁸ Ia mutu tubu cake ina loloma mo mutu kilajiya oka na ledu Turaga o Jisu Karisito nai vacolo. Me vai vuwa na varokoroko ina gauna ikwe me tawa mudu. Emeni.