¹ Ia evo nokoto no vuwadru na kwai ledatou i matau yavalu na parofita girigiri, kodaki muni ke eru nokoto no vuwako mutou eru yavalu nai vavuvuli giritaki eru na kau no mai na viburaji e vavuniya na vivarusai, niru vo numidei niya na Turaga a volidru, aru vo vaveya vasauri na ledru rusa. ² Eru na lewe levu muni eru na tekuciya na ledru i varau e vasisila ena tata vaburaburataki muni nai vavuvuli djina me balejidru. ³ Eru daukocokoco eru vo vaiyau rewa tu ke me balejiko mutou ina tata ni vivakwaisini is lewa makawa meru bura evo jikai ni berebere avo jikai ni moce na ledru rusa. ⁴ Ia kodaki a jikai ni lomanidru na agilosi aru a valavala bura na Kalou, avo meidru bale i eli, avo vesukidru ina senicodo ni gilogilo, meru lai qulumi no me yacoviya na siga ni lewa. ⁵ Ena jikai muni ni lomanidru na kwai vuravura makawa, a vacolo niya o Noa qaneya eru lewe vitu tale, o keya a auvunau takiniya nai varau dodonu, e valuvucidru na kwai vuravura eru jikai ni lotu. ⁶ Na Kalou eya vacece niya na rara o Sotoma qaneya o Komora me jiya ravu, e va qeyavutaki niya nivo ocajiya, eya lesiya me kedru i sau na jikai notu ina gauna mai bere. ⁷ A vacolaniya o Loji na tamata yalo dodonu, eya rarawa valevu e yaloga o keya ina vuku ni ledru varau bura na tamata valavala ca. ⁸ Ia evo nokoto no na tamata yalo dodonu o keya na kedru maliwa, niru vo rogociya eru tolaviya muni e vararawataki e yalo dodonu ina visiga me balejiya na ledru i varau bura. ⁹ Evo kilajiya no muni na Turaga me vacolo nidru o rau na daulotu mai na vivatovolei, e maroroi jidru muni o rau na tasi lotu me yacoviya sara na siga ni lewa meru na qai lai ocaji. ¹⁰ Ia ena valevu sara ke o rau na dauvatekiciya eru yago ina gagano e bura e dukaduka eru daubecidru na turaga. Eru daubole, eru dau yalo kaikai eru jikai ni mataku meru tata vaburabura takinidru na turaga. ¹¹ Ia o rau na agilosi eru vo uwasivi cake ina kaikai qaneya na igu, eru jikai ni beitakinidru se tata vaburabura takinidru i na mata ni Turaga. ¹² Ia o rau ikwe eru kodaki na manumanu e jikai ni vuku, eru tekuciya ga eru yalo, evo vai meru vesuki meru varusai, eru tata vaburabura takiniya na vikwa eru jikai ni kilajiya ia eru vo varusa ke ina vuku ni vikwa eru jikai ni kilajiya, ia eru na rusa ga ina ledru i varau e vivarusai. ¹³ Eru na rewajiya nai sau ni varau e tasi dodonu, niru vo vakasama takiniya me kwa ni reki nai varau ni marau i na visiga, eru vo dukaduka lavata ledru velavela eru dauvaveya ga na ka eru marau ke niru dauvivakwasini, eru dau vaveya na kana ni vilomani qaneko mutou. ¹⁴ Evo vuqa tu eru mata na dauyalewa, e jikai ni mudu rewa na ledru varau bura, eru dauvavea nidru na tamata eru vo yalo qai ru yaloga e daukocokoco. Eru luve ni vivarusai! ¹⁵ Eru vo ladai mai na calevu e dodonu, eru vo sese niru vo tekuciya no leya i varau o Pelamilai luve o Posori, o keya a okajiya na leya i voli na varau e jikai ni dodonu. ¹⁶ Ia e qai lai vunauci ina vuku ni leya i valavala, e eya qai tata vuwa na asa galu ina domo ni tamata avo taroviya ke na lialia ni parofita. ¹⁷ Ikwe na mata ni wai e jikai ni to, evo vikauyaki ina cagilaba evo nokoto no ga me ledru ga na lolo me tawa mudu. Niru vo tata takiniya na tata e tubu cake ga mai na lialia. ¹⁸ Eru vo rewajidru mai na tamata ina ledru gagano vayalo ina varau vasisila. ¹⁹ Eru vo yalatakiniya i vuwadru na gwalala, i vuwadru na vabobulataki ina valavala bura, nivo vabobulataki na tamata ina vikwa evo rewajidru ke. ²⁰ Ia kodaki eru vo tuba dai mai na dukaduka ni vuravura ikwe niru vo kilajiya no na Turaga o Jisu Karisito, meri na Tao tale ke, me rewai ke eru na qai bura valevu ga ke na gauna mai bere, eru si bura valailai ga mai mata. ²¹ E oka cake vuwadru meru kuwa ni kilajiya nai varau e oka, e bura meru kilajiya rewa oji aru qai yalobo jiya nai vunau tabu evo soli devu vuwadru. ²² Ia evo yaco djina ga vuwadru na kwa evo kwa devu tu na tara vaibalebale djina, "Evo lesuviya tale na tui na leya luwe, qaneya na vore evo sisili devu oji qai lai toni tale ina dadala."