¹ O au o Saimoni Pita, leya i talatala qaneya leya apositolo o Jisu Karisito, Vuwadru na vo rewajiya na vabaujiya talei evo tautauvata qaneko madou ina lemadu yalo dodonu eya soliya wale vuwako madou na Kalou o Jisu Karisito nai vacolo. ² Me valevutaki vuwako mutou na loloma qaneya na vacegu, no mutu qai vikilai qaneya na Kalou vata o Jisu na ledu Turaga. ³ Ni vo soliya mai vuwako datou o keya ina leya kaikai Vakalou na kwa taucoko ga e yaga ina ledu colo qaneya na lotu muni, nidu vo kilajiya evo coviko datou o keya ina vanuwa vaiukuuku qaneya nai varau e oka. ⁴ O keya ikwe eco soli ke vuwako datou na tata ni yalayala e levu sara e talei, no mutu rewajiya ke na vikwa vakalou, no jutu vo tuba dai mai na varau dukaduka eru notu ina vuravura ikwe ina vuku ni gagano bura. ⁵ Ia ina vuku ni kwa ikwe, mutu gumatuwa valevu sara ke, no mutu vaikuritakiniya lemutu vabaujiya ina valavala e oka, qaneya nai valavala oka ina vuku, ⁶ vata qaneya na vuku ina i varau e malua, vata nai varau malua ina vosojiya, vata na vosojiyaina daulotu, ⁷ qaneya na daulotu ina vilomani vitacini, ina vilomani vavitacini ina yalo loloma. ⁸ Ia kodaki evo notu mutu yaloga na vikwa ikwe, evo tubu cake me levu, eru na uqejiko mutou mo mutu kuwa ni vucesa se mutu jikai ni vuwa ina lemutu kilajiya na ledu Turaga o Jisu Karisito. ⁹ Ia o keya e jikai ni vuwa na vikwa ikwe evo mataboko, evo buwawa e mata evo numidei jiya nivo vasavasavataki devu tu mai mata na leya i varau bura. ¹⁰ O kemutou na viwekani, no mutu gumatuwa cake mo mutu vadeitaki niko mutou na lemutu lai covi qaneya lemutu a djigitaki mai, ni mutu na jikai ni lutu, kodaki mutu na vaveya na vikwa ikwe. ¹¹ Nivo soli valevu yaji me rewarewa ke i vuwako mutou ina lemutu unu ina matanitu tawa mudu ni ledu Turaga. ¹² O keya ikwe aqu na jikai ni cegu na vanuniko mutou no ina vikwa ikwe, e djina mutu vo kilajiya no, mutu vo vadeitaki devu ina vavuvuli ikwena. ¹³ Ia aqu vo vakasamatakiniya ni dodonu, ina visiga niqu nokoto no ina were vacevaceva ikwe, mequ vauqe jiya no mutu yalo mo mutu numiya no. ¹⁴ Ni qu vo kilajiya no aqu na varau ni biujiya dai na lequ were vacevaceva ikwe, me kodaki leya kwa mai vuwako au na ledu Turaga o Jisu Karisito. ¹⁵ Ia aqu na gumatuwa no ga mo mutu na numiya no ga na vikwa ikwe, niqu na mate. ¹⁶ O madou madu jikai ni tekuciya nai tukutuku eru vaveya na vuku, madu na kwa ga na leya kaikai qaneya na leya lamai na ledu Turaga o Jisu Karisito, is madu a tolaviya djina na leya i varau vaturaga. ¹⁷ Ni a yaco keya mai vuwa na Kalou o Tamaya na varokoroko qaneya vidokadoka, nivo rogo sara vuwa na domo igina ina ukuuku djina sara kodaki ikwe, "O kiya ikwe na lequ i luve ni toko, aqu vo okajiya valevu." ¹⁸ Ia na domo ikwe mai lomalagi madu a rogociya ni madu a no qaneya no mai na vatelaga tabu. ¹⁹ Evo nokoto no muni i vuwako datou na kwakwa e vadjinadjina taki valevu cake, na parofisai, is mutu vaveya na kwa oka, kodaki mutu na vakasamatakiniya no, me kodaki na sina e serafina vanuwa e gilogilo, valailai ga me qai kakarama mai qena qwata, me cabe mai mutu mata ni yalo kalokalo volasiga. ²⁰ Ni mutu vo kilajiya devu tu na kwa ikwe, ni vo jikai na parofisai ina vola tabu e vu ina keya kilai i mata na keya balebale. ²¹ E jikai ni vu mai na parofisai ina gauna i mata ina lewa ni tamata, na leya tata ga na tamata yalo savasava ni Kalou nivo vameidru tu na Yalo Tabu.