¹ Mẹmẹ onyo ẹga na oyhanẹ, mẹ zhalo wa, ku walẹ cha ulucha unugbima una gwẹ wa zo. ² Mẹ zhalo wa, kuwa hẹ atẹzẹgbẹ anagẹdẹ, kẹlẹ kẹ egua na foo, kẹlẹ kẹ efuezẹgbẹ zo li hena, eyhehina ẹnana egua uguda. ³ Wa ruẹ nyi ẹla yhemi va, elezu awuviah nahawa riogua, zo egua ẹho, ashoo. ⁴ Ẹgbẹ gun kẹlẹ kẹ Eho gun no, nyi zila gwẹ wa zo egua ẹkẹhẹ mẹ gun. ⁵ Iyokpa, no Oyhanẹ ogun, uyheyho mugun, etizamẹ agun, ⁶ Iyhokpano, Oyhokose ogun, iyha zhakpabi, ono gazẹ kekemi, cha kekemi na keke mi. ⁷ Na onyo osuosuo ma, na ha azhofẹ na cha umamazhẹ, ẹnahẹ ẹwi Ikiristi. ⁸ Nyi akolẹ Oyhokose asẹwẹ, ''Nyi no la yhawaha, ogbe - omu, ẹkpukpa ni mua, alahẹ ẹnahẹ na ibooni. ⁹ Ene ẹno ni zhizana, ''Oyhawaha'', ẹnẹ ko kẹlẹ gbazi ẹchẹ ugbono? ¹⁰ Onyo nozẹ gbazi, onẹ ozẹkẹlẹ yhavha vẹnẹ okunozakpa, ubo kohẹ mozẹ kekemi. ¹¹ Ikiristi onahẹ ibojo - evuyho, ẹjo ẹmiaru, ẹjo ẹjozhale, ẹjo ẹẹkozẹ kẹlẹ kẹ ẹẹkazẹ. ¹² Ohẹ ẹnahẹmẹno gwichi na ibo nẹ fuema Oyhokose ubokẹ ẹhaigbakaya, ahabo ha chehebao ẹgbẹ Ikiristi. ¹³ Nyo no lalẹma ẹgbẹ oni lẹso kabẹshẹ megbele kwẹ ẹgbẹ gbe zo egua uyheyho kẹlẹ ke anẹzẹ owoo omo Oyhokose, mekili riehinazo, meheje umamazhi omolomo ẹwhi Ikiristi. ¹⁴ Ikiristi ohama rienazo oku, oboku mẹ ki ka lẹ gbẹ nyi ebia nẹ fiozi lẹ zo aru kẹ esshi, ne evele vele awẹ alẹsẹ nẹ ẹrẹ eka zama waha. ¹⁵ Eyha ano, wa hun ugudah lẹ wa atah zo egua ni, onyo no ri ikhama, onẹ ki Ikiristi. ¹⁶ Ikiristi onẹhẹ ẹgbẹ zakpa shẹhẹzo, ri ogun nẹ zẹgbeleze, nyi ẹchẹ osuosuo ẹlayheli gbakayani, ẹno nẹ gbahaẹ ẹchẹ nẹkpo shẹhẹzo, ubo kẹ ẹgbẹ zakpa izhuma, ẹshẹhẹlẹzo, ẹmo nu uguda. ¹⁷ Ubohasha no Oyhan ohazo, wha kẹkẹlẹcha, ulueha, nyi ibonikẹ nẹzẹ Oyhokose ẹla cha, nyi egua ẹja ala runaa. ¹⁸ Egua uguzolẹ ma ẹja amonu ubi, khẹgbẹ gbẹ ogbo Oyhokose shehe, ubo hikẹ ẹnẹzẹje, kẹlẹ ku ubohegua ẹja na gun. ¹⁹ Iki ri ibo nikẹ ẹyhanu ukah, nẹkẹ hẹgbẹ ẹja rie ẹhana, nẹkẹlẹ hẹ erieve whezina ẹguẹ nikẹ fuẹma azakpa. ²⁰ Ama akio Ikiristi ola khazẹ wa. ²¹ Eholẹmu ku we yho uguo oni, akẹlẹ khazẹ wa cha ẹgua ani, iki atah egue Ijesu na shẹ. ²² Akhazẹ wa kuwe cheze ẹguẹ ni ri ẹlẹhẹ awa kaadẹ, wagwẹ ohozẹ kaadẹ zo. Oohozẹ kaadẹ no vhoa, ubo komo na alẹzẹ. ²³ Akhazẹ wa, kuwa hegua riafafa zo egue ẹho, ²⁴ Wakẹlẹ za ohozẹ ofafa naha gbẹhẹ Oyhokose ma, so - zo ẹgua atah na mo nugu nucha, kẹlẹki ufuema. ²⁵ Ubohunẹo, we cheze ẹrẹ, awakẹlẹ ruẹ koko onyo wa oha attah kolẹ lẹzo onyo onio, uboki ibo ẹgbẹgun mheri. ²⁶ Uhi ri ufa amano, ukhẹzia. Ukẹ ruẹ ohon ruo wa ufa wẹ. ²⁷ Ukika hasha zo ne eshu. ²⁸ Onyo no zouji, urugbegbe ko ki zouji. eyhano, ozumazhiẹgbẹ habo ani li gbakaya neyhemi, uboko hẹ miẹ emi nahẹ ibo nikẹ yhanẹ. ²⁹ Wakẹ ruẹ akolẹ abẹ efi wa unu zi. Wa ruẹ akolẹ wa alẹ fozẹ onyo da egua, ubokẹ ibo ni yha ihi gbo zha azhofẹ. ³⁰ We ki ka so Eho Oyhokose nẹ fuẹma ufa egua, ubohoni na hawa vhẹtẹ na ada uyhana zo. ³¹ We cheze egu uwha mazakpa, ufa - okpenu, ufa, iyhomuso, kẹlẹkẹ ikwumuna, ẹnẹ ẹguẹ nẹbẹ azakpa. ³² Wa yhanẹ egua ne yhemi nana, we li jugwẹ, wa ha ishinauzo, nyi Oyhokose ola cha ukpẹtẹ, Ikiristi ha shiwauzo.