¹ Moki ki é bunitu bus pe dentu sandália, bo ki é fidja di prínsipi! Bu koxa rodondu é sima joia, sima obra di mon di un artezon. ² Bu biku é sima tasa rodondu, ki ka ta falta bebida; bu abidomi é sima un munti di trigu, rodiadu di líriu. ³ Bus dos seiu é sima dos fidju jémiu di korsa. ⁴ Bu piskos é sima un tori di marfin; bus odjus é sima tanki di pexi di Esbon, djuntu porta di Bati-Rabin. Bu naris é sima tori di Líbanu, ki sta frenti di Damasku. ⁵ Bu kabesa riba di bo, é sima munti Karmelu, y transa di kabelus di bu kabesa é sima púrpura; rei sta sima ki e maradu ku bus transa. ⁶ Moki bo é bunita! Moki bo é formoza, bo ki é sabura di amor. ⁷ Bu altura é moda palmera, bus máma é sima katxu di uva. N fla: N ta subi palmera, ⁸ N ta pega di bus ramu; nton bus máma ta ser sima katxu di videra, y txeru di bu naris é sima txeru di masan. ⁹ Bu boka é sima bon vinhu; Vinhu ki ta entra suavimenti na nha amadu, y ta faze boka di kenha ki sa ta durmi papia. ¹⁰ Ami é di nha amadu y el é ta dizeja-m. ¹¹ Ben, nha amadu! Nu sai pa kanpu, y nu pasa noti na aldeia. ¹² Nu sai di madrugada ti vinha, nu odja si videra dja da flor, y si ses flor dja abri, si romanzera dja sta ta brota; la N ta da-u nha amor. ¹³ Mandrágoras dja spadja se purfumu, y djuntu di nos porta izisti tudu tipu di bons frutu, nobu ku bedju; N guarda-s pa bo, nha amadu.