¹ Palavra di Neemia, fidju di Akalia. Kuntise na mes di kisleu, na anu vinti y kuatu, kantu N staba na fortaleza di sidadi di Suzan, ² kantu un di nhas irmon, Anani, ben ku alguns pesoas di Juda, y N purgunta-s pa judeus ki skapaba, restu di judeu ki staba la, y sobri Jiruzalen. ³ Es fla-m: Kes ki subrevivi di kativeru, sta la na pruvinsia ku txeu difikuldadi y disgrasa, pamodi murus di Jiruzalen sta ronbadu ku ses porton tudu kemadu. ⁴ Y kantu N obi kes palavra li, N xinta y N kumesa ta txora pa monti dia. N fika di lutu di jijun, ta ora dianti di Deus di séu. ⁵ N fla: Nhordes, Deus di séu, Deus ki é grandi y maravilhozu, Bu ta mante Bu aliansa y Bu biniginidadi ku kes ki ta ama-U y ta guarda Bus mandamentus. ⁶ Sukuta nha orason y abri Bus odjus, pa ki Bu pode sukuta orason di Bu servu, ki sa ta ora bu dianti, di dia ku noti, pa povu di Israel, Bus servu. N sa ta konfesa pekadus di povu di Israel, pamodi nu peka kontra Bo. Ami ku kaza di nha pai nu peka. ⁷ Nu ten ajidu ku runhesa kontra Bo, y nu ka ten guardadu mandamentus, lei ku rigulamentu ki Bu da pa Bu servu Muzes. ⁸ Purfavor, lenbra di bu palavra ki bu flaba pa Bu servu Muzes: Si nhos aji ku infidilidadi, N ta spadja nhos pa meiu di povus, ⁹ ma, si nhos volta pa Mi y nhos sigi Nhas mandamentus y nhos pratila-l, sikre nhos povu sta spadjadu pa lugar mas lonji dibaxu di séu, N ta torna djunta nhos y N ta traze nhos pa lugar ki N skodjeba pa N stabelese Nha Nomi. ¹⁰ Es é Bus servu y Bu povu, kenha ki Bu risgata ku Bu grandi puder y ku Bu mon forti. ¹¹ Nhordes, N ta inplora-u, obi gosi orason di Bu servu y orason di Bus servu ki ten prazer na onra Bu nomi. Faze Bu servu ten susesu oji, y faze-l atxa mizerikordia dianti di es ómi. Ami N era inpregadu ki ta sirbiba bebida pa rei.