¹ Na mes di Nizan, na anu vinti di rei Artaxerxi, kantu rei silesiona vinhu, N pega-l y N da pa rei. Ami nunka N ka tenba fikadu tristi dianti di el. ² Ma, rei fla-m: Pamodi ki bu rosta sta tristi? Bu ka sa ta parse duenti. Debe ser tristeza di kurason. Nton, N intxi di medu. ³ N fla pa rei: Ki rei viva pa senpri! Moki nha rostu ka ta sta tristi? Sidadi, undi sta sipultadu nhas genti grandi, sta ronbadu, y ses porton kemadu ku lumi. ⁴ Nton, rei fla-m: Kuze ki bu kre pa N faze? N ora pa Deus di séu. ⁵ Nton, N rusponde pa rei: Si ta parse dretu pa rei, y si bu servu ten agradadu bus odjus, nho majistadi pudia mandaba mi pa Judá, sidadi undi nhas gentis grandi sta interadu, pa N pode kunstrui-l di nobu. ⁶ Rei rusponde-m ( y rainha sgtaba xintadu na se ladu): Pa kantu tenpu bu ta fika fora y ki tenpu bu ta volta? Rei fika filis di manda-m kantu ki N da-l data. ⁷ Nton, N fla pa rei: Si for di agradu di rei, é bon ki fazedu kartas y da-m, pa N pode intrega pa guvernadoris di pruvínsias ki ta fika situadu dipos di riu, pa es pode pirmiti-m pasa pa ses teritórius, na nha kaminhu pa Juda. ⁸ Ki na meiu di kes karta, pudu tanbe un karta pa Azafi, guarda di floresta di rei, pa ki e pode da-m madera pa faze viga di porta di fortaleza paertu di tenplu, y pa paredi di sidadi, y pa kaza undi ki ta bai mora. Nton, trokadu bon mon di Deus ki staba ku mi, rei atende nhas pididus. ^{9 10} N bai ti guvernadoris di pruvínsia ki fika situadu dipos di riu, y N da-s karta di rei. Y djuntu ku mi, rei manda uns ofisial di izérsitu ku kabaleiru. Kantu Sanbalati, kel oronita, y Tubias, ofisial amunita, obi di kel-la, es fika iradu, pamodi txiga algen ki kreba djuda povu di Israel. ¹¹ Nton, N bai pa Jiruzalen, y N fika la pa tres dia. ¹² N labanta di noti, ami ku alguns ómis. N ka konta ningen kuze ki Deus pui na nha kurason pa N faze na Jiruzalen. N ka tenba ninhun animal ku mi, alen di kel animal ki N staba muntadu riba di el. ¹³ N sai di noti pa porta di Vali, na direson pa fonti di Dragon y pa porta di Bosta y N izamina muru di Jiruzalen, ki dadu ku el na txon, y kes porta di madera ki lumi kema. ¹⁴ Nton N bai ti porta di Fonti, y pa barajen di rei. Ma, pamodi lugar era txeu stretu, N ka tenba moda pasa ku animal ki N sataba muntadu na el. ¹⁵ Nton, nu bai na kel noti pa rubera y izamina muru, y N volta y N kanba pa porta di Vali, y asi N volta. ¹⁶ Guvernantis ka sabeba undi ki N baba o kuze ki N bai faze, y ami inda ka informaba pa judeus, nen pa saserdoti, nen pa nobris, nen pa guvernantis, y nen pa kes otu ki N sa ta bai faze kel trabadju. ¹⁷ N fla-s: Nhos odja prublema ki nu sta na el, sima Jiruzalen sta ruinadu y moda ki ses porton sta distruidu pa lumi. Nhos ben, nu ben kunstrui muru di Jiruzalen pa nu ka vive mas na es disgrasa. ¹⁸ N konta-s ki bon mon di Nha Deus staba riba mi, y tanbe riba palavras di rei, ki e fla-m. Es fla: Nu labanta y nu kunstrui muru. Nton, es fortalese mon pa pega na obra. ¹⁹ Ma, kantu Sanbalati, kel oronita, y Tubias, kel ofisial, y Gezen, kel árabi, obi kel-li, es faze-nu trosa, es dispreza-nu y es fla: Kuze ki nhos sa ta faze? Nhos sa ta rebela kontra rei? ²⁰ Y N rusponde-s: Deus di séu ta faze-nu tan susesu. Anos é Ses servu y nu ta labanta y nu ta kunstrui. Ma anhos, nhos ka ta ten parti, nen direitu y nen memorial na Jiruzalen.