¹ Gosi, djunta na pozison di batalia, filia di gérerus. Ke-s gérerus munta un serku djuntu sidadi, ku un vara es bati na rostu di juis di Israel. ² Ma bo, belen Efrata, inda ki bo é pikinoti entri familia di Judá, di bo ta ben pa mi kel ki ta ben governa Israel, kuju se linhaji e desdi tenpus antigus, desdi iternidadi. ³ Pur isu Diós ta ben abandona nhos, ti momentu ki e fika na trabadju di partu y e da lus a un fidju, y restantis di ses irmon ta volta a fidjus di Israel. ⁴ É ta labanta y konduzi si ribanhu, na forsa di Nhordés, na grandésa di nomi di Nhordés, si Diós. Es ta permanesi, pamodi, na kel tenpu, e ta ser grandi ti limiti di tera. ⁵ E ta ser nos pas. Oras ki asirius ben pa nos tera, oras kes ben kontra fortaleza; N ton, nu ta labanta kontra es seti pastoris y oitu nobris. ⁶ Kes omi la ta toma konta tera di asiria, ku ispada, I tera di Ninrodi, na ses entrada. E ta risgatanu di asirius, oras kes ben pa nos tera, oras kes pasa dentu di nos frontéra. ⁷ Kel ultimu di Jakó ta ista entri txeu povu, sima orváliu di Nhordés, sima brufa riba relva, ki ka ta ispera pa omi, nem pa fidju di kes algén. ⁸ Kel ultimu di Jakó ta ista entri nasons, na meiu di povus, sima lion entri animal di floresta, sima un lionzinhu na meiu ribanhu di ovelias. Oras ki e pasa pa es, e ta pisa-s I dispedasa-s, y ka ta ten algén pa salva-s. ⁹ Bu mon ista labantadu kontra bus inimigus y ta distruí-s. ¹⁰ "Ta kontisi na kel dia", Nhordés fla: "N ta distrui na bu meiu bus kabalus y N ta dimuli bus karuajens. ¹¹ N ta distrui sidadis di bu tera y N ta ronba tudu bus fortalezas. ¹² N ta destrui fitisaria di bus mon, y ka ta ten mas adivinhu. ¹³ N ta distrui bus imajens iskuplidus y bus koluna sagradu di pedra, ki ista na bu meiu. Bu ka ta adora mas obras di bu mon. ¹⁴ N ta rinka di bu meiu ke-s postis di Aserá, Y N ta distrui bu sidadi. ¹⁵ N ta fazi vingansa ku raiba y ira riba kes nason ki ka obedesen.