¹ Ma, na últimus dia, ta kuntise ki munti di Kaza di Nhordes ta ser stabelesidu riba kes otus munti. E ta ser izaltadu riba kulina y pa el ta ben monti povus. ² Txeu nason ta ben y ta fla: Nhos ben, nu subi pa munti di Nhordes, pa kaza di Deus di Jako. E ta inxina-nu Ses kaminhu y nu ta anda na Ses pasu. Pamodi Lei ta ben di Sion y palavra di Nhordes di Jiruzalen. ³ E ta julga na meiu di monti povu y E ta ser un árbitru riba di monti nason di lonji. Es ta faze ses spada bira aradu, y ses seta bira foisi. Nason ka ta labanta mas spada kontra outu nason, nen es ka ta trena mas pa gera. ⁴ Inbes di kel-li, es ta xinta, kada un dibaxu di se videra y dibaxu di se figera. Ningen ka ta faze-s xinti medu, pamodi boka di Nhordes di izérsitu ki fla. ⁵ Pamodi tudu povu anda, ka un, na nomi di se deus. Ma anos nu ta anda na nomi di Nhordes, nos Deus, pa tudu senpri. ⁶ Na kel dia, Nhordes fla, N ta ben konkrega kes ki ta mankaba y djunta kes ki staba iziladu, kes ki N afliji. ⁷ N ta faze di kes ki ta mankejaba restanti y di di kes ki staba iziladu un nason forti; y Ami, Nhordes, N ta reina riba di es na Munti Sion, gosi y pa senpri. ⁸ Y abo, tori di guarda di ribanhu, fortaleza di fidja di Sion, ta ben pa bo, sin, ristorason di bu reinu antigu, reinu ki pertense fidja di Jiruzalen. ⁹ Gosi, pamodi ki bu ssa ta djata? Ka ten rei na bu meiu? Kenha ki ta konsedja-u dja mori? É ka pamodi kel-la ki bu tomadu di dor sima di un mudjer ki sta na trabadju di partu? ¹⁰ Bu ta sufri dor y bu ta sforsa pa bu pari, sima mudjer na trabadju di partu, abo fidja di Sion. Pamodi gosi bu ta sai di sidadi, bu ta vive na kanpu y bu ta bai pa Babilonia. La, bu ta ser resgatadu. La, Nhordes ta bai resgata-bu di mon di bus inimigus. ¹¹ Gosi monti nason ta kongrega konta bo; es ta fla: Ki Jiruzalen ser prufanada, ki nos odjus intxi di gozu riba Sion. ¹² Prufeta fla: Es ka konxe pensamentus di Nhordes, nen intende Ses planu, pamodi E djunta povus sima lenha na kanpu. ¹³ NHordes fla: Labanta y dibulha, fidja di Sion, pamodi N ta faze bus xifri ku feru y bus kasku di bronzi. Bu kaba ku monti povu y N ta konsagra bus rikeza injusta y bus ben pa Mi mes, Nhordes, Sinhor di tudu tera.