¹ Na kes dias y na kel tenpu, ora ki N traze iziladus di Juda y di Jirusalen, ² N ta djunta tudu kes nason Y N ta traze nhos pa rubera di Jozafa. La N ta julga-s trokadu nha povu y di nha eransa, Israel, kenha ki es spadja pa meui di nason y pamodi es dividi Nha tera. ³ Es fulhia sorti pa Nha povu, es troka un mininu pa un prustituta, y es bende un minina pa vinhu, pa es bai bebe. ⁴ Gosi, pamodi ki nhos sta xatiadu ku mi, Tiru, Sidon y tudu rujion di Filistia? Nhos kre vinga di Mi? Sikre nhos vinga di Mi, na faxi N ta paga nhos pa kuzas ki nhos sa ta faze. ⁵ Pamodi nhos toma Nha prata ku Nha oru, y nhos leba Nhas tizoru di valor pa nhos tenplu. ⁶ Nhos bende povu di Juda ku di Jiruzalen pa gregus, pa ki es lebadu pa lonji di ses tera. ⁷ Nhos odja, N sta kuazi ta faze nhos sai di lugar undi nhos ta bende, y N ta paga nhos kuza ki nhos faze. ⁸ N ta bende nhos fidjus y fidjas, pa povu di Juda. Es ta bende-s pa sabeus, un nason txeu distanti". Pomodi si ki Nhordes fla. ⁹ Nhos fla kel-li na meiu di povu: "Nhos pripara pa gera, nhos disperta omis puderozus, nhos dexa-s txiga pertu, pa ki tudu omi pripara pa batalha. ¹⁰ Nhos panha nhos inxada nhos faze-l spada, y nhos seta nhos faze-l foisi. Kenha ki é fraku pa fla: "Ami é forti". ¹¹ Nhos faxi nhos ben, tudu nason ki sta pertu, nhos djunta la". O Nhordes, pui Bus gererus puderozus pa dixi. ^{12 13} N pirmiti ki nason labanta y ben ti rubera di Jozafa. Pamodi N ta bai fika la xintadu pa julga tudu nason ki sta pertu. Nhos lansa foisi, pamodi azagua dja da. Nhos ben, masa riba di uva, pamodi lagar dja intxi. Vazus di lagaris dja intxi ti ta baza, pamodi se maldadi é grandi. ¹⁴ Izisti un kunfuson, un kunfuson na rubera de Julgamentu. Pamodi dia di Nhordes sa ta txiga na rubera di Julgamentu. ¹⁵ Sol y lua ta fika sukuru, y strelas ta sukundi si brilho. ¹⁶ Nhordes ta grita di Sion, y E ta labanta Se vos di Jiruzalen. Séu ku tera ta treme, ma Nhordes ta ser un gazadju pa Se povu, y un rotxa pa povu di Israel. ¹⁷ "Pa ki nhos sabe ki ami é Nhordes, nhos Deus, ki ta mora na Sion, Nha munti santu. Nton, Jiruzalen ta ser santu, y ninhun izérsitu ka ta anda sobri el otu bes. ¹⁸ Ta kuntise ki, na kel dia, rotxas ta baza vinhu doxi; rubera ta da leti; rius pikinotis di Juda ta intxi di águ, y un fonti ta ben di kaza di Nhordes y ta rega rubera di Sitin. ¹⁹ Ijitu ta torna divastadu y abandonadu, y Idon ta bira un dizertu, trokadu violensia ki fazedu pa povu di Juda, pamodi es dirama sangi di inosenti na se tera. ²⁰ Ma Juda ta ser abitadu pa senpri, y Jiruzalen ta ser abitadu di jerason pa jerason. ²¹ Ami N ta vinga di sangi di kes ki inda N ka vinga, pamodi Nhordes ta mora na Sion.