¹ Toka tronbeta na Sion y nhos toka alarmi na nha munti santu! Nhos dexa ki tudu moradoris di tera tremi de medu, pamodi dia di Nhordes sa ta txiga; na verdadi sta kuazi! ² É un dia sukuru y ku txeu tristeza, un dia di nuven y txeu sukuru. Sima lus ki ta brilha anti di sol nase, ki ta spadja pa muntanha, un grandi y puderozu izérsitu sa txiga. Nunka parse un izérsitu sima kel-li, y nunka ka parse otu bes, sikre dipos di txeu jerason. ³ Un lumi sa ta kema tudu ki sta se dianti, y pa tras xama sa ta ardi. Se dianti tera é sima jardin di Eden, ma pa tras ten un dizertu ruinadu. Na verdadi, nada ka ta skapa-l. ⁴ Izérsitu ta parse ku kabalu, y es ta kore sima kabalerus. ⁵ Es ta salta ku un barudju sima di karus di gera riba di muntanha, sima barudju di lumi ki ta djeme restu di povu, sima un puderozu izérsitu prontu pa batalha. ⁶ Povu sta na angustia, bu dianti, y tudu ses rostu dja bira pálidu. ⁷ Es ta kore sima puderozu gereru, es ta subi muru sima tropa, es ta marxa sima ki ku un, sen kebra filera. ⁸ Ninhun des ka ta pintxa kelotu pa ladu; Es ta marxa kada un na ses kaminhu. Es ta kebra difeza y es ka ta sai di linha. ⁹ Es ta fadiga na sidadi, es ta kore na muru, es ta subi na kaza y es ta pasa pa janela sima ladron. ¹⁰ Tera ta treme dianti di es; séu ta treme; sol ku lua ta bira sukuru y strelas ta dexa di brilha. ¹¹ Nhordes ta labanta se vos dianti di Se izérsitu, pamodi ses gererus é txeu dimas, y kes ki ta kunpri Ses ordi, es é forti. Pamodi dia di Nhordes é grandi y txeu medonhu . Kenha ki ta pode subrivivi? ¹² "Inda gosi li", Nhordes fla, "nhos torna ben pa mi ku tudu nhos kurason, ku jijun, txoru y lamentu". ¹³ Nhos ratxa nhos kurason y ka so nhos ropa y nhos torna ben pa Nhordes, nhos Deus. Pamodi El é grasiozu y mizerikordiozu, ta dura ki xatia, ten txeu amor y E ta rapende di da punison. ¹⁴ Kenha ki sabe? Si E ka ta rapende y e ta xinti pena di nhos, pa e dexa un benson dipos di El, un oferta di serial y bebida pa Nhordes nhos Deus? ¹⁵ Nhos toka tronbeta na Sion, nhos konvoka un santu jijun y un asenbleia santu. ¹⁶ Kongrega povu, konvoka un asenbleia santu. Nhos djunta nhos gentis grandi, kriansas, y kes ki inda ta máma. Ki noivus sai di ses kuartu, y noivas, di ses apuzentus nupisial. ¹⁷ Ki tudu saserdoti, servus di Nhordes, nhos txora na meiu di pórtiku ku altar; ki es fla: "Ten mizerikordia di Bu povu, Nhordes, ka bu traze burgonha pa Bu eransa, pa ki nason guverna riba des". Pamodi es ta flaba na meiu di nason: "Undi sta bu Deus? ¹⁸ Nton Nhordes mostra Se kuidadu pa Se tera, e xinti mizerikordia di Se povu. ¹⁹ Nhordes rusponde pa Se povu : "N ta manda nhos gron, vinhu nobu y azeti. Nhos ta farta, y N ka ta faze nhos mas un disgrasa na meiu di nason. ²⁰ N ta fulha pa lonji di nhos, izérsitu di norti, y N ta kunduzi nhos pa tera seku y largadu. Diantera di se izérsitu ta bai pa mar oriental y se pa tras pa mar osidental. Se txeru ta labanta, se txeru fedi ta labanta. Ami N faze kuzas grandi. ²¹ Ka bu xinti medu, tera, fika alegri y intxi di gozu, pamodi Nhordes ta faze kuzas grandi. ²² Ka bu xinti medu, animal selvajen, pamodi pastu di dizertu ta nase, árvi ta pruduzi frutu y figera ku pé di uva ta da un grandi kodjeta. ²³ Fika alegri, povu si Sion, y intxi di gozu na Nhordes, bu Deus. Pamodi E ta da nhos txuba di otonu na tenpu sertu, e ta nvia monti txuba pa bo, txuba di otonu ku txuba di primavera, sima antis. ²⁴ Sileru ta fika intxidu di trigu y baril ta intxi ti boka di vinhu ku azeti. ²⁵ N ta ristaura anus di kodjeta ki inxami di kafanhotu kume - kafanhotu pirigrinu, gafanhotu divastador, kafanhotu kumedor y kafanhotu kortador - Nha puderozu izérsitu ki N manda pa nhos. ²⁶ Nhos ta kume txeu y nhos ta farta, y nhos ta lova Nomi di Nhordes, nhos Deus, ki faze maravilha na meiu di nhos, y Ami nunka N ka ta torna traze burgonha pa Nha povu. ²⁷ Nhos ta fika ta sabe ki Ami N sta na meiu di Israel y ki Ami é Nhordes, nhos Deus, y ka ten otu, y Ami nunka mas N ta trze burgonha pa Nha povu. ²⁸ Ta kuntise ki dipos N ta lansa Nha Spritu riba di tudu algen, y nhos fidjus ku fidjas ta prufetiza. Nhos gentes bedju ta sunha; nhos joven ta ten vizon. ²⁹ Na kel dia, N ta lansa Nha Sprítu tanbe riba di skravu matxu ku femia. ³⁰ N ta mostra maravilha na séu ku na tera; sangi, lumi y kuluna di fumasa. ³¹ Sol ta bira sukuru y lua ta bira sangi, anti ki ben grandi y medunhu Dia di Nhordes. ³² Y tudu kel ki grita pa Nomi di Nhordes ta ser salvu. Pamodi, na munti Sion y na Jiruzalen ta sta kes ki skapa, sima Nhordes flaba, y na meiu di subriviventis, kes ki Nhordes ta txoma [Nota: Normalmenti, na kes Bíblia katólika, livru di Juel ten 4 kapítulu y na di kes Bíblia prutestanti 3; ma asuntu é kel me: Juel 2:28-32 ta kuresponde Juel 3:1-5, inkuantu ki Kapítulu 3 ta kuresponde kel 4 di kes Bíblias katólikas].