¹ Na sugundu anu di rei Dariu, na sestu mes, na prumeru dia di mes, palavra di Nhordes txiga pa mon di Ajeu, prufeta, pa guvernador di Juda, Zorobabel, fidju di Sialtiel, y pa xéfi di saserdoti, Jozue, fidju di Jozadaki, ta fla: ² Nhordes di izérsitus fla kel-li: Fla pa es povu: Inda ka txiga ora pa nu ben kunstrui kaza di Nhordes. ³ Nton palavra di Nhordes ben pa mon di Ajeu, prufeta, y e fla: ⁴ Nhos ta atxa dretu pa nos nu vive na kazas ben kosntruidu, inkuantu es kaza sta na ruína? ⁵ Nton Nhordes di izérsitus ta fla si: Nhos odja pa nhos bida! ⁶ Nhos ta simia txeu simenti, ma nhos ta kodje poku; nhos ta kume, ma nhos ka ta farta; nhos ta bebe, ma nhos ka basta sedi. Nhos ta bisti ropa, ma nhos ka ta akese, y kes ki ten un salariu ta ganha dinheru pa pui na kartera furadu! ⁷ Nhordes di izérsitu fla si: Nhos odja pa nhos bida! ⁸ Nhos subi muntanha, nhos traze madera y nhos konstrui nha kaza. Nton N ta xinti prazer na el y N ta ser glorifikadu! Nhordes fla: ⁹ Nhos ta djobe pa mas txeu, ma nhos odja: Nhos ta traze poku pa kaza, y kel poku ki nhos ta traze, ku un sopru N ta sopra-s pa lonji. Pamodi? Kel-li é diklarason di Nhordes di izérsitus: Pamodi nha kaza tina sta na ruína, inkuantu kada ómi sa ta djobe so pa luxu di se kaza. ¹⁰ Trokadu kel-li, N fitxa séu pa ka txobe y tera guarda se prudutu. ¹¹ N manda seka pa riba tera y pa riba muntanha; pa riba gran y riba vinhu nobu; pa riba oliu y riba tudu ki tera ta pruduzi. Pa riba ómi y riba animal, y riba tudu trabadju ki es ta faze ku ses mon. ¹² Nton Zorobabel, fidju di Sialtiel, y xefi di saserdoti, Jozue, fidju di Jozadaki, djuntu ku restu di povu, obedese vos di Nhordes, ses Deus, y palavras di prufeta Ajeu, pamodi Nhordes tenba nviadu el. Gentis xinti temor di rostu di Nhordes. ¹³ Dipos Ajeu, mensajeiru di Nhordes, papia mensajen di Nhordes pa povu y e fla: Ami N sta ku nhos! É kel-li ki é diklarason di Nhordes. ¹⁴ Nton Nhordes move spritu di governador di Juda, Zorobabel, fidju di Sialtiel, y spritu di xefi di saserdoti, Jozue, fidju di Jozadaki, y spritu di tudu restu di povu, y es bai u es kumesa ta trabadja na kaza di nhordes di izérsitus, ses Deus. ¹⁵ Na dia vinti y kuatu di sestu mes, na sigundu anu di rei Dariu.