¹ Na sétimu mes, na dia vinte y un, palavra di Nhordes txiga pa mon di prufeta Ajeu, y fla: ² Papia pa governador di Juda, Zorobabel, fidju di Sialtiel, y pa xefi di saserdoti, Jozue, fidju di Jozadaki, y pa tudu restu di povu, y fla-s: ³ Di kes ki resta na nhos meiu, kenha ki odja es kaza na se gloria anterior? Y moki nhos sa ta odja-l gosi? Ka sa ta parse sima nada dianti di nhos odju? ⁴ Gosi go, mante forti Zorobabel, pamodi é kel-li ki Nhordes sa ta fla-u. Mante forti xefi di saserdoti Jozue fidju di Jozadaki; y nhos mante forti, nhos tudu povu di tera! É kel-li ki Nhordes sa ta fla-nhos. Nhos trabadja, pamodi N sta ku nhos. Kel-li ki Nhordes di Izérsitus sa ta fla. ⁵ Pa kel ki N prumete nhos na aliansa ki N faze ku nhos kantu N tra nhos pa fora di Ijitu, ka nhos xinti medu, pamodi nha Spritu ta mora na meiu di nhos. ⁶ Pamodi Nhordes di Izérsitus fla si: Dili un pokinhu, mas unbes N ta treme séu ku tera, mar ku txon seku. ⁷ Y N ta treme tudu povu, y kada povu ta traze-M ses kuzas di valor, y N ta intxi es kaza di gloria. É si ki Nhordes sa ta fla. ⁸ Prata ku oru é di meu! ⁹ Gloria di es kaza ta ser maior na futuru di ki na se kumesu, y N ta dá pas pa es lugar. Nhordes di Izérsitu ki sa ta fla. ¹⁰ Na dia vinyti y kuatu di nonu mes, na sugundu anu di Dariu, palavra di Nhordes txiga pa meiu di prufeta Ajeu y fla: ¹¹ Nhordes di Izérsitus sa ta fla si: Purgunta pa saserdotis kuze ki lei ta fla: ¹² Si un ómi karega karni konsagradu pa Nhordes na ponta di si ropa, y si ponta di ropa toka na pon o gizadu, vinhu o oliu, o kualker otu tipu di kumida, kel-li kumida la ta bira santu? Saserdotis rusponde y es fla: Nau. ¹³ Nton Ajeu fla: Si algen inpuru trokadu morti, toka na kualker di es kuzas, kes kuzas li ta fika inpuru? Saserdotis rusponde ta fla: Sin, es ta bira inpuru. ¹⁴ Ajeu nton rabida y fla: Asi é es pesoas y es povu ki sta dianti di mi, diklara Nhordes. Y asi é ku tudu ki nhos ta faze ku nhos mon: kuzas ki nhos sa ta oferesen é inpuru. ¹⁵ Gosi go, nhos rifliti apartir di dia di oji pa dianti, anti di pudu kualker pedra riba pedra na tenplu di Nhordes. ¹⁶ Senpri ki algén ben pa lugar undi ki ta sprimi gran pa tra vinti midida di gran, e atxa so des; senpri ki algen ben pa tunel pa tra sinkuenta midida di vinhu, e atxa so vinti. Nhordes sa ta fla: ¹⁷ N fri nhos ku feruji y mofu, na tudu trabadju ki nhos mon faze, y sime, nhos ka volta pa mi. ¹⁸ Nhos rifliti apartir di es dia pa dianti, desdi di dia vinti y kuatu di nonu mes, desdi dia ki fundason di tenplu di Nhordes pudu. Nhos rifliti na kel-li! ¹⁹ Inda ten simenti na Sileru? Videra, figera, romera y olivera ka produzi mas! Ma apartir di es dia N ta bensua nhos! ²⁰ Nton palavra di Nhordes txiga pa sugundu bes pa Ajeu na dia vinti y kuatu di mes, ta fla: ²¹ Papia pa governador di Juda, Zorobabel y fla-l: N ta treme séu ku tera. ²² N ta pui na txon tronu di reinus y N ta distrui forsa di reinus di povus. N ta pui na txon karuajen ku ses kabaleru, kabalu ku ses kabaleru ta kai, kada un trokadu di spada di se irmon. ²³ Nakel dia, Nhordes di izérsitus ta fla: N ta labantadu, Zorababel fidju di Sialtiel, sima nha servu. N ta pubu sima selu di nha anel, pamodi é bo ki N skodje. Tudu kel-li Nhordes di Izérsitu diklara.