¹ Keli ki Nhordes mostra-m. Odja, un sestu di frutas di veron! ² E fla: "Kuze ki bu sa odja, Amos?". N fla: "un sestu di frutas di veron". Nton, Nhordes fla-m: "Fin dja txiga pa Nha povu, Israel; N ka ta ten mas mizericordia ku es. ³ Kes kantigas di templu ta bira lamentus, Si ki Nhordes fla, na kel dia, kadabras ta ben ser txeu; na tudu kou, es ta ser fulhadu pa fora, na silensio!". ⁴ Nhos obi keli, nhos ki ta masa riba kes nesisitadu, y nhos ta distrui pobris di tera. ⁵ Es ta fla; "Ki tempu ki lua nobu ta pasa, pa nu podi bendi gron otu bes? Y sabadu, ki tempu ke ta pasa, pa nu podi bendi trigu? Nu diminui midida y nu omenta preso, pa nu trapasa ku balansas ki ta ngana. ⁶ Keli é, pa nu podi bendi trigu mariadu, kunpra pobri pa prata y nisisitatu pa un par de sapatu". ⁷ Nhordes jura pa orgulhu di Jako. "Di verdai nunka Nka ta skesi di ninhun di nhos ason. ⁸ "Tera ta tremi trokadu ses ason y kada un ki ta mora na el ta txora? Tudu keli ta ben subi sima riu Nilu y ta ben ser fulhadu y murgudjadu otu bes, sima riu di Ejitu. ⁹ Nhordes fla, keli ta ben na kel dia, ki N ta fazi sol kanba mei dia y N ta pui tera sukuru na klareza di dia. ¹⁰ N ta bira nhos festas sima interu y tudu nhos kantigas na lamentason. N ta fazi tudu nhos bisti ropa di saku y nhos ta fika ku kabesa raspadu. Nta fazi keli sima interu di uniku fidju, bu fin é sima dia malgós. ¹¹ Nhos odja, dias sa ta ben, si ki Nhordes fla, oras ki N manda fomi na tera, ka fomi di pon nen sedi di águ, ma di obi palavra di Nhordes. ¹² Es ta bai tonbadu di mar pa mar; es ta cori di norti ti oesti, pa djobi palavra di Nhordes, ma es ka ta atxa. ¹³ Na kel dia kes virjen bunitas y kes jovens ta infrakisi di sedi. ¹⁴ Kes ki jura pa pekadus di Samaria, kesli ta kai y nunka es ka ta labanta otu bes.