¹ Keli ki Sinhor Deus mostra-m. E kria kanfanhotus kantu padja komesa ta nansi. Kel padja era un padja ki nansi dipos di kodjeta di rei. ² Kantu ki es finda di kume frutus di tera, nton N fla; "Nhordes, pendon, dizumola! Jako é mutu pikinoti, modi ki é ta subrivivi?" ³ Nhordes disisti y é fla "Keli ka ta ben kontici" ⁴ Keli ki Nhordes mostra-m; "Nhordes txoma lumi pa kondena. Dja seka kes águ grandi fundu baxu di tera y é podi kaba ku txon tanbe; ⁵ ma N fla; "Nhordes, nhu para, dizumola! Jako é mutu pikinoti. Modi ki é ta subrivivi?". ⁶ Nhordes disisti y é fla: "Keli tanbe ka ta ben kontici". ⁷ Keli ki Nhordes mostra-m; "Nhordes dja para na ladu di paredi, ku un fiu di prumu na Se mon. ⁸ Nhordes fla-m; "Amos, kuze ki bu sa odja?". N flal: "un fiu di prumu". Nton, Nhordes fla: "Odja, N ta ben pui fiu di prumu na meiu di Nha povu Israel. N ka ta popa-s mas. ⁹ Kes lugar altu di Izaki N ta ben kaba ku es, kes santuariu di Israel ta ben ser distruidu, y N ta ben labanta kontra kaza di Jeroboan ku spada". ¹⁰ Nton, Amazias, saserdoti di Betel, manda recadu pa Jeroboan, rei di Israel: "Amos tramanha kontra bo na meiu di kaza di Israel.Tera ka ta aguenta tudu kuzas ke pápia. ¹¹ Pamodi keli ki Amos fla: "Jeroboan ta mori pa spada, y Israel ta ben ser lebado pa lonji di se tera". ¹² Amazias fla Amos: "Adivinhu, bai. Fuji y torna bai pa tera di Juda, kume pon la y profetiza. ¹³ Mas ka bu profetiza mas li na Betel, pamodi é Santuariu di rei y é kaza di rei". ¹⁴ Nton, Amos fla pa Amazias: "Ami N ka é profeta, nen N ka fidju di profeta. Ami é pastor di baka y plantador di sicumurus. ¹⁵ Ma Nhordes leba-m di undi ki-m staba ta pastoria rebanhu y é fla-m: "Bai, profetiza pa Nha povu Israel". ¹⁶ Goci, obi palavra di Nhordes. "Ka bu profetiza kontra Israel y ka bu papia kontra kaza di Izaki". ¹⁷ Purisu, keli ki Nhordes fla: "Bu mudjer ta ben ser prustituta na sidadi; bus fidju y bus fidja ta ben kai na spada; Bu tera ta ben ser mididu y partidu; Bu ta ben mori na un tera suju y, sen duvida, Israel ta ben bai pa eziliu fora di se tera".