¹ "Koityi malaikayatab kaniset ne mi Sarde sir anyun: 'Ng'alechu ko bo inendet ne tinye tamirmirik tisab che bo Jehovah ak kokelik tisab. " Anget boisioniguk. Itinye kainet kele isobe, ago kiimei. ² Kosu ak igimit tuguk che ng'etunotin che legit komeiyo, amu tomo anyoru, boisioniguk ko che kigosulda eng taitab Jehovah nenyu. ³ Inan anyun, kito ne kiitaach ak o igas. Kas iit anyun, ak isigu. Ngot ko meng'et ak iripse anyun, achonii ko u chorindet, amenae sait ne anyonjinin. ⁴ Ago itinye kainaik che ng'ering eng' Sarde che ma imuruon ngoroikwai, ak tun bendoti icheket kobotoo, koloogoti ngoroik che lechach, amu nyolunotin icheket. ⁵ Inendet ne iterteri kotun kilaakchini ngoroik che leelachen, ak mogoi abuch kainenyi eng Bukuitab Sobondo, ago ang'anye kainenyi eng taitab Kwandanyu, ak eng taitab malaikaisiekchi. ⁶ Inendet ne tinye itit, kogas kito ne mwachini Tamirmiriet kanisosiek" ⁷ " Koityi malaikaiyatab kaniset ne mi eng’ Piladelpia sir anyun: ' Ng'alek chebo inendet ne tilil agobo iman- inendet ne tinye yateiwotab Daudi, inendet ne ngo yaat ko makere chi, ak ne ngoker ko mayatei chi. ⁸ "'Angen boisioniguk. Keer anyun, kaandene taing’ung’ kurget ne yatat ne maimuchi chi koger. Angen ale itinye kimnatet ne kitigin, ako kiirib ng’olyondenyu, ama itai kainenyu. ⁹ Keer anyun! Agochini icheget che bo sunagogitab Chesawil, icheget che kuregee yahudik ago ma ichet, che kenu- Ayae icheket kobwa kogutuny eng kelyeguk, ak konai kole achamin. ¹⁰ Amu kiirib ng’atutiennyu eng muitaet, aribin agine eng’ kasartab tiemisiet ne chonjini ng’weny komugul, si kotiem icheket che menyei ng’weny. ¹¹ Anyoni achogu. Nam missing noto itinye si masaranin chi kutweng’ung. ¹² Inendet ine iterteri ayae koek toloita eng' hekalut ne bo Jehova nenyu. Ama komandoi sang’ kogeny, ak asirjini inendet kainetab Jehova nenyu, ak kainetab nganasetab Jehova nenyu. (noto ko Jerusalem ne leel, ne chorugei eng kipsengwet kobunu Jehova nenyu), ak kainenyu ne leel. ¹³ Inendet ne tinye itit, kogas kito ne mwachini Tamirmiriet kanisosiek."' ¹⁴ "Koityi malaikaiyatab kaniset ne mi Laodikia sir anyun: 'Ng'alekab inendet ne Amen, baoriat ne kiyani ak ko bo iman, bounindetab yautikab Jehova. ¹⁵ "Angen bosioniguk ale mekaitit amebele bich. Kata keigei nda kekaitit anan ibele bich! ¹⁶ Ko amu ilalang anyun- mebele bich amekaitit- Ko legit, ang’ung’den eng’ kutinyu. ¹⁷ Amu imwae ile, 'Aii Magorio, ak kianyoru tugukchu che chang', ama mi kiy ne amache.' Ako mengen anyun ile inyalilii mising, nyolu kerirenen, ibanani, ii kipkoratia ak imi aach ngor. ¹⁸ Kas katikonenyu: alena tahabu ne kigitilile mat asi iegu magoriot, ak ngoroik che leelach ako liltoi, si ilaach, ak si matook kalilanetab aach ngorieng’ung, ak kerichekab konyek che iile konyeguk si igeerte. ¹⁹ Agere kong’ ak atigoni tugul che achame. Noto anyun, igiilge ak isigu. ²⁰ Keer anyun, atononi eng’ kurget ak agonygonyi. Ngot ko kas chi age tugul kutinyu ak koyaat kurget, anyoni konyi ak aamisie koboto inendet, ak koamis inendet kobotoo. ²¹ Inendet ne iterteri agochini ketebi tuwai eng’ ng’echerennyu ne bo laitornatet, ko u ye kiaterter agine ak atebi ak Kwandanyu eng’ ng’echerenyi ne bo laitornatet. ²² Inendet ne tinye itit, kogas kito ne mwachini Tamirmiriet kanisosiek.""